¹ Weo nawe, mwana wangu, limbishika mucisomo cili mwa Yesu Kristu. ² Vinthu viwecimvwa kufuma kwa neo pakati pa mboni zinyinji, phunzisa banthu okhulupilika bati akaphunzise soti ayao. ³ Vutika nane mumavuto ngati msilikali wa Kristu Yesu. ⁴ Kuliye msilikali ogwila nchito koma soti niwotangwanika na zinchito za moyo uno angakondweleshe bwana wake mkulene. ⁵ Soti ngati muyakine ali pa mupikisano woutuka, opasiwa lini mendulo mpaka autuke mwa malamulo. ⁶ Nicofunikila kuti mulimi okata nchito na mphamvu alandile mphoto yake poyamba. ⁷ Ganizilani pa vunulabila, Ambuye amupeni kumvishisha mu vili vonse. ^{8 9 10} Kumbukilani Kristu Yesu, obadwa kufuma mwa Davide, eushiwa kufuma kwa akufwa. Ici cili kulingana na uthenga wabwino wangu, wanu zunzikila mpakila kufikila napomangiwa na macheni ngati nine olakwa. Koma mau a Mulungu niosamangiwa. Teto nupilila vonse kamba ka bala osankhiwa, kuti nao apeze cimulumuso cili mwa Kristu Yesu, naulemelelo wosasila. ¹¹ Aya ni mau okhulupilika: "Ngati tecifwa naye, tikankhale moyo naye soti. ¹² Ngati tupilila, tikalamulile naye. ¹³ Ngati tumukana yeve, akatikane nase. Ngati nise osakhulupilika, yeve niokhulupilika ndithu, ndaba angazikane lini yeka." ¹⁴ Pitilijya kubakumbusha za ivi vinthu. Bacenjejye pameso pa Mulungu kusakangana kamba ka mau; paliye phindu, soti cuononga tyala bala akumvwa. ¹⁵ Cita bwino pakuzionesha weka kwa Mulungu ngati ololewa, wokata nchito aliye comucitisha soni, ophunzisa mau azoona molongosoka. ¹⁶ Pewa mau onyodola, opangisha kufumilatu pa za umulungu. ¹⁷ Mau bao osakatila ngati matenda ya cilonda cosapola. Pakati pao pali Humenayo na Fileto, ¹⁸ batayika kufuma mu coonadi. Olabila kuti kuukishiwa kwecitika kale, ndipo boononga cikhulupililo cabayakine. ¹⁹ Olo zibe teti, maziko ya Mulungu niyo nkhazikika. Yali na colemba ici: "Ambuye obaziba ao bali bake" ndipo "Aliyense oita pa zina la Mulungu ofunika kuti afume ku viipa." ²⁰ Mung'anda ya munthu olemela munkhala lini tyala katundu wa golide na siliva, mulisoti na katundu wa vimiti na wa dothi. Viyake ni vokatishila nchito zaulemu ndipo viyakine va nchito ziliye ulemu. ²¹ Ngati munthu wazisuka ku zinchito ziliye ulemu niyekuti wankhala conyamulilamo vaulemu. Niopatulika, niofunikila ku mwine nchito, ndipo niokonzeka pa nchito yabwino iliyonse. ²² Zimasule ku cilako-lako caunyamata wako. Funafuna ciyelo,cikhulupililo, cikondi na mtendele na bala oita pa Ambuye na mtima utuba. ²³ Koma kana mafunso opusa na yaliye nzelu. Uziba yovyala mikangano. ²⁴ Wanchito wa Ambuye ofunika lini kucita mkangano. Koma ankhale ofasa kwa aliyense, okwanisha kuphunzisa, nodekha mtima. ²⁵ Ofunika mofasa aphunzise bala oshushana naye. Mulungu payake angabatembenule kamba koziba coonadi. ²⁶ bangabe na maganizo onkhazikika soti nakusiyana na msampha wa satana, atakatiwa naye pa cifunilo cake.