¹ "Vana va nana na tata, halakanenu ku vuhako vuange vunji ku miambuluila vuovuno." ² Kaha omo civunga va vuile ngecize Paulu ua handekele navo kulilimi lia Hevelu, va hianene ku holoka, kaha ngueni, ³ Änge njika Yundeya, ua ku semua ku Talususi mu Silisia, vunoni njakolele mu nganda eyi, ku viliato via Ngamaliele. Nja lilongesele na ku kolesa cikuma ku vilika via mezi alisiko ava tata. Nja zangamene omo Njambi, ngue yenu vose naua ku litangua lia lelo. ⁴ Kaha nja yandesele njila ei naku kutsa, mukukuata na ku soka mu kamenga va mala na vampuevo, ⁵ Mukemuo sasendote ua kama ahasa ku nji ambulula vukaleha na mpunga yose ya vakuluntu. kuli vakevo naua nja tambula mikanda ya kuli vamuanetu kaha nja ile ku Ndamasiku, mu ku neha ku Yelusalema vaze vakele oko mu mikole mukuva yandesa. ⁶ Kaha ca lingile ngecize omo njendele vungendzi kaha nja suenene ku hiehi na Ndamasiku, ngue ha kati kati tangua vuasi- vuasi ceke ca kama ca muilu ca nji tuililile na kunji zingilika. ⁷ Kaha nja uile hamavu kaha nja vuile lizi ku handeka nange nguavo, Saulu, Saulu, vikandzo viu kunji yandesela?' ⁸ Kaha nja kuaneneko , nguenge, yoveya, muangana?'Kaha ikeye ua handekele nange, 'Yange Yesu uaku Nazaleta,uze yuku yandesa.' ⁹ Navaze vakele nange cili vene va muene ceke vunoni lizi lia uze ua handekele nange. ¹⁰ Kaha nja handekele, nji kalinga vika, muangana?'Kaha muangana ua njilekele ngueni, "Hinduka kovela mu Ndamasiku. Kaha kuze vaka kuleka viuma viose viva naku tumbuila ku linga.' ¹¹ Kaha omo ange ka nja hasele kumona omo vumpahu vua ceke cize, kaha va kele nange vanji tualele ku mavoko avaze nja kelenavo, njezile mu Ndamasiku. ¹² Kaha tu liuanene na yala ua lisina Ananiya, mukua ku lemesa kueseka nazisimbi kaha vahande na va Yundeya vaze vakele muze. ¹³ Uezile kuli ange, kaha ua mene kumo nange, ua nji lekele, muanetu Saulu, tambula ku mona. 'kaha ku ndzimbu ize vene nja mutalele. ¹⁴ Kaha ikeye ua handekele ngueni, Njambi ya vakukuetu naku tumbula ku tantekeya cizango ceni, na ku mona uze mukua vuviuke, na kuivua lizi lia kufuma ku kanua keni. ¹⁵ Muomuo u kakola mukaleho ueni kuli vamala vose va viuma evi viu na mono na kuivua. ¹⁶ Kaha vuovuno vika uku tumamena? Katuka, na ku limbatiza, na ku litanesa ku vipi viove, mu ku tambeka ku lizina lieni.' ¹⁷ Kaha hanima ngecize omo nja hilukile ku Yelusalema, omo nja vundilile mu tembele, ja himpukile mueka. ¹⁸ Kaha nja mu muene kuhandeka nange, zangula fuma vuasi ku Yelusalema viasi, muomuo kava katambula vukaleho vuove omo yange.' ¹⁹ Kaha nja handekele, muangana, va kevo vavene va tantekeye ngecize nja hakele mutolongo na ku veta vaze va tsiliale muliove mu visinangonga. ²⁰ Kaha omo va muaniene maninga a setefanu muka leho uavo ange nja meneka, naku tava naku niunga vuzalo vua vaze va mutsiluile.' ²¹ Kaha ikeye ua njilekele ngueni, fumako muomo njika kutuma kulako na kuno kuli vakua vifuti." ²² Kaha va mu halakanene na ku li eli, kaha va kolesele mezi avo naku handeka nguavo, "Tsihenu ou ua ngecize a fume hamavu, kaci kutava ayoye." ²³ Kaha omo va tambakele, va zulile vuzalo vuavo, vaasele lukunga kuilu, ²⁴ kapitau ua kama ua sikile Paulu vamu nehe mu mbonge. Va sikile ngecize vamu hulise na kumu veta, linga a tantekeye vikandzo va mu tambekielele nge cize. ²⁵ KAha omo vana mukutu na mikole, Paulu ua handekele na kapitau uze ua mene kuze, "ngueni citava enu ku veta makotemuntu mukua Loma uze intsa kanda va sompela mulonga ni?" ²⁶ Kaha omo kapitau ua civuile, uaile kuli kapitau ua kama na kumuleka ngueni, "ukuhianga kulinga vika? muomuo yala ou ikeye mukua Loma." ²⁷ Kaha kapitau ua kama uezile ua handekele kuli ikeye, "Njileke, ove umu kua Loma ni?" Paulu ngueni, Eua." ²⁸ Kaha kapitau ua kama uakua nieneko ngueni, "Nja tambuile vundambo ovuo na ndando ya kama ya zimbongo vunoni ange nji mukua Cisemua."Kaha Paulu ua handekele ngueni, nja semukila mu Loma mukua Cisemua." ²⁹ Kaha va mala vakele na ku muihindzola va mufumine. Kapitau ua kama naua ua vuile vuoma, omo ua ndzivile ngecize Paulu mukua cisemua ca Loma, nomo namu kutile. ³⁰ Vunoni halakaca kaha kapitau ua kama omo ua hingele ku ndziva mua vusunga va Yundeya, mulonga uka vamu tumbuilile Paulu. Ua mu zituile kaha ua sikile vakuluntu va vasasendote na mpunga yose ku kunguluka. Kaha ua nehele Paulu na kumu tumbika ku meso avo.