¹ Shɔngzengyi vɛ̃ɛni yii too vipeleni shĩngni ye a mɔngoro viɓe shɔng sɔ̃reyãa a wo titi, ² anaɓe jaashoniyi ɓee ruuɓi ɓɔɔ shɔngɓe yii nung ze viɓe watĩng shɔɔni yii gãale wo ɓe. ³ Arugoko viɓi sɔɔ liiseng jɔ a bii, N binke mɔ nungoko viɓe watĩng ɓe ɓatata, shɔng tɔ̃ɔving Tiyofilosi, aruviya N bɛɛye ɓatata viɓe watĩng walikãng gaa ni ɓee tũmpu ni, ⁴ aruɓe mɔ daa ze ruunungoko ɓee viɓemiyi ɓe shɔng mante mɔ ɓe. ⁵ Alaɓe kpanti Hiridu ɓee Yahuda rookoo ɓe shɔng firisi ɓɔɔ ani ɓe shɔng ɓaa wu ni Zakariya shɔng kaabii Abija; wu soo Alisabatu wu jɔ Haruna jetãari. ⁶ Yii zĩngzĩni yii ɓi shɔng tɔ̃ɔving a Laa watĩng, yii kn ɓaniruvĩniɓa a vusu Daayere rudaniyi ɓɔɔ wu dɔɔknniyi. ⁷ Vileseniwuko yii jaa ɓaniɓa aruviya Alisabatu wu sii tɔ̃ɔri, ɓɔɔ yii zĩngzĩni yii sii bɔngbɔrɔ ye. ⁸ Hãmi watĩng ke alaɓe Zakariya wu a Laa watĩng, ng pele wu shoni ɓee firisi a wu diki vipeleni. ⁹ Anaɓe yii langsi ɓee rɔɔni firisi ɓe daa pele vii shoni tase ɓe, shɔng rɔɔ wu ni dɔ̃rɔng tepu aru shɔngɓe daa ɓoo mɔngɔ̃ɔreni ɓee Daayere wu ɓuure yaa sũnunu. ¹⁰ Mɔɔ walikãng yising gɔ̃ɔrelaa a gaa alaɓe shɔng ɓuure yaa sũnunu ɓe. ¹¹ Hãmi Daayere shɔngshoni ke a wu watĩng a sɔɔ shii a kaa nashang ɓe talɔng ɓee ɓuureni sũnunu. ¹² Alaɓe Zakariya ze wu ye, a yɔreyu, bii zaani de yii wuni. ¹³ Laashɔngshoni gãale wuni, "Mɔ na zaa ɓa, Zakariya, aruviya mɔ gɔ̃ɔrenilaa kpaa teni ye. Mɔ soo Alisabatu ng yese mɔ jaa. Mɔng sɔɔ ɓaa wu rĩng ni Yɔhana. ¹⁴ Mɔng kpaa puruyato ɓɔɔ tãanitɔ̃ɔving, ɓɔɔ shɔngzengyi vɛ̃ɛni ying pele puruyato aru wu yeeni. ¹⁵ Aruviya ng wɔ̃ng bɔrɔ a Daayere watĩng. Ng ɓoo saa ɓa kɔ wu ɓoo viɓe kaaka ani ɓa, ng sɔng yii ni Surulaa a alaɓe wu dong a yĩngɓi yato. ¹⁶ Shãari ɓee Israila vɛ̃ɛni ying sɔng sɔɔ Daayere yii Laa bii. ¹⁷ Ng kn a Daayere watĩng a vusu Suru ɓɔɔ kaakanaa ɓee Iliya, aruɓe daa kɔse sĩngsĩng yejaayi a jaa yii bii ɓɔɔ shɔngɓe yii dũngyãaɓa a kpɛ̃ɛni ɓe shɔng yatoɓɔlɔngɓɔ-wu gonte Daayere ɓatata shɔngɓe shɔng gonteyi aru wuni. ¹⁸ Zakariya gãale Laashɔngshoni, "N daa ze vimi nukoviya ? Aruviya N ɓi kɔ̃ti shɔngbɔrɔ ɓɔɔ N soo diki shangye tɔti ɓololo." ¹⁹ Laashɔngshoni kose wu yãa asɔɔ gãale wuni "Miko Jibirilu, ɓe shii a Laa watĩng. Shɔng shong ni ng shãngyãa ni mɔni, N ɛse mɔ polo ruutɔ̃ɔving ɓemi. ²⁰ Zepĩnǃ Mɔng rii shɔng yãaɓa, mɔng zenung shãngni yãa ɓa, wuwa diki ɓe viɓemiyi daa watĩng walikãng. Aruviya mɔ de azɔng ɓa ang yãashãngniyi ɓa, ɓe ng wɔ̃ng ananko a diki ɓee ɓatata." ²¹ Hãmi shɔngzengyi yii a vusu gaani Zakariya. Viɓi ayi viibiizaani aruviya yese laye vɛ̃ɛni a vusu jaakalaa. ²² Vileseniwuko alaɓe ke gaa ye ɓe, de zenung shãngsheni yii yãa ɓa. Yii sɔɔ too ni zevitĩng ye alaɓe wu a vusu mɔng gɔ̃ɔrenilaa. A watĩng ni taseni naa asɔɔ de shãngyãa ɓa. ²³ Atũmpu ɓe wu diki shoni sɔ̃ɔyãa ye ɓe, sɔɔ waa wu yee. ²⁴ Atũmpu diki ɓemiyi, wu soo Alisabatu toosejaa asɔɔ vɔ̃ɔse bii ɓe shele maani. A shãngni, ²⁵ "Ɓemi ɓi viɓe Daayere peleng ɓe alaɓe mileng ni pãnti aruɓe daa tooseng yusɛ̃ a shɔng bii." ²⁶ A vusu shele mangoro, Laa shong wu jaashoni Jibirilu a ɓundang ɓee Galili ɓe shɔng ɓaani Nazara, ²⁷ a jesooye ɓe Yusuu gee wuye, wu ɓi shãari Dauda, jesooye ɓi rĩng ni Mɛrɛyamu. ²⁸ A ɛ wu bii a shãngni "N ji mɔ yãa, mɔ ɓe mɔ kpaa pãnti ye vɛ̃ɛniǃ Daayere ni mɔni." ²⁹ Vizeniwuko wɔ̃ng ni wunteni vɛ̃ɛni aru wu yãashãngni a sɔɔ yɔreyu ni ɓemi ɓi zɔng yãa jini ɓeweya. ³⁰ Laashɔngshoni gãale wuni, "Mɔ na zaa ɓa, Mɛrɛyamu, aruviya mɔ kpaa pãnti ye a Laa bii. ³¹ Milepĩn, mɔng toosejaa a yato mɔ sɔɔ yejaa. Mɔng ɓaa wu rĩng ni 'Yeso.' ³² Ng wɔ̃ng bɔrɔshɔng shɔng sɔɔ ɓaa wuni Jaa Shɔngzeng Yuranko. Daayere Laa ng aa wu ladongkpanti ɓee yebongɓi Dawuda. ³³ Ng rookpanti a Yakubu yee dongdong, wu roonikpanti ng sɔng sɔ̃ɔyãa ɓa." ³⁴ Mɛrɛyamu gãale Laashɔngshoni, "Vimi daa watĩng nukoviya, aɓe ng de ze veeye ɓɔɔ ɓa mi?" ³⁵ Laashɔngshoni kose wu a gãale wuni, "Surulaa ng kuuke mɔ, kaakanaa ɓee Yuranko ng kuuke mɔ. Aruɓe shɔng kpelengkpe goro ɓee shɔng yee wu mi shɔng ɓaa wu ni Jaa Laa. ³⁶ Zepĩn, mɔ shɔngbi Alisabatu toose yato ye jɔ a wu bii bɔrɔ mi. Ɓemi wuko wu shele mangoro, wuko shɔng sii ɓaa wu ni sootɔ̃ɔri. ³⁷ Aruviya viɓɔɔ ɓa ɓe jãa Laa yãa ɓa." ³⁸ Mɛrɛyamu shangni, "Zepĩn, N ɓi Daayere jaashoni sooye. Wu wɔ̃ngseng ta anaɓe mɔ shãng ɓe." Alaɓiko Laashɔngshoni sɔɔ yaa wu a waayi. ³⁹ Alaɓiko Mɜrɛyamu yupa a dikiwayi ɓanijangɓaseniɓa a waa jebu tipi, a ɓundang ɓe a vusu Yahuda. ⁴⁰ A waa ɓoo Zakariya yee a ji Alisabatu yãa. ⁴¹ Hãmi Alaɓe Alisabatu tãa Mɛrɛyamu yãa jini ye ɓe, Jaa ɓe a wu yato riibi, Alisabatu sɔɔ yii ni Surulaa. ⁴² A lang yãa ni kaaka asɔɔ shãngni, "Zuuku ɓi mɔ ɓe a titi sooyeyi, Zuuku ɓi tɔti jaa ɓe a mɔ yato . ⁴³ Pele nukovi Daayere yĩngɓi daa ɛng bii viya? ⁴⁴ Aruviya zepĩn, alaɓe mɔ kaani yiri yãajini ɛng shooyiye ɓe, jaa ɓe ang yato mi riibi aru puruyato. ⁴⁵ Zuuku ɓi sooye ɓe azɔngye ni viɓe Daayere shãngshe wu ɓe ng watĩng kɔtɔ anaɓe shɔng gãale wu a Daayere bii ɓe." ⁴⁶ Mɛrɛyamu shãngni, "N suru dɔɔ Daayere ye, ⁴⁷ Ng surubi sɔɔ pele puruyatoye a Laa ng shɔng Kpengseni. ⁴⁸ Aruviya ze rooreniyu ɓee wu jaashoni sooye ye. Aruviya zepĩn, viɓe yii hãmi a watĩng, lakooyi walikãng ying ɓang ni shɔng zuuku. ⁴⁹ Aruviya Yuranko Goromi pele bɔrɔngbɔ viyiye aru mini, wu rĩng wuko surulaa. ⁵⁰ Wu nukɔ̃ngni wɔ̃ng a lakoo a wa lakoo aru shɔngɓe yii zaa wu ɓe. ⁵¹ Wuko tase wu kaaka ni wu nabala; ɓi wuko saate shɔngɓe sii yii toose yuu aru yii lereni sĩngsĩng. ⁵² Wuko loke jaa kpantiyi ayi ladongkpantiyi asɔɔ peng shɔngɓe yii rore yuu a yii dɔɔ knni. ⁵³ Wuko shaare shɔngɓe yii tãa wɔ̃ɔko ni tɔ̃ɔving viyi, vileseni wuko yaa shɔngviyeeyi naa-waati. ⁵⁴ Wuko yise wu jaashoni Israila naa, aruɓe daa yenugn wu taseyi gnkɔ̃ngni ⁵⁵ (anaɓe shãngshe wo madaayi) awa Ibirayi ɓɔɔ wu shãari dondong." ⁵⁶ Mɛrɛyamu wɔ̃ngni Alisabatu ɓe shele tati asɔɔ zuse wu yee. ⁵⁷ Hãmi la tiseye ɓe Alisabatu daa lɔɔre yato ɓe sɔɔ yee jaaveeye. ⁵⁸ Wu shɔngyãakasiyi ɓɔɔ wu shɔngbiyi yii tãa ni Daayere tase wu bɔrɔnbɔ gnkɔngni ye, yii sɔɔ pele puruyato ni wuni. ⁵⁹ Hãmi watĩngke a diki nawa dɛ̃ɛro alaɓe yii ɛse jaa ɓi aru shɔng yere wu shaa. Yii sii kase ke yii ɓaa wuni "Zakariya," a wu yeja rĩng. ⁶⁰ Vizeniwuko yĩngɓi sɔɔ koseyi yãa a shãngni "Ɓa. Shɔng ɓaa wuni Yɔhana" ⁶¹ Yii gãale wuni, "Shɔngɓɔɔ ɓa goro a nɔ laye ɓe shɔng ɓaa wu ni rĩng ɓemi ɓa." ⁶² Yii tase yeɓi naa ni kaseke shɔng ɓaa wu jaa rĩng ni viya. ⁶³ Yeɓi sɔɔ ɓeeke shɔng aa wu vii binivi asɔɔ bii ni, "Wu rĩng wuko Yɔhana." Yii walikãng bii zaayi aru vimi. ⁶⁴ Ɓanijangɓaseniɓa wu yãa puu dongo wu rɛtɛ sɔɔ kpaa shãngni yãa. A shãng yãa a dɔɔre Laa. ⁶⁵ Vɔɔ zaani yii shɔngɓe yii sii amɔni walikãng. Ruuɓemiyi boo mɔng a waa jebu tipi ɓee Yahuda walikãng. ⁶⁶ Shɔngɓe yii tãa ruumi walikãng yii yise a yii sĩngsĩng, a shãngni, "Jaa ɓemi daa wɔ̃ng nukoviya?" Aruviya Daayere naa ni wuni. ⁶⁷ Yeɓi Zakariya yii ni Surulaa asɔɔ shãngyãazeni, ni, ⁶⁸ "Dɔɔni ɓi Daayere ɓe, Laa ɓee Israila, aruviya ɛye wu yise shɔng naa wu sɔɔ sɔ̃ɔreyãa kpengseni aru wu shɔngzengyi. ⁶⁹ Wuko peng rakajɛ̃ɛni kpengseni aru woni a wu jaashoni Dawuda yee ⁷⁰ (anaɓe shãngyãa ni wu tɔ̃ɔving shɔngzeniyi a tũmpu tɛ̃tɛ̃), ⁷¹ kpengseni a wo shɔngpongyi naa ɓɔɔ tɔti a shɔngɓe yii ɓɛ̃ɛ wo ɓe naa. ⁷² Wuko N pele vimi aru wu tase gnkɔngni a wo madaayi wu sɔɔ yenugn aru wu ɓolongɓo maani yãa, ⁷³ tengni ɓe tengse Ibirayi wo daa ɓe. ⁷⁴ Tengseke wu aa wo aruɓe wo bibi, atũmpu ɓe kpengse wo ye a wo shɔngpongyi naa, wo daa gbãre wu ɓani vɔɔ zaani ɓa ⁷⁵ a vusu wɔ̃ngni ɓolongɓo ɓɔɔ yato ɓolongɓo a wu watĩng ɓe wo dikiyi walikãng. ⁷⁶ Ananko, ɓɔɔ mɔko, jejaa, shɔng ɓaa mɔ ni shɔngzeni ɓee Bɔrɔ Yuranko, aruviya mɔng wa a Laa watĩng mɔ gonte wu dɔ̃rɔng, mɔ gɔnte wu shɔngyi aru wu ɛni ⁷⁷ mɔ aa wu shɔngbiyi zeni ɓee wu kpengseni ni yii yaseni ruvĩniyi. ⁷⁸ Vimi ng watĩng aru wo Laa gnkɔɔni, aruviya aru wuko la ng ɓengke a lapa wu ɛ yise wo naa, ⁷⁹ aru wu ɓengke a shɔngɓe yii wɔ̃ng a tĩngri yuu ɓɔɔ shɔngɓe yii a yingsi vɔɔ. N pele vimi aruɓe daa gaa wo dɔɔ a dɔ̃rɔng ɓee lemɓa." ⁸⁰ Hãmi jejaa ɓi bongke a wɔ̃ng ni kaaka a vusu suru, sɔɔ wɔ̃ng a jĩngti awa diki ɓe ng ke a shɔng Israilayi tĩng gbang ɓe.