¹ Bemi ɓi gaani ruu tɔ̃ɔving Yeso Kirisi, Jaa Laa. ² Anaɓe Ishaaya shɔng zeni binke, "Ze pĩn, N shɔng N jaadɔɔ a nɔ tĩng, shɔng ɓe daa gonte nɔ dɔ̃rɔng ɓe. ³ Shɔngɓɔɔ yiri yãa ing kaa yãa a jinti, 'Nɔ gonte Daayere dɔ̃rɔng ta; nɔ shĩng wu dɔrɔng wu wɔng gɓololo.'" ⁴ Yɔhana e, a pele shɔng batizima a jĩnti a waase yãa batizima ɓee kɔseni sĩngsĩng aru yaani ruvĩini. ⁵ Shɔng tipi Yahuda walikãng ɓɔɔ Urushalima yii kee a waa wu bii. Pele yii batizima a Yoo Urudu, yii shãng yii ruvĩni. ⁶ Yɔhana tuse koo gbankurumɛ a maa soo a zũng, shaa zɔrɔ ɓɔɔ nung wara jĩngti. ⁷ Waa yãa, a tɔɔ ni "Shɔngɓɔɔ teni ang tũmpu ɓe jãng kɔtɔ ni kaaka; N daa zenung tangni ɓa N kale wu koodɔɔ ɓa. ⁸ N pele nɔ batizima ni mɛɛ, wu bibi ing pele nɔ ni Suru Tɔ̃ɔving." ⁹ Watĩng a diki wayii aɓe Yeso ke a Nazara a vusu Galili, Yɔhana pele wu batizima a Yoo Urudu. ¹⁰ Alaɓe Yeso keye a mɛɛ, a zeke koolapa puuye Suru Laa de lɔɔ ni awu yuu ana koro. ¹¹ Yãa ke a koolapa, "Mɔ ɓi N Jaa ɓe N kase ɓe. N tãa puru yato ni mɔni." ¹² Suru sɔɔ too wu ke a ware wu jĩngti. ¹³ Pele diki la ziti a jĩnti, mɔng ɓe Shelan maase wu ke. Wu sii ni vii jĩntiyi, Laa shɔngshoni yii sɔɔ gbãarewu ke. ¹⁴ Hami alaɓe shɔng yii Yɔhana ye, Yeso e tipi Galili a waase shɔng Laa ruu tɔ̃ɔving. ¹⁵ A shãng ni, "Laa tiseye, Laa roonikpanti kpaaye, ya ruvĩni ta nɔ sɔɔ azɔng a ruu tɔ̃ɔving." ¹⁶ Alaɓe de kn ni a yãa waapo Galili, a ze Simani ɓɔɔ Andarawo Siman zũngɓiyi a mɔng tɛ̃ɛni jang a waapo, aruviya yii ɓi shɔng jezũng yini. ¹⁷ Yeso gãleyi ni, "Eta, nɔ dũng, N shĩng nɔ shɔng yini shɔngzengyi." ¹⁸ Ɓani jang ɓaseni ɓa yii daayi jang a dũng wu. ¹⁹ Alaɓe Yeso kn ye ni tĩng tɔkɔlɔng, a ze Yaakubu Zabadi jaa ɓɔɔ Yɔhana zũngɓi; yii a vusu tuusi ying gonte jang. ²⁰ Ɓayi yãa yii sɔɔ daa yeɓi Zabadi a vusu tuusi ni jaa kpɛ̃ɛniyi, yii sɔɔ dũng wu. ²¹ Yii e a diki wɔ̃keni, a Kafanahum, Yeso ɓoo vusu mɔng gɔ̃ɔreni a manteyi. ²² Wu manteni ayi vii bii zani, aruviya mante yii vii ana shɔng ɓe wu kaaka ani vɛ̃ɛni ɓa ana shɔng labiniyi yii ɓa. ²³ Amɔng ɓi shɔngɓɔɔ a vusu mɔng gɔ̃ɔreni ɓe wu nangka Suru a bii lang yãa, ²⁴ a tɔɔ ni, “Ɓivi ɓase woni mɔni viya, Yeso shɔng Nazara? Mɔ e ke mɔ lese wo kɔtɔ ya? N ze mɔɔ zɔng ye, mɔko shɔng Tɔ̃ɔving ɓee Laa." ²⁵ Yeso gɔ̃ɔre vĩnivĩvĩ rãmang gãagãa a shãng ni, "Zĩng yãa ta mɔ ke a wu biiǃ" ²⁶ vĩnivĩvĩ rãmang loke wu a tipi a sɔɔ ke a wu bii alaɓe de Lang yãa ni kaaka. ²⁷ Yii yii naa a yãa, a yɛ̃ɛ wee hami ni, "Ɓiivi ananko viya? Wo ze manteni vi polo ɓɔɔ lami ye tɔtiǃ shãngshe vĩnivĩvĩ rãmang yãa yii sɔɔ dũng wu yãaǃ" ²⁸ Wu ruubi boo mɔng walikãng a tipi Galili. ²⁹ Alaɓe keye a vusu mɔng gɔ̃ɔreni, yii ɓoo Bituru ɓɔɔ Andarawo yee, ni Yakubu ɓɔɔ Yɔhana. ³⁰ Bituru Kpenɓi roo a tipi bii ing ɓɔng wu kɔtɔ, yii shãngshe wu aru wuni. ³¹ E kiti a wu bii, a yii wu na, a yuse wu paa; ɓɔngni bii ɓi sɔɔ yawu naa ke, a sɔɔ wãareyii vishang. ³² Ni lasãani ɓe laa too ye, shɔng de esewu shɔng vɔɔ yini, ɓɔɔ shɔngɓe vĩnivĩvĩ rãmang ɓooyi bii ɓe. ³³ Shɔng koo ɓi walikãng yii muse a yɔ̃rɔng yee. ³⁴ Gante shɔng vɛ̃ɛni ɓe yii vɔɔ a bii zɔng zɔng, a langte vĩnivĩvĩ rãmang, a de yayi ɓa yii shãng yãa ɓɔɔ ɓa, aruviya yii zewu zɔng ye. ³⁵ Tãa zibĩni, a waa mɔng ɓe shɔng ɓa a mɔni ɓa, a gɔ̃ɔre Laa a mɔni. ³⁶ Simani ɓɔɔ shɔng ɓe yini wuni yii be wu. ³⁷ Yii kpaawu a sɔɔ shãngshe wu ni, "shɔng de bee mɔ ni walikãng." ³⁸ A gãleyi ni, "Wo waa kaa koo ɓɔɔ yita, aruɓe N daa waa ruu Laa tɔti a mɔng wa. arugoko N ke a mɔng ɓemi." ³⁹ Raa tipi Galili walikãng, a waa yãa a yii mɔng gɔ̃ɔreni, a sɔɔ langte vĩnivĩvĩ rãamang yii. ⁴⁰ Shɔng vɔɔ vibi ɓɔɔ e wu bii, a gɔ̃ɔre wu; a kute a wu watĩng a shãngshe wu ni, "Mɔ na kase kɔtɔ, mɔ sɔkeng wɛ̃tɛnwɛ̃" ⁴¹ Ni nugn kɔngni, Yeso waare naa a lii wu, a shãngshe wu ni, "N kaseye; gante ta." ⁴² Ɓani jang ɓaseni ɓa vɔɔ vibi ɓi yawu, a sɔɔ gante ke." ⁴³ Yeso waase wu yãa a sɔɔ vaase wu yãa. ⁴⁴ A gãle wu ni, "Mɔ na shãngshe shɔngɓɔɔ ɓa, waa ta, mɔ tase mɔ yuu a firisi bii, mɔ sɔɔ aa vii doreni anaɓe Muusa shãngɓe, wu wɔ̃ng vitaseni a yii bii.” ⁴⁵ De keni a wa waare yãa ni aru viɓe shɔng pele wu ɓe, viɓi shĩngke Yeso de sɔɔ ɓoo koo ɓi tɔ ɓa gɓang ɓa a wɔng a mɔng ɓe shɔng ɓa ani ɓa. Shɔngzeng yii sɔɔ e wu bii tɔti a mɔni a koo walikãng.