¹ Ɓemi ɓi ruu zenisuru Yeso Kirisi ɓe Laa awu ke wu tase wu jaadɔɔ shongniyi viɓe daa watĩng ɓe. Tase vi ɓemi a gaa gbang aɓe shong Laa shɔngshongni a wu jaadɔɔ Yɔhana bii, ² shɔ̃ngɓe waayãa aru Laa ruu ɓɔɔ anizɔng a Yeso Kirisi, viɓe ze walikãng. ³ Zuuku ɓi shɔng ɓe ɓaale ruu waani yãa mi ni kaaka ɓɔɔ shɔng ɓe yii weshoo aru waani yãa mi ɓɔɔ shɔng ɓe dũng viɓe shɔng binke a vusu, aru la kpaye maani. ⁴ Yɔhana, a waa jakalaa nawa tati ɓe yii a Asiya: pãnti ɓɔɔ ɓatata wu wɔ̃ng ni nɔ ni, ɓe ke a shɔng ɓe wuko hãmi, wuko sii, ɓɔɔ shɔng ɓe daa e a tĩng, ni suru nawa tati ɓe yii awu tĩng ladong, ⁵ ɓɔɔ Yeso Kirisi, ɓe wuko shɔng ani yãa nungoko, wuko jaashɔɔni shɔng ɓe yii vɔɔ ye, wuko tɔti shɔng ladong ɓee kpanti Koodanga. Waa ke a shɔng goro ɓe kase wo a sɔɔ kpengse wo a ruvĩni ni wu kpaa- ⁶ wuko gonte wo a roonikpanti, shĩng wo firisi aru wu Laa ɓɔɔ wu Daa-bɔngseni ni kaaka ani ɓi wu ɓee ko dongo ɓɔɔ dongdong. Ananko. ⁷ Zepĩn, wuko teeni a vusu yãasi; shɔng nung walikãng ying zewu, ni shɔng ɓe yii ɓaare wu. Yãakooyi walikãng ɓee koodanga ying kaa aru wuni. Nungoko, Ananko. ⁸ "Miko Alifa ɓɔɔ Omega," Daayere Laa shãng, "ɓe wuko hãmi, wuko sii, ɓɔɔ wuko ng e tɔti, wuko Yuuranko." ⁹ Miko, Yɔhana- zũngwa ɓɔɔ shɔng ɓe tãa kpãreni ni nɔ ni roonikpanti ɓɔɔ wɔ̃ngni lemɓa manign ɓe yii a vusu Yeso- N kpang yuu a titi yãamɛɛ ɓe shɔng ɓa ni Patimo aru Laa ruu ɓɔɔ waani yãa aru Yeso. ¹⁰ N a vusu Suru a Daayere diki. N tãa yãakaani ang tũmpu weni yãa kãrang. ¹¹ A Shãng ni, “Mɔ binke viɓe mɔ ze mi a vusu labini, mɔ shongshe jakalaa nawa tati ɓe yii – a Afisa, a waa Simina, a waa Pagamo, a waa Tayatira, a waa Sadisi, a waa Filadefiya, ɓɔɔ tɔti Ladesi.” ¹² N ranung ye N ze ɓi wee yiri yãa ng shãng yãa ni mini weya, aɓe N ranung ye ɓe, N ze ya kɔnsi nawa tati ɓee gɔli. ¹³ A titi la wɔngni yaa kɔnsi mi shɔng ɓɔɔ ani anaa jaa shɔngzeng, ɓoose farabi tangtang ɓe lii wu dɔɔ ɓɔɔ wu yãregn shɔng ma gɔli ani. ¹⁴ Wu yuu ɓɔɔ sisi yuu puru ɓolongɓo ana rute-puru- anaa jetatara. Wu nung anaa reete yaa. ¹⁵ Wu dɔɔ anaa zũngre ni saasurɛ̃ng ɓe shɔng sɛ̃ɛ ɓe, anaa tagula ɓe shɔng rangti yii sɛ̃ɛ ɓe, wu yãa shãngni anaa yãa mɛɛ ɓe ying yule ɓe. ¹⁶ Yise sengya nawa tati a wu nashãng, ɓɔɔ yewa ɓe yãa ka ziti ng ke a wu yãa. Wu watĩng de ɓengkeni anaa la a titi yuu. ¹⁷ Alaɓe N ze wu ye, N wete a wu dɔɔ anaa shɔng ɓe vɔɔye ɓe. Shĩng wu nashãng ang bii a shãng ni, “Mɔ na zaa vɔɔ ɓa. Miko shɔɔni miko tũmpu ¹⁸ ɓɔɔ shɔngɓe wu surubi ani. N sii vɔɔye, zeta, N surubi ani hãmi dongo ɓɔɔ dongdongǃ N viyɔrɔng puuni ani ɓee vɔɔ ɓɔɔ ɓe Hades. ¹⁹ Arugoko binke viɓe mɔ ze ɓe ta, viɓe yii hãmi, ɓɔɔ viɓe daa watĩng a tũmpu viɓemi. ²⁰ Aru zeni viɓe shɔng vɔ̃ɔse ɓɔɔ aru sengyaa nawa tati ɓe mɔ ze ang nashang mi, ɓɔɔ gɔli nawa tati ɓe a yii la wɔ̃ngni: Sengyaa nawa tati mi yiko Laa shɔngshoni nawa tati ɓee jakalaa, la shĩngni yaa nawa tati mi yiko jakalaa nawa tati.”