¹ Bulusi, shɔng vipeleni Yeso Kirisi, ɓe shɔng ɓawu yãa wu wɔ̃ng jaarɔkeni ɓe shɔng rɔwu wu shãng ruu Laa, ² wuko sii vaase tɛ̃tɛ̃ ni wu shɔngzeni kaa bii a vusu labiniyi tɔ̃ving, ³ aru wu Jaa ɓe wuko shãari Dawuda ni wu kaa bii. ⁴ Ni Suru Tɔ̃ving shɔng shãng ni kaaka wu wɔ̃ng Laa Jaa a dɔ̃rɔng yuuni paa a yuusa, Yeso Kirisi wo Daayere. ⁵ Ni wu kaabi wo kpaa dɔ̃rɔng ɓɔɔ ɓee jaarɔkeni aru dũngni ruu gnshĩni a koo walikãng, aru wu rĩng. ⁶ A titi koomiyi, shɔng ɓaa nɔ yãa jɔ aru nɔ wɔ̃ng Yeso Kirisi shɔng. ⁷ Aru shɔngɓe yii a vusu Roma Laa shɔng kaseniyi ɓe shɔng ɓaayi yãa yii wɔ̃ng shɔng tɔ̃vingː Pãnti ɓi nɔ ɓee ɓɔɔ wɔ̃ngni ɓatata ɓe ke a wo Daa Laa ɓɔɔ Daayere Yeso Kirisi bii. ⁸ Vii shɔɔni, N dɔɔre Laa ni Yeso Kirisi kaabi aru nɔ ni walikãng, aruviya shɔng shãng nɔ ruu gnshĩni ye a koodanga walikãng. ⁹ Aru Laa ɓi wuko N shɔng ani yãa, ɓe N dũng wu a suru a vusu ruu tɔ̃ving ɓee wu Jaa, aɓe N watĩng ni nɔ ɓaani rĩng. ¹⁰ N gɔ̃ɔre Laa aru nɔni dikidi kɔ nukoviya a tũmpu N kpaa tukeni hãmi ni Laa kaseni ɓe N e nɔ bii ɓe. ¹¹ Aru N kase N ze nɔ, aruɓe N daa anɔ ani suru, aruɓe N da anɔ kaaka ɓe. ¹² Vishãngni wuko, N kaseni tɛ̃tɛ̃ wuko N kpaa maani gn anɔ titi, ni wee kaa gnshĩngni, nɔ ɓee ɓɔɔ N maa. ¹³ Hãmi N de kase ɓa nɔ wɔ̃ng a vusu tĩngri ɓa, mazungyi, N kase N e nɔ bii tɛ̃tɛ̃ , (N de kpaa dɔ̃rɔng ɓa na ɓa hãmi ɓa), aruɓe N daa kpaa vireni jɔ a nɔ bii, anaɓe N kpaa tɔti a shɔng ɓe yisi dũng Laa ɓa yii bii ɓe. ¹⁴ N ɓi shɔng kɔpɔ ɓee shɔng Giriki ɓɔɔ shɔngzantiyi, ni shɔng kpɛ̃ɛniyi ɓɔɔ shɔng ɓe yii de kpɛ̃ɛ ɓa. ¹⁵ Arugoko, N bibi, N shii ye N shãng ruu tɔ̃ving a nɔ bii ɓɔɔ shɔngɓe yii a vusu Roma. ¹⁶ Aruviya N tãa yusɛ̃ɛ shãngni ruu tɔ̃ving ɓa, aru wuko Laa kaaka ɓee kpengseni shɔng walikãng ɓe yii azɔng ɓe, aru shɔng Yahuda shɔɔni ɓɔɔ Giriki. ¹⁷ Aru a titi ɓiko shɔng tase Laa wu dɔ̃rɔng tɔ̃ving ye ɓee gnshĩng a waa gnshĩngni, anaɓe shɔng binke ɓe, "Shɔng tɔ̃ving ng wɔ̃ngni gnshĩngni." ¹⁸ Aru Laa yato leseni keye a koolapa a yuu shɔngɓe yii dũng Laa ɓa ɓɔɔ shɔngɓe yii yato ɓa tɔ̃ving ɓa ɓe yii shãng ruu nungoko ɓa. ¹⁹ Aruviya viɓe shɔng ze ye aru Laa dee ye gbang a yii bii. Aru Laa kpɛ̃ɛre yii ye. ²⁰ Alaɓe shɔng pele koodanga tɛ̃tɛ̃, wu ruubi ɓe shɔng ze ɓa, yiko wu kaaka ɓee dong dong ɓɔɔ wu ruubi ɓe tɛ̃tɛ̃, taseye gbang, aru ɓe shɔng zeye a suru ɓee viɓe shɔng take ɓe. Arugoko yii vi raani bii ɓa. ²¹ Aruviya, yii tãa Laa ruu bii ye, yii de awu bɔngni ɓa anaa wu ɓi Laa ɓa, kɔ yii dɔɔre wu ɓa. Viɓe yii pele wuko, Yii wuure a yii lereniyi, yii lereni sĩngsĩng wɔ̃ng gbĩtĩngbĩ. ²² Yii taaseke yii kpɛ̃ɛ kɔtɔ, yii sɔɔ rii shɔng viwureni, ²³ Yii kɔse bɔngni Laa ɓe lese ɓa ni nungsuru shɔngzeng ɓe lese kɔtɔ, ɓee jenung, ɓee vii dɔɔ dɛ̃ɛro yii, ɓɔɔ viɓe yii gɔ̃ni buru. ²⁴ Arugoko Laa daayi yii pele vii nanka kɔng ayi sĩngsĩng a yuu viɓe ɓa kpelenkpe ɓa, aruɓe yii daa a yii bii bɔrɔ ɓa ayi nung ɓa. ²⁵ Ɓi yiko yii kɔse nungoko Laa ni yãa jĩngni, yiko yisɔɔ gbãare asɔɔ dũng vitakeni asɔɔ bɛ̃ɛ Shɔngɓe take vii koodanga ɓe, ɓe wu zuuku ani dongdong. Ananko. ²⁶ Aru viɓemi ko, Laa daayi a yuu peleni nanka sũnɔ, aruviya yii sooyeyi yii ɓase bii a nung sooyeyi ɓa anaɓe lii kɔtɔ ɓa. ²⁷ Jɔ anagko, yii veeye yii daa ɓaseni bii ni sooye asɔ ɓase niyi wee veeye. Ɓemi ɓi veeye ɓe yii pele vii yusɛ̃ tãani ɓa ni veeye asɔɔ kpaare yii yuu vii dɔɔ ɓe lii ni ruu nangka ɓe. ²⁸ Anaɓe yide a naa ɓa a kpaani Laa a yii zeni ɓa, daayi ayi lereni sĩngsĩng ɓe ɓa dang ɓa, aru yii daa pele viɓe ɓa dang ɓa ɓe. ²⁹ Yii yiye ni viɓe ɓa tɔ̃ving ɓa, kpãrivava, yãayĩng, ɓɔɔ yini shɔng a yato. Yii yini gnkaani, nungni shɔng vɔɔ, beeni yãa, lakeni, ni lereni ruvĩni. Yii ɓi shɔng lɔɔni shɔng, ³⁰ shɔng yãadɔng, shɔng bɛ̃ɛni Laa, shɔng dãani yengti, shɔng yuulakeni, shɔng gɔɔreni, beeni dɔ̃rɔng peleni vii rãamang; yii tãare yejaa yãa ɓa. ³¹ Yii ruu tɔ̃ving ɓa yato ɓa, anizɔng ɓa, lakeni sĩngsĩng, ɓɔɔ tãani gnkɔni ɓa. ³² Yii ze Laa ruudani ye, ni shɔngɓe yii pele zɔng viɓemi yii tise vɔɔni ye. Yii pele ɓa zɔng viɓemi yiko shee ɓa, yisɔɔ daa shɔngɓe yii pele zɔng viɓiyi.