¹ Omo Yesu na bandogethi bendi betele kumuyei na Yelusalema na kwizha kweta ku Mbetefange, kuli lundu lya Olibeta, cho Yesu watumine bandongethi babali, ² na kwendeka kuli bakebo ngwendi, "Yeni mulimbo likwabo lilikulutwe, mukawana chimulu wakukuta kuzhebele, amolika namunendi. Bathzituleni linga munjinenelebo. ³ Mona woshe owo andeka bili byoshe kupandama kuli ebi, endekele ngweni, 'Shukulu nabatondo,' cho uje munu bwathi bwathi akaba tuma nobe." ⁴ Cho ebi byethzile kwitila mubilinga bizhe bya andekele ka polofita linga byabishulithze. Wendekele ngwendi, ⁵ "Mulekeni mwanawamunakathzi wamu Ziyoni, 'Kenga, Mwene wobe ali nakwizha kuliyobe, Wakuli kehetha cho nalondo a chimulu--na a kana kakandondo ka Chimulu.'" ⁶ Cho bandfongethi baile na kulinga bije byabalekethele Yesu kulinga. ⁷ Banenele Chimulu namunendi nakwaka buthzalo byabo a myongo yabo, na Yesu watumbamene a kanwa yabithzalo. ⁸ Mbunga yabanu babengi bazhalele bya kuthzala byabo mungila, nabakwabo bamo batetele minango ya biti na kuizhala mungila. ⁹ Cho bije bimbunga byabanu byatwamene kulutwe lya Yesu nabazhe bamukabangeyeye ba kele naku yambekela, ngwabo, "Mushangathekeni muna Dabiti! Babethzika baje bakezha mulithzina lya Shukulu! Mushangathekeni makama manene!" ¹⁰ Omo Yesu wethzile mu Yelusalema, nganda yoshe yali zhuzhukilile na kwandeka ngwabo, "Iyazho ou?" ¹¹ Cho bimbunga bya banu yakumbulwile ngwabo, "Ou ikeye Yesu kapolofita kutundilila ku Nazaleta mu Ngalileya." ¹² Cho Yesu wakobelele mutembele. Cho waba shekelemo na kubatundithamo bazhe boshe bakele nakulanda na kulandula mutembele, nakumbilumuna mibetha bya bazhe bakele na kulandakana bimbongo nabitumbamo bya baje bakele na kulandetha mayembe. ¹³ Cho wendekele kuli bakebo ngwendi, "Banachithoneka ngwabo, 'Njubo yange ikapwa njubo yamalombelo,' olojo yeni munaipwitha mwela wakubondamo bethzi." ¹⁴ Cho tupuputa na biyanga bethzile kuli ikeye mutembele, cho wabakangwithile. ¹⁵ Oloni omo bakulunu ba bakakulombelela na bakakuthona omo bamwene byuma byakomwetha bije byalingile, cho nawa omo bathzibile banike batambekela muje mutembele na kwandeka ngwabo, "Mushangathekeni Muna Ndabiti," cho bakebo bathzibile matoto manene. ¹⁶ Bendekele kuli ikeye ngwabo, "Mwathzibi ebi bali nakwandeka ndi?" Yesu wendekele kuli bakebo ngwendi, "Eyoo! Oloni kumwabitandele ngwabo, 'Mutunwa twa banike baba ndondo na batumbututu mukatunda kushangatheka'?" ¹⁷ Cho Yesu wabathethzele na kutunda munganda waile ku Mbeteniya kwakalalele. ¹⁸ Cho mutondotondo omo mwelukile kuje kunganda,wathzibile njala. ¹⁹ Wamwene muti wa mukuyu kumukulo wangila, waileko cho kawaneneko nambe kamo kai kabanga maputa lika. Cho wendekele kuli uje mukuyu ngwendi, "Kukakalako nawa bushuka myaka yoshe," ajebene muti wakuyu womine. ²⁰ Omo bandongethi muba chimwene echi, balikomokelele na kwendeka ngwabo, "Batozho ou muti wamukuyu una mubwathi bwathi?" ²¹ Yesu wakumbulwile na kubaleka ngwendi, "Mwabushunga nji mileketha ngwange, mona mwakulaela nakuzheneka kulithindiya, kumukalingi lika ebi byalingiwa kuli ou muti wamukuyu, oloni mukaleka neli lilundu ngweni, 'Bakwambate linga bakakumbile mulishali amema a kalunga,' cho chikaligiwa. ²² Byoshe bimukalomba mumalombo, nakukulaela, cho mukabitambula." ²³ Mo Yesu wakobelele mutembele, cho bakulunu bakama baje bakakulombelela na bakulunu babanu bethzile kuli ikeye muje mwakele nakubalongetha nakwendeka ngwabo, "Nabinthzili muka uli nakupanga ebi byuma, cho nawa iya wakwanene ebi binthzili?" ²⁴ Yesu wabakumbulwile nakubaleka ngwendi, "Nange nawa njikamihula chihula chimo. Mona mujileka, cho nange nawa njikamileka binthzili muka njikapangetha ebi byuma. ²⁵ Kumbwitika kwa Yowano--cha tundile kulisho? Cha tundile mwilu indi kubanu?" Bakele na kuliyongola akati kabo babenya, na kwandeka ngwabo, "Monatukandeka ngwetu, 'Chatundile mwilu,' cho akandeka kuli yetu ngwandi, 'Bika oni mwonene kulaelela muli ikeye?' ²⁶ Oloni ngwe tukandeka ngwetu, 'Chatundile kuli banu,' tukathziba lyoba kumbunga ya banu, mwafwa boshe bamuthzubukila mungila ngwabo Yowano wapwa kapolofita." ²⁷ Cho bamukumbulwile Yesu na kwendeka ngwabo, "Kututhzubuka." Nendi wendekele kuli bakebo ngwendi, "Nameme yange kujikatha kumileketha binthzili muka njilina kulinga ebi byuma. ²⁸ Cho bikajo muthinganyeka? Munalume uje wakele na bana bendi babali banalume. Waile kuli menendi wakulibanga nakumuleka ngwendi, 'Munange, ya ukapange lelo mulihya lya bushuka binyu.' ²⁹ "Cho munendi wamunalume wakumbulwile na kwendeka ngwabo, 'Kunjiiko,' oloni anima lalo watengulwile bithinganyeka byendi cho waile. ³⁰ Ou munalume waile nawa kuli munendi wamuchibali wamunalume nakukamuleketha chuma chimo. Cho wamukumbulwile nakwandeka ngwendi, 'Njiya, mwane, oloni kaileko. ³¹ Iyajo akati ka aba bana babali walingile chithzango chaishabo?" Cho bamukumbulwile na kwendeka ngwabo, "Wakulibanga." Yesu wendekele kuli bakebo ngwendi, "Mwabuthunga njimileketha ngwange, bakakwambata lithimu nabaje baka bupangala bakalibanga kukobela mubumwene bwa njambi thimbu yeni kanda. ³² Omo Yowano wethzile kuli yeni mungila ya bushunga, oloni kumwamukulahelele. Oloni bakakutambula lithimu na bakabupangala bamukulahelele. Oloni yeni, nameme mwamwene ebi, ku mwatengulukile linga mumukulahele. ³³ 'Thzibilileni kuchithmo chikwabo. Kwakele munalume, babenya wachela. Cho watombekele lihya lya binyu, wathitileko chi patanga, wendile chiteke chakukamwinaino binyu, watungile kaposhi, na kuli fwetetha kuli baka kulima binyu. Cho waile muchifuti chikwabo. ³⁴ Omo thimbu yakutezha bushuka yetele, watumine bingamba byendi kuli baka kulima binyu na kutambula bushuka byendi. ³⁵ Oloni baka kulima binyu bakwatele bingamba byendi, bapupileo umo, nakuthsiao mukwabo, na kwashanga namanya mu kwabo. ³⁶ Cho nawa, babenya watumine bingamba bendi bakwabo, kutubakana baje bakulibanga, oloni baje bakakulima binyu babilingile mungila imo. ³⁷ Anima yabije, babenya watumineko munendi wa munalume kuli bakebo, nakwandeka ngwendi, 'Munange baka muthingimika.' ³⁸ "Oloni bakakulima bushuka bwa binyu omo ba mwene munendi wamunalume, bandekele akati kabo babenya ngwabo, 'Ou ikeye thwana. Ijeni, linga tumuthsiye cho tukafungulule bupite boshe.' ³⁹ Cho bamwambatele, bamumbilile kumutunditha muje muhya lya binyu cho bamuthsiyile. ⁴⁰ Cho omo babenya lihya lyabinyu wethzile, bikajo byakalinga kuli baje bakakulima bushuka bwa binyu?" ⁴¹ Bendekele kuli ikeye ngwabo, "Akabathsiya baje bitothzi ba banalume nakubabiyitha mungila yakubiya, cho akana lihya lyendi kuli bakwabo baje bakalimi bushuka bwa binyu, banalume baje bakamwanako mbathzubwila yabushuka buje banalimi athimbu ibaka bitezha." ⁴² Yesu wendekele kuli bakebo ngwendi, "Kumwatandele mubithoneka bya Njambi, 'Limanya lije liba byanene kuli bakakutunga alolo banali banga kupwa limanya lya mumbango. Echi chantundile kuli Shukulu, cho chinapu chakukomowetha mu mesho etundi'? ⁴³ Cho njimileketha ngwange, bumwene bwa Njambi baka minyekabwo na ku bwana kumiyati uje hituhula bushuka bwacho. ⁴⁴ Woshe ou akawa ali eli limanya akapokothoka mubi puka bipuka, oloni woshe owo likathihukila aka tikika." ⁴⁵ Omo bakulunu bakakulombelela naba Faliseo bathzibile echi chithimo, chabalumbunukile ngwabo alinakwandeka ali bakebo. ⁴⁶ Bashakele kumukuta, oloni bathzibile lyoba lya mbunga yabanu, mwafwa banu ba muthzubukile ngwabo wapwa kapolofita.