¹ Mpoona mazeulu alimwi anyika hzyakamanihiwa, alimwi ahipona zhyoonse eehzyo zhyakazhyizuhzya. ² Muzuba bwa ciloba Leza wakahika kumamanino a mulimo wakwe ngwaakacita, alimwi muli kaako wakalyookehya mubuzuba bwa ciloba kuhvwa kumilimo yakwe yoonse. ³ Leza wakabuleleka buzuba bwa ciloba alimwi akubu setekanya, nkaambo muli mbubo Leza wakalyookehya kuhvwa kumilimo yakwe yoonse njaakalenga alimwi akubamba. ⁴ Aya ngamakani aamba mazeulu alimwi anyika, nozhyakalengwa, mubuzuba oobuya Mwami Leza naakabamba inyika alimwi a mazeulu. ⁵ Kwakanyina cihvwuna camwisokwe cakaliko munyika, alimwi kunyina cisamu camwisokwe cakomenene, nkaambo Mwami Leza taakaninga kwiicitya kuti inhvwula iwe anyika, alimwi kwakanyina muntu wakulima inhi. ⁶ Pele hikunku wakali kuhvwa munyika alimwi akutilila inhi yoonse. ⁷ Mwami Leza wakabumba muntu kuhvwa kwihvwu lya anhi, alimwi wakamuyoyela mumanango akwe moza wa buumi, alimwi muntu wakaba muntu uupona. ⁸ Mwami Leza wakahyanga muunda kwiwe, ku Edeni, alimwi ookuya wakabika muntu ooyo ngwaaka bumba. ⁹ Kuhvwa anhi Mwami Leza waka bamba zhyisamu zhyoonse kuti zhyikomene eezhyo zhyeebehi alimwi zhyibotu kukulya. Eci cakasanganya cisamu cabuumi cakali akati kati kamuunda, alimwi acisamu cakuzhyiba bubotu alimwi abubyaabi. ¹⁰ Mulonga wakali kukunka kuhvwa mu Edeni kutilila muunda. Kuhvwila waawo wakaandaana alimwi wakaba milonga yone. ¹¹ Izhyina lya wakutaanguna ngo Pishon. Ngoguwe ukunka lyoonse munyika yoonse ya Havilah, ooko kuli ngolide. ¹² Ingolide yamunyika ilya nimbotu. Kulanjanwa aalo mabwe aabedelian alimwi amabwe aa onyx. ¹³ Izhyina lyamulonga wabili ngu Gihon. Ooyu ulakunka lyoonse munyika yoonse ya Kkush. ¹⁴ Izhyina lyamulonga watatu ngu Tigilisi, alimwi ulakunka kwiwe lya Asha. Mulonga wane ngu Euphuleti. ¹⁵ Mwami Leza wakabweza muntu alimwi akumubika mumuunda wa Edeni kuti aubeleke alimwi akuubambalila. ¹⁶ Mwami Leza wakalailila muntu waamba, ''Kuhvwa kuzhyisamu zhyoonse zhyili mumuunda inga walya calwaanguluko. ¹⁷ Pele kuhvwa kucisamu cakuzhyibya bubotu alimwi abubyaabi utakalyi, nkaambo buzuba mboyakulya kuhvwa kuli ncico, uyakuhwa ncobeni. ¹⁸ Mpoona Mwami Leza wakaamba, ''Tacili cibotu kuti muntu abe alike. Njaku mubambila hikugwahya umweelele.'' ¹⁹ Kuhvwa anhi Mwami Leza wakabumba banyama boonse bamwisaka alimwi abanyuni boonse bamumulengalenga. Mpoona wakabaleta ku muntu kuti abone mbwaakali kunga wabaita. Kuhwumbwa muntu mbwaakaciita acimwi cilenge cipona, eelyo lyakali ndezhyina lyancico. ²⁰ Muntu wakapa mazhyina ku zhyipona zhyoonse, ku bayuni boonse bamumulenga lenga, alimwi akubanyama boonse ba mwisokwe. Pele kumuntu lwakwe mwini tiikwakayanwa mugwahi umweelele. ²¹ Mwami Leza wakacita kuti muntu awonenene, eelyo muntu wakoona. Mwami Leza wakabweza ibambo lyakwe lyomwi alimwi wakahinka buyani aawo mbaaka bweza ibambo. ²² Aibambo eelyo Mwami Leza ndyaa kabweza kuhvwa ku muntu, wakabamba mukaintu alimwi wakamuleta ku muntu. ²³ Muntu wakaamba, ''Cino ciindi, ooyu mahwuwa aa mahwuwa aangu, alimwi mbuyani bwa buyani bwangu. Uya kwiitwa kuti, 'mukaintu,' nkaambo wakakwihiwa kuhvwa ku muntu. ²⁴ Aboobo muntu uyakuhiya bauhi alimwi abanyina, uya kuswaanganyiwa ku mwinakwe, alimwi baya kuba buyani bomwi. ²⁵ Bakali amantanda boonse, mulombwana alimwi a mwinakwe, pele tiibakakwete insoni.