¹ Inzho mulombwana wa mushobo wa chi Levi wakatwala mukaintu wa chi Levi. ² Wezu mukaintu wakamita amane wakazhala mwana mweembezhi. Awo naakabona kwaamba ati mwana kali mubotu, wakamusoseka kwa myezhi yotatwe. ³ Pele naakabona kwaamba ati ninzho talozha linji kumusoseka, wakabweza chinzuma chakalukwa u mabu amane wakachibumba u bunhwuka. Amane wakamubika mo mwana waya kuchibika akati ka mabu mu meenzhi kumbali ku lweenje. ⁴ Mukando wakwe mukaintu wakaakuzhimine alaale kubona chikozha kuchitika nkwaabele. ⁵ Inzho mwanakwe Falawo wakaya kuya kusamba ku lweenje u mbaakuyaabo bashikumulangilizha kabaya bweendeenda kumbali ku lweenje. Wakabona chinzuma akati ka mabu amane wakatuma umwi wa babo kuya kuchibweza. ⁶ Naakachiyalula, wakamubona mwana. Wakazoowa, mwana wakaakulila. Wezu mushimbi wakeetezhiwa amane wakaamba ati "Wezu mwana nkukuti ulyeelele kuba wachi Hebulu." ⁷ Inzho munina mukando wa mushimbi wezo wakaamba ku mwanakwe Falawo ati, "Saa nje nkakulangile mukaintu wachi Hebulu kwaamba akulelele mwana wezu?" ⁸ Mwanakwe Falawo wakaamba kwakwe ati, "koya." Inzho wezu mwana mushimbi wakaya kuleta nguwena baina mwana. ⁹ Inzho mwanakwe Falawo wakaamba kwa bayina mwana ati, "Mubweze wezu mwana u kandelele kabotu, ndakakupa bulumbu ku mulimo wezu." Inzho mukaintu wezu wakamubweza mwana waya kumulela. ¹⁰ Naakakomena mwana, wakamutola ku mwanakwe Falawo, amane wakaba mwanakwe. Wakamuulika inzhina lya Mozesi waamba ati , "Kaambo ndakamukusha mu meenzhi." ¹¹ Inzho lelyo Mozesi naakakomena, wakaya kuswaya bantu ba mushobo wakwe kuya kubona mbubakaakusebezhiwa milimo mizumu. Wakabona muna Ijipiti ulauma umwi wachi Hebulu, uumwi wa bantu bakwe mwini. ¹² Wakalanga langa koku ukoku, naakabona kwaamba ati kakwiina naaba womwi wakaakuliko, wakamuyaya muna Ijipiti amane wakoozhika mubili wakwe mu musenga. ¹³ Nibwakacha wakabweela ko, alimwi, inzho, balombwana bobile bachi Hebulu bakaakulwa. Wakaamba kuli wezo wakaakulubizhizhe ati, "Kaambooyi ulauma mweenzhinoko?" ¹⁴ Pele wezo mulombwana wakaamba ati, "Nguni wakakubika kuba musololi alimwi u mubeteshi wesu? Saa ulazanda kunjaya mbubona mbuwakayaya welya muna Ijipiti?" Inzho Mosezi wakafwa bukandu amane wakaamba ati, "Nkukuti nchindakachita chazhibwa ku bantu." ¹⁵ Inzho Falawo naakaateelela aza, wakakanza kumuyaya Mozesi. Pele Mozesi wakaloboka kuhwa kwa Falawo waya kukala munshi ya Midiyani. Ashike wakakala kufwaafwi u mukalo. ¹⁶ Inzho mupayizhi wa Midiyani kakwete bana bashimbi bali chiloba. Bakashika, bateka meenzhi, bakazuzha shinwino sha butanga bwaka ushabo. ¹⁷ Inzho beembezhi bamwi bakazhiza ku batanda, pele Mozesi wakaya kubahwuna bashimbi babo. Amane wakabanwishizha butanga bwabo. ¹⁸ Inzho bashimbi nibakabweela kwa ushabo Luweli, wakaamba ati, "Kaambooyi mwazhoka kufwambaana bwasunu?" ¹⁹ Bakaamba ati, "Umwi muntu muna Ijipiti watuhwuna ku beembezhi. Watutekela u meenzhi amane watunwishizha u butanga bwesu." ²⁰ Wakaamba ku banakwe ati, "No ulikwi? Mwamushiilaayi wezu mulombwana? Amumwite azhize alye tulye chakulya. ²¹ Mozesi wakahwumina kukala u wezu mulombwana, wezo walo wakamupa mwanakwe wezhina lya Zipola kwaamba ati atwale. ²² Wakazhala mwana mweembezhi, amane Mozesi wakamuulika inzhina lya Geshomu; waamba ati, "Ume ndi mweenzu munshi ya beni." ²³ Nikwakayita chiindi chili mbuchibele, mwami waku Ijipiti wakafwa. Alimwi bantu ba Izilaili bakalilauka u kaambo ka busebezhi bwa buzhike. Bakalila kuzanda kuyohwiwa, ako kulila kwabo Leza wakakuteelela u kaambo ka mapenzhi abo. ²⁴ Lelyo Leza naakateelela kutongela kwabo, Leza wakazhibaluka chihwuminano nchaakabika u Abulahamu, Ayizeki, alimwi u Jakobo. ²⁵ Leza wakababona bantu ba Izilaili, amane wakabazhiminina ku mapenzhi abo.