¹ Ubobo, nubakwesu basalala, numwaabana bwite bwa kwizeulu. Amumutelaike Jeso, mutumwa alimwi mupayizhi mukando ngutushoma. ² Wakashomeka kwa Leza, wezo walo wakamusala, mbubona aze Mozesi mbwaakashomeka mung'anda yoonse yaka Leza. ³ Jeso kakwete bulemu kubaala bwaka Mozesi, kaambo wezo uzaka ing'anda ulikwete bulemu kubaala ing'anda ini. ⁴ Ing'anda yoonse ilazakwa u muntu umwi, pele wezo wakazaka shoonse shintu ngu Leza. ⁵ Mozesi kali musebezhi mushomeshi mung'anda yoonse yaka Leza, uukwete bumboni ku shintu shesho shiya kwaambwa ku chiindi chizhiza. ⁶ Pele Kilisito Mwana mushomeshi wa mung'anda yaka Leza. Uswe ndiswe ba ng'anda yakwe naakuti twatolelela kukwatisha alimwi u bulangizhi bobo mbutulyeensheensha. ⁷ Ubobo, chili mbuli bwaamba Moza Usalala ati: "Bwasunu, naakuti mwateelela izwi lyakwe ⁸ mutazumya myonzo yenu chakukazha, ku chiindi nchiba kasunkwa mulukula. ⁹ Mwalo momo ba shaakale benu mubakapapila u kunsukusha, nibakamana kubona shesho nshindakabachitila ¹⁰ kwa myaka makumi one, Ubobo Ume ndakalemana ku musela welya.Ume ndakaamba ati, 'Lyoonse balizhiminine mukati ka myonzo yabo. Bayina nibakashizhiba inzhila shangu.' ¹¹ Chili ukoya Ume kulipinga mu bukali bwangu: 'Bayina nibaya kunjila mukulyookezha kwangu.''' ¹² Amuchenjele, nubakwesu, kwaamba ati kwiina naaba womwi wenu ukwata monzo mubiyabi uu tashomi, monzo wezo u kuhwa kwa leza upona. ¹³ Pele amulizumye zumye umwi u mweenzhiina a buzuba u buzuba, kufwumbwa kwa kutewa ati "bwasunu," kwaamba ati kutabi naaba womwi akati kenu uu kazuminwa kwiita mukuchengwa ku chibi. ¹⁴ Bolya mbu twayanana u Kilisito naakuti twakwatisha mu lushomo lwesu mwakwe kuhwa ku matalikilo kushikila kumamanino. ¹⁵ Kuli chechi chakaambwa ati, "Bwasunu, naakuti mwateelela izwi lyakwe bwasunu, mutazumya myonzo yenu, ukoya mbubakampapila mulukula." ¹⁶ Mbubani babo bakamuteelela Leza alimwi u kumupapila? Saa tabali babo bakahwa ku Ijipiti mbakasolelela Mozesi? ¹⁷ Babo mbaakalemanina kwa myaka makumi one? Saa tabali babo bakachita chibi, babo bakafwa bali mitunta yakashaala mulukula? ¹⁸ Saa nkukuli bani nkwaakalipinga kwaamba ati tabakanjili mukulyookezha kwakwe, naakuti ka kutali kuli babo balo batakamuchilila? ¹⁹ Twabona ninzho kwaamba ati kabatalozha kunjila mukulyookezha kwakwe u kaambo ka kutashoma.