¹ Muusa wakaita ba Isulaili boonse alimwi wakabaambila kuti, ''Teelela, Isulaili, kumalailile alimwi aku milawo eyo njiyaku kanana mu matwi aako sunu, kutewa uyiiye alimwi akuzhibamba. ² Mwami Leza wesu wakabamba cihvwuminano aswebo ku Horeb. ³ Mwami kunyina naakabamba cihvwuminano abakulukulu besu, pele aswebo, toonse notupona aawa sunu. ⁴ Mwami wakakanana amwebo buhyu abuhyu atala lya mulundu kuhwa akati ka mulilo ⁵ (Ndakaihvwi akati ka Mwami alimwi amwebo ku ciindi ciya, kuzubulula izwi lyakwe kuli ndimwe; mwakali kukandukile nkaambo ka mulilo, alimwi tiimwakacikozhya kuutanta mulundu). Mwami wakaamba, ⁶ 'Ndime Mwami Leza wenu, wakamuleta kuhvwa kunyika ya Egipiti, kuhvwa mung'anda ya buzhike. ⁷ Mutakabi abambi ba Leza kumbele lyangu. ⁸ Tamweelele kuli bambila cintu cibeze nokuba cikozhya cimwi cili mwizeulu, nokuba cili anhi mujunguhi, nokuba cili mu meenzhi kunhi. ⁹ Tamweelele kuzhi hukamina nokuba kuzhibelekela, nkaambo mebo, Mwami Leza wenu, ndi Leza hibuhwi. Ndasubula milandu yaba kulukulu mukuleta cisubulo atala lya bana, kuhikila kumusela watatu alimwi awane wabaabo batanyandi, ¹⁰ alimwi akutondezhya luse kuzhyuulu, kuli baabo banyanda alimwi akubamba milawo yangu. ¹¹ Mutakabi nomubweza izhina lya Mwami Leza wenu cabuyo, nkaambo Mwami takamuboni kutazulwa oyo ubweza izhina lyzkwe cabuyo. ¹² Langihya buzuba bwa nsabata akububamba cakusetekana, mbuli Mwami Leza wenu mbwaaka mulailila. ¹³ Kwamazuba ali cisambomwi muya kubeleka alimwi akwiicita milimo yenu yoonse; ¹⁴ pele buzuba bwa ciloba mbwa Nsabata ku Mwami Leza wenu. Muli mbubo utaciti kuhumbwa mulimo - kutali ndiwe, nokuba mwana wako musankwa nokuba mwana wako muhimbi, nokuba mutwanga wako musankwa, nokuba mutwanga wako muhimbi, nokuba musune wako, nokuba imbongolo yako, nokuba kuhumbwa umwi wabanyama bako, nokuba muhvwa mahi muli mumilyango yako. Eeci nkaambo kakuti mutwanga wako musankwa alimwi a mutwanga wako muhimbi inga balyookezhya mbubona mbuli ndiwe. ¹⁵ Ua kuyeeya mumizeezo kuti wakali muzhike munyika ya Egipiti, alimwi Mwami Leza wako waka kuleta kuhvwa kokokuya atanhi lyakwe lya nsana alimwi Leza wako waka kulailila kuti wiibambe Nsabata. ¹⁶ Lemeka bauso alimwi ababanyoko, mbuli Mwami Leza mbwaa kulailila kuti ucite, kutewa inga wapona ciindi cilamhu munyika Mwami Leza wako njakupa, alimwi akuti zhintu zhikweendele kabotu. ¹⁷ Utakabi noya kuyaya. ¹⁸ Utakabi noya kwaacita mamambe. ¹⁹ Utakabi noya kubba. ²⁰ Utakabi noya kupa bumboni butaluleme kuli himunyinza nyoko. ²¹ Utakabi niya kulombozhya kuli muka himunjinza nyoko, utakabi noya kulombozhya ing'anda yaka himunjinza nyoko, muunda wakwe, nokuba mutwanga wakwe muhimbi, musune wakwe, nokuba imbongolo yakwe, nokuba kuhumbwa citewa ncaka himunyinza nyoko.' ²² Aaya mazwi Mwami wakaakanana aizwi likando ku mbunga yako yoonse atala lya mulundu kuhvwa akati ka mulilo, ka ikumbi, alimwi aka mudima mukando; taakayungizhya aambi mazwi. Wakaalemba alimwi wakaapa kuli ndime. ²³ Cakahika ciindi, nomwakavwa izwi kalihvwa akati kamunhinze, kumwi mulundu wakali kuyaka, kuti mwakavhula munhi munhi lyangu - boonse bakando benu alimwi amitwe yamihyibo yenu. ²⁴ Mwakaamba, 'Langa, Mwami Leza wesu watutondezhya bulemu bwakwe alimwi abukando bwakwe, alimwi twaliteelela izwi lyakwe kuhvwa akati ka mulilo; twabona sunu kuti naa Leza wakanana abantu, inga bapona. ²⁵ Pele ino tuyanda kuhwila nzhi? Nkaambo oyu mulilo mukando ulatumena; kuti naa katu cilimvhwa izwi lya Mwami Leza wesu, tuya kuhwa. ²⁶ Nkaambo ngoni kunze lyesu akati lya boonse ba buyani wamvhwa izwi lya Leza uupona lyakanana kuhvwa akati ka mulilo alimwi wapona, mbuli mbotwacita? ²⁷ Mbuli ndiwe, uleelele kuunka alimwi akuteelela kuli zhyoonse ezhyo Mwami leza wesu nzhyaamba; uzhiinduluke kuli ndiswe ezhyo zhyoonse Mwami Leza wesu nzhyaamba kuli ndiwe; tuya kuciteelela alimwi akucilemeka.' ²⁸ Mwami wakateelela mazwi enu alya nomwaka kanana kuli ndime. Wakaamba kuli ndime, 'Ndaamvhwa mazwi aa bantu aaba, ncoba kakanana kuli ndiwe. Ncoba kakanana cakali cibotu. ²⁹ Cilagambya, kuti kwakali moyo uuli oobulya muli mbabo, kuti inga bandi lemeka alimwi akubamba milawo yoonse yangu lyoonse, kuti zhyeende kabotu kuli mbabo alimwi akubana babo kukabe kutamani! ³⁰ Leza waamba kuli mbabo, ''Amupiluke ku mavhuka enu.'' ³¹ Pele webo, wiime kuno munhimunhi lyangu, alimwi njaku kwaambila milawo yoonse, malailile, alimwi amilawo kuti ukabayiihye, kutewa bakabambe munyika njiya kubapa kuti ikabe yabo.' ³² Uya kucibamba, aboobo, eeco Mwami Leza wako ncaakulailila; Tokavhwi kumbali kutanhi lya lulyo nokuba lya lumwenhi. ³³ Uya kweenda munzhila zhyoonse Mwami Leza wako zhyaakulailila, kutewa kuti upone, alimwi akuti zhikweendele kabotu, alimwi akuti avhule mazuba aako munyika njiya kukupa.