¹ Atũmpu tɛ̃ɛtɛ̃ɛ Laa shãngshe wo dabongyi yãa ni shↄngzeniyi kaabi a dɔɔ vɛ̃ɛni ɓɔɔ a dɔ̃rↄngyi totok. ² Vizeniwuko a vusu diki tũmpe ɓemiyi, wuko shãngshe wo yãa ni wu Jaa kaabi, ɓe rↄɔ wu ke wu wɔ̃ng jaa rooniladong ɓee vii walikãng. Ni wu kaabi ko tɔti Laa pele koodanga. ³ Wuko wu ɓengkeni ɓee Laa bongni, wuko tase wu wɔ̃ngni zɔ̃ng bii. Wuko sɔɔ yise vii walikãng a yãawe ni ruu ɓee wu kaakanaa. Atũmpu ɓe pele sɔↄkeni ruvĩniyi ye, sɔɔ wɔ̃ng a kaa naashãng ɓee Yurangko a lapa ⁴ Wuko rii boro a jaa Laa shↄngshoniyi ana wu rĩng ɓe rooke liike a jãa yii rĩng ɓe. ⁵ Aruviya ɓi Laa shↄngshoniyi ɓewe Laa shãng dɔɔgo ni, "Mo ɓing Jaa, lami N rii mɔ Daa ye"? Kɔ ɓi Laa shɔngshoni ɓewe Laa shãng dɔɔgo ni, "N wɔ̃ng wu Daa, wu sɔɔ wɔ̃ng Jaa ang bii"? ⁶ Vizenuwuko ɓɔɔ tɔti, alaɓe Laa ese jaa jesang a vusu a koodanga, a shãngni, "Laa wu shɔngshongniyi walikãng ying gbãrewu." ⁷ Aru Laa shↄngshoniyii shãngni, "Wuko shɔngɓe riise wu shↄngshoniyi suruyi ɓɔɔ wu jaashongniyi rɛtɛ ɓee yaa, ⁸ Vizeniwuko aru Jaa shãngni, “Mɔ ladong, Laa, wuko dɔngo ɓɔɔ dↄngdↄng. Mↄ labala peleni vi nungoko wuko labala ɓee mɔ roonikpanti. ⁹ Mɔ kase peleni vi yato ɓolongɓoye asɔɔ bɛ̃ɛ peleni ruubɔng, Arugoko Laa, mɔ Laa, sɔɔ tɛ̃rɛ mↄ nung ɓee yatopuru a jãa mↄ shɔɔyi. ¹⁰ A gaani, Daayere, mↄ loo tũng koodãnga. Koolapayi yi ɓi mↄ vinaa peleniyi ¹¹ Ying lese walikãng, vizeniwuko mↄng watĩng sɔɔkɔkɔ. ying rii gɓenti ana fara tuseni. ¹² Mↄng ling yii ana farabi, shɔng sɔng kↄse yii ana tãtã fara. Vizeniwuko mɔ ɓe zɔng goro, mɔ saayi yii sɔↄ daa sɔ̃yãa ɓa." ¹³ Vizeniwuko ɓi Laa shɔngshoni ɓewe Laa shãngyãa alaɓɔɔ ni, "Wɔ̃ng ta ang kaa naashãng wuwalaɓe N daa shing mɔ shↄngpɔngyi mɔɔ vi dɔɔ shĩngni"? ¹⁴ Ɓa Laa shɔngshoniyi ko walikãng suru ɓe yii pele shoni ɓaya, ɓɔɔ shɔngɓe shↄng shonyi yii kɔɔ shɔngɓe ying kɔse ladong ɓee kpengseni ɓaya?