¹ Amuleke luyando ulwabunyina luzumanane. ² Mutalubi bukwelelezhyi bwabweenda nzhyila. Nkaambo kwiinda muli ceeci, bamwi bakakwelelezhya ba angele kakunyina kuzhyiba. ³ Amwiibaluke baange mbuli kuti mwakaangwa ambabo. Amwiibaluke aabo batundululwa icakulinhvwa mbuli kuti ndimwe mbabo mumubili. ⁴ Amubambe lutwalo kuti lukwate bulemu aboonse, alimwi mubambe bulo bwalutwalano mukusalala, nkaambo Leza uyakubeteka bantu bahinkwela abahimamambe. ⁵ Kulilemeka kwako akwaanguluke kuhvwa kuluyandihyo ulwa mali. Amukkutile kuzhyintu nzhyomukwete, nkaambo Leza mwini wakati, "kunyina niyakumuhiya nolike, nokuba kumutakata." ⁶ Atukkutile kutewa tukabe aabukozu ubwakwaamba kuti, "Mwami ngo mungwahi wangu; nhyikayoowi pe. Hena inga muntu wacita nzhyi kuli ndime?" ⁷ Amubalanganye basololi benu, aabo bakaambaula izwi lya Leza kuli ndimwe, amulanganye michelo ya kulilemeka kwabo. Amutobelezhye luhyomo lwabo. ⁸ Jesu klisto ulikozhyene ubwazona, bwasunu alimwi akutamani. ⁹ Mutakwelelezhyewi kuhvwa kwiinda munjiihyo zhyaandeene zhyeenzu. Nkaambo ncibotu kuti moyo welele kuyumizhyiwa aluse, kutali aazhyakulya zhyalo izhyitayohvwi baabo balo beenda aambabo. ¹⁰ Tulikwete cipaililo calo aabo babelekela mutabanikele mobanyina nsana zhyakulya. ¹¹ Nkaambo bulowa bwabanyama ibajailwa zhyinyonyoono bulaletwa abapaizhyi bapati mubusena busetekene, kakuli mibili yabo ilazhyikkwa ansengwe lyankambe. ¹² Mboobo Jesu awalo mbwaakapenga ansengwe amulyango wamunzhyi, kutewa a salazhye bantu kwiinda mubulowa bwakwe mwini. ¹³ Atuunke aboobo kuli nguwe ansengwe ankambe, katutambwile masampu ngakakoma. ¹⁴ Nkaambo tatukwete munzhyi uukkalilila aano. Pele, tulangila yooyo uuciboola. ¹⁵ Kwiinda mulinguwe, nkokuti, atupe lyoonse zhyituulo zhyakutembaula Leza, kutembaula njemichelo iyamilomo iilemekezhya zhyina lyakwe. ¹⁶ Tutalubi kucita zhyibotu akwaabana, nkaambo muzhyituuzhyo eezhyi Leza ulakkomana maningi. ¹⁷ Amutobele akulibombya kubasololi benu, mukuti balalanga lyoonse myuuya yenu mbuli bayakupa bumboni. Amutobele kucita kuti beendelezhyi bakucite ooku mukukondwa, kutali kutongauka, calo cikonzhya kuba cabuyo kuli ndimwe. ¹⁸ Amutupailile, nkaambo tuli zulilwe kuti tukwete miyeeyo mibotu akulombozhya kupona kabotu muzhyintu zhyoonse. ¹⁹ Ndamuyumyayumya kwiindilila kucita oobu, kutewa nkapiluke kuli ndimwe icakuhwambaana. ²⁰ Ono Leza waluumuno, wakaleta kuhvwa kubahwu mweembezhyi wambelele mukando, Mwami wesu Jesu, abulowa ubwacihvwuminano citamani, ²¹ amupe zhyoonse zhyibotu zhyakucitizhya luyando lwakwe, kabeleka muli ndiswe eeco icikkomanihya nguwe, kwiinda muli Jesu Klisto, kulinguwe akube bulemu kukabe kutamani akutami. Amen. ²² Ono ndamukulwaizhya, bakwesu, kukwatilila aizwi lyakukulwaizhya eelyo ndindakamulembela mubuhwaahwi. ²³ Amuzhyibe kuti mukwesu Timothy wakalekezhyewa, walo anguwe ndakaboola kumubona naa ahyike cakubinda. ²⁴ Mubaanzhye basololi benu boonse abantu boonse abasalala abaka Leza. Aabo bahvwa ku Italy balamwaanzhya. ²⁵ Luzhyalo alube aamwebo noonse.