¹ Bakwangu, haiba muntu nawaniwa mu zibbi, enwe muchenete mubotere ku mubooza muruho ro kuli kokobeza. Mu limamere mubeni okutiye nenwe mwasha yerekwa. ² Mukulike e miziyo ya ba yenzenu, mi kabulyaho mu bumbilize o murawo wa Kiresite. ³ Haiba kwina ozyu azyara ye eye muntu mwene eye nahaazya, aki homa. ⁴ Muntu no muntu atatube mutendo wakwe, mi no kulitunta kwakwe kuraba kwakwe yenke kali no zyumwinya. ⁵ Kakuli muntu no muntu nara kulika o muziyo wakwe. ⁶ Ozyu na zyiiswa ezywi bashanganine zintu zirotu no mu zyiisi. ⁷ Mwaha homiwa. Nyambe ka shauliwa, kakuli zonshe ezo a byara o muntu, zenzo na zyangure. ⁸ Kakuli ozyo a byara e mbuto ha mubili wakwe nara shinja o kuchoboroka. Ozyo a byara e mbuto ku Ruho nara zyangura o buharo kabumani buzwa mu Ruho. ⁹ Twasha kwangi kutenda borotu, kakuli ke nako i rukera tura shangana muku zyangura, heba katu kwangili hakati. ¹⁰ Mpaho he, bulyena tushina e chibaka, tu tende zirotu ku bantu bonshe, sihuru kwabena bawira munjuwo ye ntumero. ¹¹ Mubone miñoro e minene ndimiñorera ke anja lyangu. ¹² Bena bashaka kubonisa oburotu ke nyama ba yereka kumi sininika ye muye ku mukanda. Batenda ezi o kutiye basha shandisiwa ke chifapano cha Kiresite. ¹³ Kakuli kali ye nabo bakitwaranga ku mukanda ba chilira o murawo, kono bashaka ye enwe muye ku mukanda o kutiye ba litunte ke mibili yenu. ¹⁴ Kono nendisiye kuli tunta mbita ke chifapano cho Nfumu Jeso Kiresite, kokuya kobuti e fasi nilya kokoterwa kwangu, neme ku fasi. ¹⁵ Katubali aba nibaya ku mukanda kapa aba kali nibaya ku mukanda, echi tubara ko chibumbo chiya. ¹⁶ Mi ku bantu bonshe bahara o buharo obu, empore ne chishemo zibe nabo, mani nikwa Isiraere ya Nyambe. ¹⁷ Kuzwa hanu kwazya ozyu a ndisese, kakuli ndihindite e zibata za Jeso ha mubili wangu. ¹⁸ E chishemo cho Nfumu Jeso Kiresite chibe no ruho rwenu, bakwangu. Kube bulyaho.