¹ Bulusi, Yeso jaarɔni aru Laa kaseni, ɓɔɔ wo zũng Timoti, ² shɔng ware Laa shɔng tɔ̃vingyi ɓɔɔ shɔng dũngni nungoko ɓe yii a Kolosi. Pãnti wu wɔ̃ng ni nɔ ni, ɓɔɔ wɔ̃ngni lemɓa ɓe ke a Laa wo Daa bii. ³ Wo dɔɔre Laa ye, wo Daayere Yeso Kirisi, wo sɔɔ gɔ̃ɔre Laa aru nɔni dikidi. ⁴ Wo tãa nɔ ruu shĩngni gn ɓe a vusu Kirisi Yeso ye ɓɔɔ nɔ kaseni Laa wu shɔng tɔ̃vingyi, ⁵ aruviya nɔ teni gn ɓe shɔng yaa aru nɔ ni a koolapa, ɓe nɔ tãa ruɓi nungoko, rutɔ̃ɔving ⁶ ɓe enɔ bii ɓe. Jɔ ananko rutɔ̃ɔving ɓemi de renung ni de sɔɔ bɔngni a koodanga walikãng-anaɓe ng pele anɔ titi a diki ɓe nɔ tãa asɔɔ zee Laa pãnti nungoko ɓe. ⁷ Ɓemi ɓi rutɔ̃ving ɓe nɔ mante a Abafarasi bii, wo jaadɔɔ ɓe wo kase ɓe, wu ɓi Kirisi jaadɔɔ ɓee nungoko aru woni. ⁸ Abafarasi gãale wo nɔ kaseni ɓe a Suru ye. ⁹ Aruviya kaseni ɓemi, gaa a diki ɓe wo tãa viɓemi wo de yaa gɔ̃reni Laa aru nɔ ni ɓa. Wo gɔ̃reni wuko nɔ yini wu zeni ɓee wu vii kaseni a vii kpɛ̃ɛni ɓɔɔ vii suru zeni walikãng, ¹⁰ aruɓe nɔ daa kn a dɔɔ ɓe liikɔtɔ ni Daayere ɓɔɔ viɓe tɔ̃ɔre wu a bii kɔ a mɔ weyaː Ni renila a vusu tɔ̃ving vipeleni ɓɔɔ bɔngni a vusu zeni Laa, ¹¹ Ni maaseni gn ni wu kaaka ani walikãng, ni wu tɔ̃ɔvĩng dɔ̃rɔng kaaka, aruɓe nɔ daa kpaa bɔrɔngbɔ maani nugn ɓɔɔ lemɓa, ni puru yato ¹² dɔɔreni Daa, ɓe shĩngke nɔ zenung kpaani vaaseni rooni Laa shɔng tɔ̃ving a zeni. ¹³ Wuko raawo ayu kaaka naa tĩngri asɔɔ waare wo Laa roonikpanti ɓee wu Jaa ɓe kase ɓe, ¹⁴ a wu bii ko wo kpaa kpengseni, ɓɔɔ yaseni ruvĩni. ¹⁵ Wuko wu nung suru ɓee Laa ɓe shɔng zewu ɓa, wuko jaasang ɓe shɔng take walikãng. ¹⁶ Aruviya a wu kaabi ko shɔng take vii walikãng, viɓe yii a koolapa ɓɔɔ viɓe yii a koodanga, viɓe shɔng ze kɔtɔ ɓɔɔ viɓe shɔng zeɓa. Kɔ ladongkpanti kɔ gɔmnatiyi kɔ shɔng kaaka naa yii, vii walikãng shɔng take ni wu kaa bii ko. ¹⁷ Wu bibi wu a vii walikãngyi tĩng, awu bii ko vii walikãng wɔ̃ng a yãawe. ¹⁸ Wuko wu yubɔrɔ, a jaka Laa. Wuko wu shɔng tĩng, jaasang a titi shɔng yusa, wuko shɔɔni a titi vii walikãng. ¹⁹ Aruviya tɔ̃re Laa kɔtɔ a bii wu shĩng vii walikãng wu wɔng awu Jaa bii, ²⁰ ɓɔɔ ni wu Jaa kaa bii tɔ̃re vii walikãng awu bii, alaɓe pele wɔ̃ngni lemɓa ni wu kpaa ɓe wu lajisheni, kɔ viɓe a koodanga kɔ ɓe a koolapa. ²¹ Alaɓɔ nɔ sii feefe ɓɔɔ wɔ̃ngni ɓange a sĩngsĩng ɓɔɔ peleni vii nangka. ²² Hami tɔ̃re nɔ ye niwu gigiri bii ni dɔ̃rɔng vɔɔ wu riise nɔ shɔng tɔ̃ving, ɓani rĩngte ɓa, ɓɔɔ jãa ni langseni awu tĩng, ²³ No na watĩng ye nungoko a vusu gn shingni, nɔ shiiye gitĩngi, nɔ de sɔɔ yaa nɔ teni gn ɓa a Laa ruu tɔ̃ɔvĩng ɓe nɔ tãa ɓa, ɓe shɔng waase shɔngɓe shɔng take yii a koodanga mi. Ɓemi ɓi rutɔ̃vĩng ɓe N bibi, Bulusi, N wɔ̃ng jaadɔɔ. ²⁴ Hãmi N tãa puru yato ye ang kpãareni aru nɔni, N bii sɔɔ yiye ni gãasi viɓe sii ɓa ani ɓa a kpãare ɓee Kirisi aru wu bii. wuko shɔng dũngniyi. ²⁵ Aru shɔng dũngni kɔ N rii jaadɔɔ, aru gaani viɓe Laa ang a naa aru nɔni, N sɔ̃re yãa Laa ruu. ²⁶ Ɓemi ɓi vii vɔ̃seni ɓe shɔng vɔ̃seke saa lakop-lakop ɓɔɔ ɓee lakooyi hãmi shɔng tase Laa shɔng kpelenkpeyi ye. ²⁷ Aru yiko Laa sii kaseke wu tase yii vinaa ɓee bɔngni ɓee a vɔ̃seni a titi shɔng ɓe yii sii dũng Laa ɓa, ɓe wuko Kirisi anɔ bii, teni gn ɓee bɔngni. ²⁸ Wo waayãa aru wuni, a gɔ̃ɔ shɔng walikãng shoo ɓɔɔ manteni shɔng walikãng kpɛ̃ɛni, aruɓe woda ware shɔngyi ɓatata a Kirisi bii. ²⁹ Aruviya ɓemi ko N pele shoni asɔɔ kpãare ni wu kaaka ɓe ng pele shongni ang bii ni kaaka.