¹ Pecipita masiku anyinji, pamene Yehova pecipasa mpumulo kwa a Israeli kufumila kwa adani bao onse amene obazungulira, ndipo Yoswa enze wokalamba ndipo enze na zaka zinyinji, ² Yoswa eita a Israeli onse- akulu akulu bao, asogoleri bao, oweruza bao, na akapitao bao- ndipo eciti kwa beve, "nine okalamba ndipo na zaka zinyinji. ³ Mwaziona ziwakucitilani Yehova Mulungu wanu ku vyalo vonse ivi cifukwa ca mweo, pakuti ni Yehova Mulungu wanu ekucitilani nkhondo. ⁴ Langani! nakugabilani mitundu yamene yesala kubagojesa monga coloba ca mitundu yanu, pamozi na mitundu yonse naiononga kale, kufumila ku Yorodani mpaka ku nyanja ikule caku m'mazulo. ⁵ Yehova Mulungu wanu akabafumye. Akabakankhe kufumya pamenso panu. Akatole malo bao, ndip mukatole coloba malo bao, monga mwekulonjezelani Mulungu. ⁶ Teto nkhalani olimbikila, kuti musunge na kucita vonse vilembewa mu mabuku ya malamulo ya Mose, kusakhwenthela kumbali ku manjele kapena ku kwendi, ⁷ teto osayavizyana na mitundu ya banthu besala pakati panu olo kutomola mazina ya milungu yao, kulapila mwa eve, kupembeza, olo kugwadila. ⁸ M'malo mwake mufunika kumamatila kwa Yehova Mulungu wanu monga mumwacitila mpaka siku la lero. ⁹ Pakuti Yeheva akabapilikishe pamenso banyinji pamenso panu, vyalo vamphamvu. Monga kwa mweo, paliye epanama pamenso panu mpaka siku la lero. ¹⁰ Nambala ya munthu umozi wa mweo, akautushe bali 1000 pakuti Yehova Mulungu, niye ocikucitilani nkhondo, monga mwecilonjezela. ¹¹ Muikeko ngakonzelu, kuti mukonde Yehova Mulungu wanu. ¹² Koma ngati muwelera kuvuli na kumamatila kwa opulumuka ba mitundu iyi amene esala pakati panu, olo ngati mulungulishana nao, olo ngati musonkhana nao pmozi na beve kusonkhana namwe, ¹³ ndipo muzibe cacendi kuti Yehova Mulungu wanu akafumye lini soti vyalo ivi pamenso panu. M'malo mwake, bakaye mbwina na msampha kwa mweo, mikwapu pamsana panu na minga m'menso mwanu, mpaka mukasile pa calo ici ciwakupasani Yehova Mulungu wanu. ¹⁴ lomba nukuya njila ya calo conse ca pansi, ndipo muziba mumtima na moyo wanu wonse kuti kuliye lizu limozi lekanga kunkhala lacendi pa vinthu vabwino vonse vamene Yehova Mulungu wanu elonjeza za mweo. Vonse vinthu ivi vakucitikilani, paliye cimozi ca veve cekangapo. ¹⁵ Koma ngati mau alowonse bekulonjezani Yehova Mulungu wanu bekwanilishiwa, teto Yehova akalete pa mweo vinthu viipa vonse mpaka kukuonongani kufumila calo ivi cabwio camene Yehova Mulungu wanu ekupasani. ¹⁶ Akacite ivi ngati mukaphwanye cipangano ca Yehova Mulungu wanu, camene cekulamulilani kusunga. Ngati mukuya kuyopembeza milingu iyakene nakuigwadila, ndipo ukali wa Yehova ukakuyakileni, ndipo mukataike msnga kufumila ku calo cabwino camene cekupasani."