¹ Penze pamene Yesu pecisilizhya mau aba,efumako ku Galileya na kuya ku malo ya Yudeya yamene yali ku sogolo kwa msinje wa Yorodani. ² Gulu ikuleni yemukonkha, ndipo ebapolesha kwamene kwala. ³ Afalisi ewela kwa eve, kumuyesa, kuti kwa eve, "Ko nicololeka lidoda kumasula ukwati na mwakazi wake pa cifukwa ciliconse?" ⁴ Yesu eyankha nakuti, "Muliye belenge kuti wala ebapanga poyambilila epanga mwalume na mwankazi? ⁵ Ebapanga eciti soti kwa beve, 'pacifukwa ici mwalume akasiye awisi na anyina nakuyophatikana na mwanakazi wake, ndipo abili akabe mubili umozi.' ⁶ Teto balilini abili soti, koma mubili umozi. Mwaici camene Mulungu waciika pamozi, pasabe munthu ocigaba." ⁷ beciti kwa eve, "Cifukwa nicini Mose etilamula kupeleka kalata yolekanisha na kumufumya alute?" ⁸ Eciti kwa beve, "cifukwa ca kuyuma mitima kwanu, Mose ekulolani kuti mukkolena na mwanakazi wanu, koma kufuma poyamba cenze lini teto. ⁹ Nukuti kwa mweo, aliyense oleka mwakazi wake, kufumyapo tyala cifukwa ca cigololo, na kuyokwatila muyakine, ocita cigololo; n mwanalume okwatila mwanakazi walekewa naye ocita cigololo." ¹⁰ Ophunzila eciti kwa Yesu, "ngati mlandu wa mwanalume na mwanakazi wake uli teto, nicabwino lini kukwatila." ¹¹ Koma Yesu ecti kwa beve, "Ni aliyense lini angavomele ciphunziso ici, koma bala tyala ololewa kucivomela. ¹² Pakuti kuli bala osabala enze teto kufuma m'mala mwa amai bao, ndipo kuli osabala bepangiwa osabala na banthu, na osabala ezipanga osabala cifukwa ca ufumu wa kululu. Bala angakwanishe kulandila ciphunzisho ici, lekani aciladile." ¹³ Ndipo bana atontho-atontho ebaleta kuli eve kuti ebaike manja yake na kubapemphelela, koma ophunzila ebazuzula. ¹⁴ Koma Yesu eciti, "Baloleni bana atontho, ndipo musabaleshe kuwela kwa neo, pakuti ufumu wa kululu ni wa bana atontho monga aba." ¹⁵ Eika manja bake pali beve, ndipo apo efumako kula. ¹⁶ Langani, Lidoda lewela kwa Yesu nakuti, "mphunzisi, nicabwino cotyani ciningacite kuti nibe na moyo osasila?" ¹⁷ Yesu eciti kwa eve, "unikonshela cinji pa cinthu cabwino? Umozi yeka niye wabwino, koma ngati ufuna kuloba mu moyo, sunga malamulo." ¹⁸ Lidoda leciti kwa eve, " malamulo otyani?" Yesu ecti, "usapaya, usacite cigololo, usaibe, usacitile umbon wa wenye, ¹⁹ Upase ulemu kwa amai bako na awisi wako, ndipo konda muyako monga uzikonda weka." ²⁰ Ndipo lidoda leciti kwa eve, "ivi vinthu vonse navikonkha. Nufunika cinji soti?" ²¹ Yesu eciti, "ngati ufunishisha kuba wa ngwilo, nkhoya, kagulise vulinavo, nakipasa losauka, ndipo ukabe na cuma kululu; ndipo wela, unikonkhe." ²² Koma lidoda pilecimvwa zecikamba Yesu, efumapo nacisoni, pakuti enze na cuma cinyinji. ²³ Yesu eciti kwa ophunzila bake, "Cendi nukuuzhyani kuti, nicokosa kuli munthu olemela kuloba ufumu wa Mulungu. ²⁴ Soti nukuti kwa mweo, nicapafupi ngamila kupita mumenso mwa singano kupambana munthu olemela kuyoloba ufumu wa Mulungu." ²⁵ Ophunzila pibecimvwa izi, benzeodabwa nakuti, "niotyani lomba angapulumushiwe?" ²⁶ Yesu ebalanga na kuti, "na banthu ici nicovuta, Koma na Mulungu vinthu vonse nivosavita." ²⁷ Teto Petulo eyankha nkuti kwa eve, "langani, tasiya vonse nakukukonkhani. Teto nicinji cati tikabe naco?" ²⁸ Yesu eciti kwa beve, Cendi nukuti mweo, mu zaka za lomba pamene mwana wa munthu akankhale pa mpando wake wacifumu waulemelelo, mweo mwenikonkha mukankhale soti pa mipando ya cifumu yali twelufu, kuweluza mitundu twelufu ya Israeli. ²⁹ Aliyense esiya mang'anda, azikwao, azilongosi, awisi, anyina, bana, kapena malo cifukwa ca zina yangu akalobe mu moyo osasila. ³⁰ Koma bala ali poyambilila akane posilizhyila, na osilizhyila akabe poyambilila.