¹ Alume amweya na keya ku Antioke kutunda ku Judea kuya luta a ndumbaana mona amba nji, ''Nji koci ku mukanda okuca mumulao wa Mushe, kotwehye ku yoihiwa.'' ² Eyi opo i letela Paulusi na Barnabasi kang'i ci kulu na ku yungana noo. Honyi Paulusi na Barnabasi, kupaka naamweya mukaci koo, na ketiwa kuca noo kuka kuma ku Jelusalema kuka kuwana na apositola na akulu peci puzo. ³ Ao honyi, kwikala ijni a kutumiwa ku keleke, yopo a pita fonisha na Musamaliya moshe na kulumuna o ngambaulo coo naa no macaba. Kuma na leta tabo cikulu kwa alume. ⁴ Apa naa keya ku Jelusalema, yopo aamuheliwa kua keleke na ku ma apositola na kuakulu, na kuka lombolola yoshe inu a natende na Mulimu. ⁵ Kono alume a mweya naiitana, aa nangwela ku hiemba no mafalisi, yopo aimana na kuamba, ''kwikile wino oku atwala ku mukanda na ku alaela kubuluka o mulao wa Mushe.'' ⁶ Henyi amaapositola na akulu yopo a kuwana pamweya kumona o hyambo. ⁷ Mu manyima no kuambaula yo nene, Pitolosi opo imana na kuamba koo, ''Makwetu, mwalimuka nji mu manyima kanyonyo Mulimu penji ape uiketelo mukaci kenu; inji mukanwa kange a no macaba a swanehela kuyuba olii no ulumiwa, na kwiitana. ⁸ Mulimu, uyu limukile mucima, ona monihya kuapa moya ukenu, wenji omu nakutendela okwetu. ⁹ A kena apaka shutano mukaci ketu nao, okukenihya o micima coo na tumelo. ¹⁰ Honyi apa walika ngepi Mulimu, nji opake o cokwe pa hingo no a lutiwa eco yiwetu natwi ko tutwehye? ¹¹ kono twa itana nji kumamba tukayoyihiwa na hishemo hya Mulena Jesu, wenji ao.'' ¹² Oundi no nyangela yopo u mwena kuteteca Barnabasi na Paulusi a lombolola o isupo na mamakazo naa beleka Mulimu mukaci no a macaba kuku tusisa ao. ¹³ Apa na a lesha kuamba ,Jakobo yopo alaba, kuamba, Makwetu, munitetece. ¹⁴ Saimoni kuma naamba omu Mulimu na tuseza aa no macaba inji aa himbemo anu mulicina lyaye. ¹⁵ Omaii no mapolofita aitaana eyi, wenji omu naku ñoleliwa, ¹⁶ 'Umanyima no eyom yinu kuma na uka huka, naku ya umba o Tempele ca Davida kame, eci cina kungwa pashi; kuma ni ya lukisa na huceca apa no ku sinyeha kame, ¹⁷ ijni oma siyaleti no anu kuma akufaa Mulena, kukopanya na macaba naa ihyaniwa mulicina.' ¹⁸ Yonyiko ambile Mulena, oyu no tenda eyi yinu tuna limuka kwa no manako no kale. ¹⁹ Honyi, Namona nji twa kakaleca a no macaba a anetana kulumela Mulimu. ²⁰ Kono twa añolele ijni a ambuke ku lapela milimu, uhule, ku nyama no iyama no ku hamwaala unyinga, na ku unyinga(umete). ²¹ Ya Mushe ya limukiwa mumatolopo oshe kutundelela ku simuluho na kukutaza yaye mu ma sinagoge Sabata na Sabata .'' ²² Honyi kumana kumonahala wino ku ma apositola na ku akulu no keleke, na keleke coshe, apa na keta Judas uyu na ihyananga Barnabasi, na Sailasi, a eteleli no keleke. ²³ Na ku atuma kwa Antioke na Paulusi na Barnabasi, kumana ng'ola na makaha oo, ''kutunda ku ma apositola na akulu no keleke, a kwenu no keleke, ku alumeli no macaba no mu Antioke, Silia, naa Silisia; Anamiimuca! ²⁴ Kakuli, kuma tunayubu nji alume amweya kaa ikile mukaci ketu a naci, kona hyaapa hibaka, ana filikanya o moya wenu na ku minyongonyihya, ²⁵ kuma natu mona hiwana, oku wana mucima umweya, kuketa alume na kua tuma okwenu na mukwa hikato hyenu Barnabasi na Paulusi, ²⁶ alume ana kutombolele omoyo wo mulicina lya Mulena wetu Jesu Kelesite. ²⁷ Apo henyi tuna tumu Judas na Sailasi, akumi ambela o yaambo no ukufeka mu mai oo. ²⁸ Kuma na kumonahala hiwana ku moya oukenu na kwetu, kumi kambekela kumu pango kupita ei no utokwa; ²⁹ inji muleshe o inu no matabelo no milimu, unyinga, ei nu no ukufela mane na kulesha uhule. Inji muileshe ku ku buluka, kuma ya kuka wapa o kwenu. Yopo a hyaaliha.'' ³⁰ Honyi, apa naafundula, yopo a hyecumuka ku Antioke, umanyima no kukopanya oanu pamweya, opo aatambeka liñolo. ³¹ Apa naamana kubala liñolo, yopo a wapela kakuli omaii no ling'olo naapa susuezo. ³² Judasi na Sailasi, kame neeli mapolofita kuma na asusueza a lumeli na mayi mangi a naaongoca. ³³ Mumanyima no kwikala nako kuya, akoo a lumeli opo afundula mukozo kuhuka kwaaya naa tuuma. ³⁴ Oliñolo liwawa no simuluho ko likite timana ca 34. (mumone mu likezo 15:40). kumana mona wino Sailasi oku okuhyaala koo. ³⁵ Kono Paulusi na Barnabasi kuma naikala mu Antioke, kuluta na ku kutaza olii lya Mulena (naakoo angi). ³⁶ Apa na kupita maiwa Paulusi opo ambela Barnabasi, ''Twende tuhuke honyi tu potele alumeli mumatolopo moshe na tuka kaamba olii lya Mulena na kuka mona omu aikalelile.'' ³⁷ Barnabasi kuma na hinga ku himba kame Joani oyu no ihyaniwanga Maleka. ³⁸ Kono Paulusi yopo nahana inji kaanji kutenda wino kuhimba Maleka, oyu no kana kuca noo yonene mumusebezi no kahiyela mu Pamufilia. ³⁹ Honyi opo kwinguka likañi likulu, yopo akauhana, Barnabasi oye yopo himba Maleka kuhupuka naye kuca ku Sipera. ⁴⁰ Kono Paulusi yopo keta Sailasi na kuca naye, mumanyima alumeli yopo a mulaela muhishemo hya Mulena. ⁴¹ Honyi yopo ca mu Silia na Silisia tiiseza o makeleke.