¹ Unone kuakele yala umo mumbaka ya Siliya, lizina lieni Koloneluu, akele kapitau vama sualale vavuuka nguavo vakuitali. ² Akele yala uakusungama, umua evuile uoma Njambi na vose vamundzivo, ua hanene ma uana a engi ku vantu, na kulomba kuli Njambi liose ³ Haku heta musimbu ya tutanu natu uana yali tangua, a muesese comona na kangelo ua Njambi ezile kuli ikeye. Kangelo ahandekele kuli ikeye mgueni, "kolone luu!" ⁴ Koloneluu atalele kangengelo kaha evuile uoma cikuma naku handeka ngueni, " Vika zo, muangana?" Kangelo ahandekele kuli ikeye, milombelo yove caca uana cove cinayihelu ngue kuanuka vatsa milabu kumeso a Njambi. ⁵ Kaha tuma vamala ku mbaka ya Yopa va nehe yala ualizina lia Simone ou evekusana nguavo Petulu. ⁶ Ekutumama na mukaku konga vilambu lizina liene Simone, ndzivo yeni ili kuhiehina cisali." ⁷ Omu alingile kangelo ahandekele neni namuseza, Koloneluu asanene vangamba zuine vavali vamu ndzivo na lisualale umo kufuma hakati kavaze vamu zatelelele ikeye. ⁸ Koloneluu avalekele vose vize vuasolokele na kuvatuma kuli Yopa. ⁹ Sikaho omu ya hetele halitangua likuavo hasimbu ya citanu na kamo, omu vakele haungindzi hava kuheta kuhehi na mbaka, Petulu ayile helu lia ndzivona kulomba. ¹⁰ Avuile ndzala kaha atandele kuliako vimo, olozo tsimbu vantu vakele nakutelezieka vuakulia, vamuhiele cimueno. ¹¹ Sikaho amuene muilu mua sokolokele kaha cuma cakupua ngi cindunda ca sikumukile, cuma cino casolokele nge citaavu cezile hano hamavu, ca sulukile na zimbango ziazuo ziuana. ¹² Muli cikeko muakele yose miyati yatusitu va mikono iuana na vuuma vize vuikuhalala hamavu, na tuzila va muilu. ¹³ Sikaho vahandekele kuli ikeye nalizi, " katuka, Petulu, tsiha nakulia." ¹⁴ Unone Petulu ahandekele ngueni, " keti mukeko, muangana; kanda njiliaho vilivuose vuakuhona kuzilika naku-zuala." ¹⁵ Olozo lizi liezile kuli ikeye ceka naua kamu civali. "Cize cana vuukisa Njambi, ketsi ucambe ngova cangoco." ¹⁶ Eci casolokele kamucitatu; sikaho cindundu va cimbatele hazevene na kucihiluisa muilu. ¹⁷ Tsimbu Petulu a kele mucitanga cacimona cize amuene calumbununa, zangama, vamala vavatumine kuli koloneluu vamene kuhiehi na mbelo, omo valingile vahulisa njila yakuya kundzivo. ¹⁸ Va tambakanene na kuhulisa nge Simone, ou veku sana nguavo Petulu, atamama kuze ¹⁹ Tsimbu Petulu akele nakusinganyeka vua cimueno, muzimu ua handekele kuli ikeye, "Zangama, vamala vatatu vana kukutonda ove. ²⁰ Katuka sikumuka uye navo hamue. Keti ulinge zimpata hakuya navo, momo yange njavatumu." ²¹ Sikaho Petulu iyile kuli vamala na kuhandeka ngueni, "yange uno muetondele. Munezila vika?" ²² Va handekele nguavo, "kapitau ua lizina lia Koloneluu, yala ua koloka umo uze ekuivua Njambi uoma, kaha ekuhandeka muacili kuma futi ose amu Yundeya, va muhele mezi kufuma kuli Njambi na eze kundzivo yeni, mangane evuilile ku afuma kuli ikeye." ²³ Sikaho Petulu avakambele veza na kutumama hamue. Omu kuacele a hindukile na kuya navo hamue, na vamue vandumbweni vamala vakufuma ku Yopa vali futuile neni. ²⁴ Litangua liakavangeyeleho vezile ku Siliya. Koloneluu akele na kumu vandamina; asanene hama vantanga zieni nama sepa zieni. ²⁵ Casoleke muze mualingile Petulu engile, Koloneluu aliuanene neni kaha alahukele kuma uuli eni nakulifukula. ²⁶ Olozo Petulu amu kuasele kumu katula, ngueni, "Katuka! Nange naua njiyala" ²⁷ Tsimbu Petulu akele na kuhandeka na yikeya, engilile mukati kaha auanene vantu vavengi vakunguluka hamo. ²⁸ A handekele kuli vakeko ngueni, "yenu vavene muaziva nguenu kacatavesele kayundeya uayala ku lipandama cipue kutala vanyamuiza. Unoni Njambi na soliesa nge keti uakuzilika cipue uakuzuala. ²⁹ Ha kekovene njinezile cakuhona zimpata omu vana njitumine. Sikaho njina kuhulisove vika uanjitumene." ³⁰ Koloneluu ahandekele ngueni, "Matangua auana ana hitimo ha simbu vene ino, njakele na kulomba ha simbu ya citanu na cimuana mundzivo yange; Kumona, yala amene kuliange mucizalo ciuka. ³¹ A handekele ngueni. Koloneluu, kulomba cove Njambi na civuu, na cauana cove cina velula Njambi ha liove. ³² Sikaho, tuma umo kuli Yopa , nakusana yala kuliove ualizina lia Simone ou veku saneka nguavo Petulu. A na kutumama mundzivo ya mu kakukonga vilambu ua lizina lia Simone, kuhiehi na cisali! Sikaho vose hamo njamitumu. Ua telelele kuiza. ³³ Sikaho vose tuli hamo hano ku meso a Njambi tuivue vuose vize vanamilekele kuli muangana kuhandeka. ³⁴ Sikaho Petulu asokoluele kanua keni naku handeka ngueni, " usunga njatsiliele nguange Njambi kesi na Zimpata. ³⁵ Ngece, mumafuti ose uo akamuivua uoma na kulinga vuakoloka vanamutavesa kuli ikeye. ³⁶ Uneziva mezi aze atumine ku vantu va ku Isalela, omo muatambakanene muzimbu ua cili ua kahunda kuhitila muli Yesu kulishitu, ikeye muangana ua vose- ³⁷ Yenu vavene mueziva vuuma vuasolokele, evi vua soloke kose kuva Yundeya, aputukile mu Ngalileya, simbu yakuvavatesa, cize Yoano atambakanene; ³⁸ Evi vuasolokele kuli Yesu ua ku Nazaleta, omu Njambi ua mu vuavesele na muzimu uakulela na zitsili. Iyile nakulinga vuacili na ku yoyesa vose vaze vakele na santana, muomuo Njambi akele nayikeye. ³⁹ Tuli mahako va vuuma vuose Yesu alingile, kose ku lifuti lia Yuleya na ku Yelusalema. Va mutsihile na kumusukika haciti, ⁴⁰ Olozo Njambi ua mu sanguile hali tangua lia mucitatu na kumulingisa vamumone. ⁴¹ Kesi kuvantu vose, unoni kuli mahako vaze va sakuile kuli Njambi yetu tua lileneni na kunua neni hamue kufuma haku sanguka kuvatsi. ⁴² Vatulekele kuambulula ku vantu na kuitavesa nguetu ou ikeye umo uze vasakula kuli Njambi ku tumama mukaku sompesa vamono na vakutsa. ⁴³ Cili kuli ikeye ngueni vose vatu polofeto vatavele sikaho vose ukatsiliela muli ikeye vakatambula lukonekelo kukitila mulizina lieni." ⁴⁴ Omu Petulu acili nakuhandeka evi vuuma, muzimu uakulela ua lahukile ha vose vaze vakele na kuivuilila ku mezi eni. ⁴⁵ Vantu vaze vapandemene kuli cihanda ca vakakuya kumukanda vakakutsiliela- vose vaze vezile na Petulu va komokelele, muomuo uana ua muzimu uakulela va utilile hali va Ngetila. ⁴⁶ Omu vene vevuile evi va Ngetila va handekele muma limi akuavo kulemesa Njambi. Unone Petulu akumbuluile, ⁴⁷ "Iya akukanesa mema kuliava vantu mangana vahone kuva zimika ava vantu vanatambula muzimu uakulela nge yetu?" ⁴⁸ Sikaho ava lekele kuva zimika mulizina lia Yesu kulishitu. Ngoco vamuhulisile vatumame hamo matangua a engi.