¹ PAulu, kapositolo ua kilisitu Yesu ou lulavelelo lueto, ² kuli Timoteo, muanange ua vusunga mu lutsilielo: Likozi, cikeketima, na ciyulo via kufuma kuli Njambi tata na kilisitu Yesu muangana uetu. ³ Ngue munjaku lekee kulinga omu munja katukile ha kuya ku Masendonia, tumamu lika nu Efeso linga usike vantu vamo kati va longese luhande lueka. ⁴ Amba kuivuilila ku visimo navikota viamazimo. Evi vie kuneha lika zimpata kuhiana kupangesa vipanga via Njambi, evi vili mulutsilielo. ⁵ Sikaha kulumbununa cia lusiko ikeko cilemo cia kufuma ku mutima ua kulela, kufuma kuvisinganieka via kuviuka, na kufuma ku lutsilielo lua kasisi. ⁶ Vantu vamo va naluluka kufuma ku viuma evi na kualu lulukila ku zimpande ziangocio. ⁷ Vahianga kupua valongesi va zisimbi, vunoni ka veku tantekeya vize vivali na kuhandeka amba evi vivekutumbula. ⁸ Vunoni tuna tantekeya nguetu zisimbi zina viuka nga uze azi pangesa azipangesa muze mu ziaya. ⁹ Tuna tantekeya eci, ngecize zisimbi kavazi hakelele muntu uze mu kuavu viuke, vunono vaze vakua ku pihisa nava kualisino, na vantu kavesi na Njambi nava kua kuhengesa, na kua kuzela kulela na vantu va kua vungocio, na vaze va tsiha va iseavo na vana yavo, nava kua kutsiha vantu, ¹⁰ nava kua vupangala, navaze vakua vudei, nava kua ku makuli nava kua vukaleho vua makuli, na nkala viuma kaviali fuile na vulongesi vua kuviuka. ¹¹ Ngue kueseka namezi a zimpande zia cili zia vumpau vua Njambi ou uaku vezikisa ouvene muli ikeye muvananji kundikile. ¹² Njina mu santsela kilisitu Yesu muangana uetu. Na njita kamesele, muomu nanji singaniekele ngecize njina tsiliela, kaha ua njivvuasele mu kupanga. ¹³ Te yange mukua ku sahula, mu kua kuyandesa, na yala mu kua kuvuvulumuna. Vunoni njina tambuile cikeketima muomu njina vipangelele kundzimba hakuhona kutsiliela. ¹⁴ Kaha likozi lia muangana lia sulile hamona lutsilielo na cilemo eci cili muli kilisitu Yesu. ¹⁵ Mazi aa avusunga anapande kuatava, ngecize kilisitu Yesu uezile mumavu muku kulava kua indzi. Ange yange ua kuhiana muli ava. ¹⁶ Vunoni omuo eci ua njihele cikeketima, mangana a solole kusipa ciose, ualingile eci mangana cipue cimueso kuli vaze vaku tsiliela kuli ikeye omu muomuo kaue kuhua. ¹⁷ Sikaho kuli muangana ua miaka yaya ye-e, ou kesi na vutsi kavahasa kumona,ou ikeye lika Njambi, kuli ikeye kuvkale kavumbi na vumpau kumiaka yaya ye-e. Ameni. ¹⁸ Njili na kuhaka lusimbi olu kuli ove, Timoteo, muanange, ngue navupolofeto vuze valingile kunima kuvuluka ove, ngecize uhasa kuasa ndzita ya cili, ¹⁹ ku kuata kulutsilielo naku ku visinganieka via cili. Muku viana evi, vamo va na vombesa lutsilielo luavo. ²⁰ Ava vamo vakevo Hemeneu na Alisandele, ava vanjna kundika kuli satana mangana vavalongese kati va sahule.