¹ Ndipo Yesu esogolelewa na mzimu kuya mcipululu kuyoyesewa na mdyelekezi. ² Pesala kulya kwa masiku fote mzuba na usiku, ecimvwa njala. ³ Omuyesa ewela nakuti kwa eve, "ngati niwe mwana wa Mulungu, lamulila myala izi kuti zisanduke buledi." ⁴ Koma Yesu eyankha nakuti, "nicolembeka , "munthu sonkhala na moyo na buledi weka, koma na liu iliyonse yofuma pakamwa pa Mulungu." ⁵ Ndipo mudyelekezi emuthwala kumzinda utuba nomuika palulu ngako pa malo ya kacisi, ⁶ nakuti kwa eve, "ngati niwe mwana wa Mulungu, ziponye weka pansi pakuti nicolembeka , 'Eve akalamulile angelo bake kuti akakusamalile weo,' ndipo, akakunyamule m'manja bao kuti weo usakachaye kwendo kwako pa pamwala." ⁷ Yesu eciti kwa eve, "soti nicolembeka , 'osaesa Ambuye Mulungu wako." ⁸ Soti, Mdyelekezi emtola kuya naye pa lupili itali nagako nakumuonesha ma ufumu onse na ulemelelo wake onse. ⁹ Eciti kwa eve, "vonse ivi vinthu nikupase nagati weo upone pansi nakunilambila neo." ¹⁰ Ndipo Yesu eciti kwa eve, "Fumapo pano, satana! pakuti nicolembeka, 'ukalambile Ambuye Mulungu wako na kumutumikila eve eka.' ¹¹ Ndipo Mdyelekezi emusiya , ndipo onani angelo ewela nakumutumikila eve. ¹² Lomba Yesu pecimvwa kuti Yohane epelekewa, ewela mu Galileya. ¹³ Eve efuma ku Nazaleti nakuya, kuyonkhala ku Kapelenamu, uli mu mbali mwa nyanja ya Galileya mu mizinda ya Zebuluni na Nafitali. ¹⁴ Ici cecitika kuti cikwanilishe cinenewa na Yesaya mneneri, ¹⁵ "Malo ba Zebuluni na malo ba Nafitali, kuyofwika ku nyanja, kupitilila ku Yorodano, Galileya wa Akunja! ¹⁶ Banthu benzonkhala mu mdima baona kuwala kukuleni, na kwa ao enzonkhala mu malo na mthunzi wa imwa, pa beve kuunika kwabafwikila." ¹⁷ Kufuma nthawi ila Yesu eyamba kulalikila na kuti, "lapani, ufumu wa Mulungu wawela pafupi." ¹⁸ Penzoyenda mumbali mwa nyanja ya Galileya, eve eona azinekwa abili, Simoni enzo itiwa Petulo, Andereya mukwao, oponya neti yaomu nyanja , pakuti benze asozi ba nsomba. ¹⁹ Yesu eciti kwa beve. "welani, munikonkhe neo, na neo nukupangeni asozi banthu." ²⁰ Nthawi yamene iyo besiya maukonde bao nomkonkha. ²¹ Yesu penzocoka kula eve eona azinekwa ayake abili, Yakobo mwana wa Zebediya na Yohane mukwao. Beve benze mu boti na Zebediya ausuwao kukonza maneti bao. ²² Ebaita, na nthawi yamene iyo besiya boti na ausuwao no mukonkha eve. ²³ Yesu eluta ponse ponse mu Galileya, ophunzisha mu ma sunagoge bao, kulalikila uthenga wa ufumu nakupolesha mitundu yosiyana-siyana ya matenda pakati pa banthu. ²⁴ Uthenga wake weluta ponse ponse mu Siliya, na banthu bemuletela eve onse bala enzolwala matenda osiyana siyana na vobaba, na bala enze na vibanda, bakhunyu, na olemala. Yesu ebapolesha beve. ²⁵ Magulu akulu akulu emukonkha eve kufuma mu Galileya, Dekapoli, Yerusalemu, na Yudeya, na kufuma mopilila Yolodano.