¹ Aho kuhita e myaka ye kumi ne myaka yone, ndoku yenda kame kwa Jerusarema ne Banabasi, kuhinda Tite neme. ² Ninda yenda kukambama kebaka lyoku kuboniswa noku bikwa bahaso ezywi lya Nyambe elyo ninda amba kubashi Chishi. Ninda amba kumbali kwabo abo bonahara ye mba butokwa, kubona kali nenda butuka kapa kubutika bulyo. ³ Kono nanga Tite, ozyo kakere neme nozyo kali Mugerike, na sininikwa o mukanda. ⁴ A bayenzetu bokuhoma niba kezya ko kulihiba ye bezye babone e ntukuruho tukwesi kwa Jeso Kiresite. Bashaka ye tuye mu bwika, ⁵ kono kali nitwa libika kwabo munkotera nanga kanini, okutiye o buniti bwe zywi busiyare kwenu. ⁶ Kono kwabo kaba bonahara o butokwa ( monshe bulyo omo kabakalire kazi bilaezi kwangu, Nyambe ka sundi e nketururo) - kwabo, nditaye , abo kaba bonahara o butokwa kwaazya echo ni bandi wezera. ⁷ Kumbali imunya, niba bona ye ninda hewa ezywi lya kwabo kali nebaya ku mukanda, shina bulyena na hewa Pitorosi oku yendesa ezywi kwabo nibaya ku mukanda. ⁸ Kakuli Nyambe, ozyo natenda kwa Pitorosi kazo bu apositora kwaba nibaya ku mukanda, nikwangu natenda bulyaho kubashi Zishi. ⁹ Aho Jakobo, Kefasi, ne Johani abo kaba zyibahere ye mbabo niba zyaka e nkereke, boku shuwisisa echishemo echo ninda hewa, nibaha e anja lya malyo lyoku shangana kwa Banabasi neme. Niba tenda ezi ye tuyende kuba sizishi, nokuti ye abo na bayende kwabo nibaya ku mukanda. ¹⁰ Niba kumbira bulyo ye tu azyare abo baazya chabo, echini chintu kandi azyara o kutenda. ¹¹ Kono aho shakezya Kefasi kwa Antioke, ninda kanana habuso bwakwe kakuli katewa ye azya kwina nenja. ¹² Nakushini ku kezya bakwame abo kabazwa kwa Jakobo, Kefasi kalya nibashi Zishi. Kono aho sheba kezya aba bakwame, aku reka nokuzwa kwabo bashi Zishi. Katiya babo kaba hambiliza zo mukanda. ¹³ Bonshe a Bajuda niba lishanganya moko kuliha. Nanga Banabasi na zyoba nabo mu kuliha kwabo. ¹⁴ Kono aho ndibona ye mikwa yabo kayi yendereli ne niti ye zywi lya Nyambe, Ndoku sumwina Kefasi habuso bwabo, "Heba oli mu Juda nohara mbwe mwina shi chishi ewe kali oli mu Juda, mbuti owora ku sininika bashi Zishi kuhara mbwe ma Juda?" ¹⁵ Eswe tuli ma Juda koku retwa kali batenda zibbi be Chishi; ¹⁶ mi swe tuzyi ye kwaazya ozyo a rukite ke mitendo yo murawo kono ke ntumero kwa Jeso Kiresite. Nitwa kezya mwi ntumero ya Jeso Kiresite oku tiye tube bantu ba rukite mwi ntumero ya Kiresite kali ke mitendo yo murawo. Ke mitendo yo murawo kwaazya o mubili shake newu cheneswa. ¹⁷ Kono, ati tushaka oku cheneswa kwa Kiresite, neswe, nitwa waniwa netuli batendi be zibbi, ani Kiresite a zuminina echibbi? Kazumini! ¹⁸ Kakuli heba nandi zyaka ezintu ninda yaya , ndili tenda ndemwine ku chola murawo. ¹⁹ Kakuli ko murawo ninda fwa ku murawo, okutiye ndihalire Nyambe. ²⁰ Ninda kokoterwa ne Kiresite. Kali ndime shendi lihalira, kono Kiresite ndeye shahara kwangu. O buharo ndihara hanu mbo munyama ndihara mwi ntumero yo mwana wa Nyambe, ozyo nandi shaka akuliha yemwini kebaka lyangu. ²¹ Kandi bikili kumbali echishemo cha Nyambe, heba oku cheneswa ku waniwa ko murawo, kwaazya ezo nafwila Kiresite!