¹ Apa atuletile mo nawa, kuma twalifundishile ci litoolo lithzina lyalyo Maluta. ² Awa ashinda sha litunga katutambulile ko shihemo pohuma, kalo kuma afakalile mulilo noku tutambula twahe mukonda kuma atulokile mvula o muvumbi no kuombola. ³ Unone Paulusi ap acile shitungu sho ikunyi no kushipaka pa mulilo, shipili apa yayuvile muenyemvu oshatundile muikunyi nokulithzingaela ku lyoko lyenji. ⁴ Awa ashinda sha litunga apa amonine liyoka ko likunjoka ku lyoko lyenji, awopo aamba nukaci ko, ''Oyu mukwelume yoshemwa shikevenga oyu nayoishiwa mu liwate, kaloelile kuyoya.'' ⁵ Unone Paulusi po kukumunena liyoka mu mulilo uno kakulukile. ⁶ Kuma atatelelile ci henge atulumana nji kufa. Unone apa amutanekelile shikati shoshile no kumona ci kwithsa shoshimango shikwamahala kukwenji, awopo alula maayalo o nokuamba ci oyu munu nyambi. ⁷ Honi kumbali kuma kwakalile mube ou wakalile wa mukakuendisha elyo litoolo, mukwelume o lithzina lyo Publiusi. Kuma atutambulile ko shihemo no kutuyumbula pa maiwa ahatu. ⁸ Kuma kwakwamahalile ci tata wa Publiusi kuma akolile lihokoma no kutuhuka onyinga. Paulusi apa athzile kukwenji, po lombela, no kumupaka moko, ayepo pola. ⁹ Munyima wei apa yakwamahlile, anu wahe awa akolile apo pa litoolo inga apa keile nawo apoplile. ¹⁰ Anu kalo inga apa atupile lilema no kutulemeka manene. Okutuliloishela kufuula, awopo atupa ei twafotile. ¹¹ Apa kwapitile maonda ahatu atwepo tuingena muwato oshokulu ou wakalile omo mulitoolo kufu yomuhe, wato woku Alexandria, ou wakalile no ''malambi oa thzimu'' paposho. ¹² Apa twashekelile mu mbongi thza Sirakuse, otwekalilemo mayuwa ahatu. ¹³ Kutunda apo twabuhile no kukakuma mumbongi thza Regiumu. Apa kwapile liyuwa lyofoci mupepo oku mboela aopo upepa, ne mumayuwa eli atwepo tukuma ku mbongi thza Puteoli. ¹⁴ Po tukawanako akakulitawa awopo atuisha ci tukakaleno mayuwa mutanu na eli. Hengeya moliyo twakumenine ku Roma. ¹⁵ Akakulitawa oko, apa atuyuvile, awopo atushambawela kunaliwanena netu ku musika woku Apiusi no mumafukau omawalwa ahatu. Paulusi apa amonine akakulitawa, kuma akandelelile kwa Nyambi nepo kala no undume. ¹⁶ Apa twaingenine mu Roma, Paulusi kuma amutawishile kukala yofoci no lishwalale wamunyungile. ¹⁷ Mumanyima o mayuwa ahatu Paulusi ayepo isha akulu o ma Juda ci aliwane pofoci. Apa aliwanine, ayepo wambela, ''Apange, hianga ci kwithsa ei ninepishela anu nji kuipisha ithzo yowa tata wetu, kuma naniendishiwa weci munu li mukamenga kutunda mu Jelusalema no kunanipa mu moko o Maroma. ¹⁸ Apa amanine kuni ipaula, awopo anishiya mukonda kawanine mulandu okunipaela mu shiamba shange. ¹⁹ Unome Majuda apa namba yoku lipilukela mumaayalo o, kuma nathzile kwa Sesare kukabilaela, hianga kali ci kuma nafotile kulundela anu omulitunga lyange no iamba. ²⁰ Mukonda weyo, honi, poliyo apa ninamisha ci nanimimone no kuamba nenu, ninabata eli liwenge lelo mukonda wo kukulupela kwa Isalaele. ²¹ Honi awopo amba kukwenji, ''Kanatutambula man'olo kutunda ku Judea aa amba yoye, hianga apetu wahi nakeya kunatutongwela nji kuamba iamba yoye yoimango. ²² Unone twa fota kuyuva kukwoye ei onaanekela kefundisha yo tumbako, mukonda twalimuka ci yalwishiwa kokuhe kuli munu.'' ²³ Apa apakile liyuwa lyenji, anu owangi awopo akeya kukwenji oku nakalanga. Ayepo ambaula no, ne ayepo pitisha upaki wo ofumu wa Nyambi. Kuma afotile ci ayuvishishe ya Jesu, kutunda ku mulao wa Mushe noku mapolofita, kutateka mashikushiku kukakuma lungulo. ²⁴ Wamweya kuma atawile ei ambile wamweya katawile. ²⁵ Apa akanine kuliyuva awopo ashiya Paulusi kunaamba eli liywi lyofoci: ''Mupepo oukenu kuma wambile shuwana ko Isaya mupolofita kwa tata wenu. ²⁶ Kuma ambile ci, 'Othze kwawa anu okawambele ci, ''Kuyuva henge muyuva, unone kamwakuyuvishisha; kumona henge mumona, unone kamwakumonishisha. ²⁷ Mukonda micima thza awa anu thzina kolopa, no matwi o kayuvu, meho o analithzimenena. Katele amone no meho o, no kuyuva no matwi o, no kuyuvishisha no micima thzo ci kalo apiluke, ne ci niwapolishe.''' ²⁸ Apo honi, mulimuke ci oku kuyoishiwa kwa Nyambi kunakeya kwa anu angana, kalo henge akuyuva.'' ²⁹ Apa amanine kuamba ei inu, Majuda awopo amushiya. Kuma kwakalile muyoyo oshokulu mukaci ko. ³⁰ Paulusi kuma akalile myaka thzili munjiyo thzenji thzokukulanga mali, kalo kuma natambulanga wahe awa nakeyanga kukwenji. ³¹ Kuma naambanga yo ofumu wa Nyambi no kufundisha ya Jesu Kelesite kunaliyala kokupila okumuanukethza.