¹ U bobo tulyelele kubikila muzeezo u baala kuli checho nchitwakateelela, kwaamba ati tutabi nitukuhwa kuli nchicho. ² Naakuti mulumbe wezo wakakananwa kwiita mu baangelo wahwuminwa kuba wa lushinizho, u babo boonse batakaateelela u kwaahwumina balakatambula chisubulo cheelele, ³ iinzho mbubuti mbutuya kuchileya chibebyo twatabikila muzeezo ku lufwutuko lukando? Lolu ndufwutuko lolo lwalo lwakakambaukwa u Mwami kuli uswe alimwi kwaamba ingawo meni meni kuli babo bakaateelela. ⁴ A chiindi checho nchichona Leza wakapa bumboni kutwaambo totu ntutona kwiita mu shitondezho, shizoosha, alimwi u maleele a shiyene shiyene, alimwi u kwaabanya shipo sha moza usalala kwiingayina u luzando lwakwe. ⁵ Kaambo tabali baangelo Leza mbaayakupa luundu luzhiza, ku lolo ndutwaamba. ⁶ Pele umwi muntu kumwi kuluya wakapa bumboni, wakaamba ati, "Anu muntu nguni kwako, wezo nguukwabilila muntu bulyo? Naa mwana a muntu, wezo nguukwabilila? ⁷ Wakamupanga muntu u kumuchesha kubaala baangelo; pele wakamusumpula u bulemu alimwi u kumulemeka. ⁸ Wakabika shoonse shintu kunshi ku matende akwe." U kuti kwakwe Leza ngwaakapa shintu shoonse. Kwiina chintu nchaakashiya kutapa mu matashi. Pele ninzho kwiina u nchitubona kwaamba shili mu matashi akwe. ⁹ Pele twakamubona wezo wakacheshewa u kuzholwa anshi kubaala baangelo kwa kaindi bulyo kashoonto, Jeso, wakasumpulwa u bulemu u kulemekwa u kaambo ka mapenzhi alimwi u lufwu lwakwe, kwaamba kwiita mu luse lwaka Leza afwile muntu woonse. ¹⁰ Kachili cheelelo kwa Leza, kaambo shoonse shintu shakalengelwa nguwe alimwi kwiita mwakwe, kwaamba alete bana banji banji ku bulemu. Chakeelela nkwabele kwaamba abike wakachibamba ku lufwutuko lwabo lumaninina kwiita mu mapenzhi akwe. ¹¹ Kaambo wezo walo usalazha alimwi u babo basalazhiwa balahwa kuntu komwi. U bobo tabausa insoni kubeta ati mba bunina. ¹² Ulaamba ati, "Ndakaambilizha inzhina lyako ku bakwesu, ndakakutembaula akati kabashomi." ¹³ Alimwi ulaamba ati, " ndakabika lushomo mwakwe." Alimwi ulaamba ati, "Bona, ndili ano alimwi u bana babo mbaakampa Leza." ¹⁴ U bobo, mbubali ati bana balaabana mu mubili alimwi u mu bulowa, wakashaabanya shintu shoonse munzhila yomwi, kwaamba ati kwiita mu lufwu kwaamba alozhe kuzonauna wezo walo ukwete insana sha lufwu, wezo ngu, shatani. ¹⁵ Chechi chakaba bobo kwaamba ati alozhe kunununa babo boonse balo kwiita mukutiya lufwu bakapona bumi bwabo mu buzhike. ¹⁶ Chini chini tabali baangelo mbaayohwa pe, pele ba luhubo lwaka Abulahamu. ¹⁷ U bobo chakeelela lwakwe kukozhana u banina munzhila shoonse, kwaamba ati abe shiluse alimwi mupayizhi mukando mushomeshi mu twaambo twa shintu shaka Leza, alimwi kwaamba ati abe shimuzhima akati wa shibi sha bantu. ¹⁸ U bobo Jeso lwakwe mwini wakapenga alimwi wakasukushiwa, ulalozha kuyohwa babo balo basukushiwa.