¹ "Mazũngyi ni Maadayi, nɔ wee shoo pĩng ang yãa shañgni ɓe raani yuu." ² Alaɓe mɔɔ yii tãa ye Bulusi ng shãngsheyi yãa ni yãa Hiburusi, yii wɔ̃ng sĩngsĩngsĩng. A shãng ni, ³ "N ɓi shɔng Yahuda, shɔng yeng a tipi Tarsusi ɓe a vusu koo Silika, N ɓale labini a bɔrɔ ɓundang mi a Gamaliya dɔɔ. Shɔng mantenvi ni dɔ̃rɔ̃ng dũngni ɓee wo daayi rudani. N shĩngni gn kaseni Laa ani vɛ̃ɛni, anaa ɓe nɔng pele hãmi. ⁴ N kpãre shɔng dũngni yii asɔɔ nung yii vɔɔ, N maayi ke asɔɔ ɓaayi dɔɔ a gãya veeye ni sooye walikãng, ⁵ anaaɓe yubɔrɔ Firisi ɓɔɔ gãasi yubɔrɔyi yii daa shãng kɔtɔ ɓe. N tee labini a yii bii aru shɔng dũngniyi ɓe yii a Damasikusi, N sɔɔ waa mɔng ɓi aru N ese yii a yãawe a Urushalima aruɓe shɔng ɓoore yii yoori. ⁶ Waatĩng alaɓe N a dɔ̃rɔ̃ng waani Damasikusi, ɓanijang ɓaseni bɔrɔ ɓengkeni ke a koolapa a ɓengseng a bii. ⁷ N wote a tipi asɔɔ tãa yiri yãa ng gãleng ni, 'Shawulu, Shawulu, Aruu vi mɔng kpãareng viya?' ⁸ N kase ni, 'Mɔko weya, Daayere?' A gãaleng ni, 'Miko Yeso shɔng Nazara, ɓe mɔng kpãare wu ɓe.' ⁹ Shɔngɓe yini mini ɓe yii zee ɓengkeni ɓi, yii de tãa yiri yãa shɔngɓe ng shãng yãa ni mini ɓa. ¹⁰ N tɔni, 'N daa pele viya, Daayere"' Daayere gãaleng ni, 'Yupa ta mɔ ɓo vusu Damasikusi. A mɔng waa ko shɔng gãale mɔ viɓe walikãng ɓe shɔng rɔɔ mɔke mɔ pele ɓe. ¹¹ N de ze mɔng tɔɓa aruviya ɓengkeni ɓi ɓengke vɛ̃ɛni, shɔngɓe wo ni yini yisɔɔ tong a naa, N ɓo vusu Damasikusi. ¹² A mɔng ɓini N kpaa shɔng ɓe wu rĩng ni Ananiya, shɔng yuu ani a rudani ɓe shɔng Yahuda yii shãng yãa tɔ̃ving aru wuni a mɔni. ¹³ A eng bii, a shii ang ka bii asɔɔ gãaleng ni, 'Mazũng Shawulu, kpaa mɔ zeni ta.' Alaɓi ko N ze wu. ¹⁴ Alaɓini sɔɔ shãng ni, 'Wo daayi Laa rɔɔ mɔ ye aruɓe mɔ daa ze wu ruubi, mɔ ze shɔngɓe yii Yato Ɓolongɓo, mɔ sɔɔ tãa yiri yãa ɓe ng ke awu yãa. ¹⁵ Aruu mɔng wɔ̃ng shɔng ani yãa a shɔngzeng yii bii aru viɓe mɔ ze asɔɔ tãa ɓe. ¹⁶ Hãmi mɔng gaa viya? Yupa ta, shɔng pele mɔ batizima, shɔng sɔɔke mɔ ruvĩniyi, mɔ ɓale wu rĩng.' ¹⁷ A tũmpu ɓe N zuse Urushalima ye, alaɓe N de gɔ̃ɔre Laa ni a vusu jaakalaa, zeni suru e a mini. ¹⁸ N ze wu ye ng gãale ni, 'Yupa ta tɛ̃ti mɔ yaa Ursuhalima ni dɔɔni, aruviya ying te mɔ ruu yãa ani aru mini ɓa.' ¹⁹ N shãng ni, 'Daayere, yii ze ye ni miko ng ɓaa shɔng ɓe yii azɔng a mɔ bii dɔɔ a gãyã asɔɔ nung yii a jaakalaa walikãng. ²⁰ Alaɓe Istifanusi kpaa tɛ̃ɛ a tipi ɓe, N shii a mɔni a sɔɔ shĩng yãa jɔ a vusu, ɓi miko gaa shɔngɓeyi nung wu vɔɔ farabi.' ²¹ Asɔɔ gãaleng ni, 'Wata, aruviya N shoomɔ fefe a shɔng ɓe yii de ze Laa yii ɓa bii.'" ²² Yii tãa wu kiti a waa laɓe kese rumi. Yii sɔɔ peng yiri yãa ni kaaka a sɔɔ shãng ni, "Too zɔng shɔng ɓemi ta ni kati a koodang, de liɓa zɔng shɔngɓemi wu wɔ̃ng ni surubini ɓa." ²³ Alaɓe yii de lanke yãani, yii de loke yii fara bini, asɔɔ duu zanbu ni lapa, ²⁴ yubɔrɔ sɔja kɔse yii yãa ni shɔng ese Bulusi vusu mɔng vɔ̃seni ta. A ã yãa ni shɔng waa yɛ̃ɛle wu ta ni nungni, aru ɓe daa tãa ni wu shoo viɓe shĩng ke ying lanke yãa awu yuu a naɓemi ɓe. ²⁵ Alaɓe yii maa wu ye ni dĩngre, Bulusi shãngshe yubɔrɔ shɔng sɔja ɓe shii a mɔni. "Liikɔtɔ shɔng nung shɔng Roma ɓe shɔng de tãa ruvĩni ɓa wu yuu ɓaya?" ²⁶ Alaɓe yubɔrɔ sɔja tãa ye anaɓemi, a waa goro yubɔrɔ sɔja bii, a shãng ni, "Mɔ kase mɔng pele vii hãmi viya? Aruu shɔngvere ɓemi ɓi shɔng tipi Roma." ²⁷ Yubɔrɔ sɔja ɓi sɔɔ e a gãalewu ni, "Gãaleng ta, mɔ ɓi shɔng tipi Roma ya?" Bulusi kase ni, "Ananko." ²⁸ Yubɔrɔ sɔja sɔɔ kosewu ni, "N kpaa wɔ̃ngni shɔng Roma ni saka vɛ̃ɛni," Bulusi sɔɔ gãale wuni, "N ɓi jaa yeni tipi Roma." ²⁹ Ɓanijang ɓaseni ɓa shɔng ɓe yisi kase yii yɛ̃ɛle wu ruu ɓe yii daa wu naa. Yubɔrɔ sɔja ɓi sɔɔ zaa vɔɔ jɔ, alaɓe zeye ni Bulusi ɓi shɔng tipi Roma, aruviya sii maawu naa ye. ³⁰ A diki ɓɔɔ, yubɔrɔ sɔja kaseke wu ze vi nungzeng ɓe shĩngke shɔng Yahuda ying langse Bulusi ɓe. Sɔɔ dawu naa asɔɔ ɓaa yubɔrɔ firisiyi ɓɔɔ shɔng ladongyi walikãng yii muse ke. A lɔɔre Bulusi tipi asɔɔ shĩng wu a yii titi.