¹ Ngaaza mazhina a banakwe Izilaili bakaya ku Ijipiti antoomwi u Jakobo, umwi uumwi u mukwashi wakwe: ² Lubeni, Simiyoni, Levi, u Juda, ³ Isaka, Zebulani, u Benjamini, ⁴ Dani, Nafitali, Gadi, u Asha. ⁵ Bantu boonse bakaakuli ba luhubo lwaka Jakobo kabali makumi chiloba. Jozefu kali kale mu Ijipiti. ⁶ Inzho Jozefu, u banina boonse, alimwi u mazhalane woonse bakafwa. ⁷ Pele bantu Ba Izilaili bakazhalana chini chini, bakahwuzhanya mu mweelwe, bakaba bashinsana, alimwi bakaba, insana shinji shinji; inshi yoonse bakeezuzha. ⁸ Kumane bobo kwakaba mwami umwi mu Ijipiti, wezo walo watakaakumwizhi Jozefu. ⁹ Wakaamba ku bantu ati, "Amulange, baba bantu ba Izilaili bahwulisha alimwi baba bashinsana kutubaala. ¹⁰ Amuzhize kono, atubasubule cha busongo, twatachita bobo balaakuchiya buhwula ku mweelwe wabo, amana kwabuka inkondo, balaba nibasangana u bashinkondo nokwesu, kwaamba batulwishe, bamana balukanke inshi beeshiye." ¹¹ Inzho bakababikila bashikubapezha u kubapa milimo milemu. Ba Izilaili bakamuzakila Falawo shizobwelo mu minzhi mikando: ya Pitomu u Lamesesi. ¹² Pele nikuba kuti ba Ijipiti bakaakubafwundilizha ku milimo mizumu, ba Izilaili bakabaazha kuhwula ku mweelwe alimwi u kuzandaala. U bobo bantu ba Ijipiti bakatalika kubatiya chini chini bantu ba Izilaili. ¹³ Ba Ijipiti bakabashinikizha cha lunsunsu bantu ba Izilaili kusebeza. ¹⁴ Alimwi bakabazuminya bumi ku milimo mizumu ya kubweza bulongo u tutina, alimwi kabasebeza kufwumbwa mulimo mu myuunda. Kufwumbwa mulimo ngubazanda kababasebezha cha lunsunsu. ¹⁵ Inzho mwami wa Ijipiti wakaambila bakaintu bachi Hebulu baakakutumbusha; inzhina lya umwi kali Shifila, alimwi umwi kali Puwa. ¹⁶ Wakaamba ati, "mwaakutumbusha bakaintu bachi Hebulu, kamulangisha baakutumbuka. Naakuti mwana mweembezhi, mulyeelele kumuyaya; pele naakuti mwana mushimbi, mutamuyaya." ¹⁷ Pele bashikutumbusha bakaakumutiya Leza bayina nibakachita mbwaakabaambila mwami wa Ijipiti; ubobo bakaakubaleka bana beembezhi kabatabayaya. ¹⁸ Inzho mwami wa Ijipiti wakaboompolola bashikutumbusha amane wabeta ati, "Kaambooyi mwachita chechi, mwabaleka bana beembezhi kupona?" ¹⁹ Bashikutumbusha bakamwiingula Falawo ati, "Bakaintu bachi Hebulu tabali ukoya bakaintu ba Ijipiti. Tabapengi a kutumbuka pe tulayana batumbuka kale shikutumbusha katana kushika." ²⁰ Leza wakabakwabilila baba bashikutumbusha. Bantu bakahwula ku mweelwe alimwi bakaba bashinsana. ²¹ Kaambo kakuti bashikutumbusha kabamutiya Leza, wakabapa bana banji banji. ²² Falawo wakalailila bantu bakwe boonse ati, "Kamubasowa bana boonse beembezhi bazhalwa mu lweenge, pele bana bashimbi kamubaleka bapone."