¹ Hãmi jaarɔɔkeni ɓɔɔ shɔng dũngni ɓe yii sii a Yahuda yii tãake ni shɔngɓe yii de azɔng ɓa a Laa bii ɓa yii te ruu Laa ye. ² Alaɓe Bituru too koo Urushalima ye ɓe, Shɔngɓe shɔng yeriyi shaye yii shãngke yãa nanka awu yuu; ³ yii shãng ni, "Mɔ ɓase yuu ni shɔng shadĩngli mɔ sɔɔ shaa vishang ni yiniǃ" ⁴ Bituru sɔɔ gaake a gãleyi ruuɓi ni dĩnglini ɓɔkɔkɔ, a tɔɔni, ⁵ N sing gɔ̃ɔre Laa a ɓundang Yafa, anaa loreni N sɔɔ ze a vusu zenitĩng pii ɓɔɔ de lɔɔ tipi ni, anaa bɔrɔ vii kukeni shɔng yaa naa a koo lapa ni wu yãa kati dɛ̃ɛro. Lɔɔ ang bii. ⁶ N ganse ke asɔɔ lere aru viɓi. N ze viyãɓayi ɓe yii dɔɔ kĩni dɛ̃ɛro ɓee kodanga mi, vijĩntiyi, viɓe yii gɔ̃ni buru ɓe, ɓɔɔ jenung ɓee lapa. ⁷ N sɔɔ tãa yiri yãa ɓɔɔ gãleng ni, 'Yupa ta, Bituru; nungyi vɔɔ ta mɔ shakeǃ' ⁸ N shãngni, 'Ɓa ananko ɓa, Daayere; aruviya vii nanka ɓɔɔ vii rinte de ɓong yãa ɓa dɔɔ goro ɓa.' ⁹ Yãa ɓi sɔ pase tɔti a vusu lapa, 'Viɓe Laa rise kpelengkpe, mɔna ɓaa ɓani rĩnte ɓa.' ¹⁰ Viɓemi pase yaa tati, shɔng sɔɔ see viɓiyi walikãng a sɔɔre koolapa tɔti. ¹¹ "Zepĩn, ɓanijang ɓaseni ɓa shɔngzeng tati yii shii a tĩng yee a mɔng ɓe wo sii ani. shɔng shongyi a koo Kaseriya ang bii. ¹² Suru waaseng yãa ni N wata ni yini, ni na vase shɔng ɓa. Mazũngyi maangoro mi yii waa ni mini, wo sɔɔ waa shɔng vere ɓi yee. ¹³ Gãle wo anaaɓe ze Laa jaashoni shii a wu yee a shãng ni, 'Shong veeyeyi ta a koo Yafa yiwa ese Siman ɓe shɔng ɓaa wuni Bituru. ¹⁴ Wuko daa gãle mɔ ruuɓe daa kpengse mɔ ɓe - mɔ ni mɔ shɔngyee yii walikãng.' ¹⁵ Ɓe N gaa shãngni yãa ye ni yini, Suru Laa lɔɔ ayi yuu, anaaɓe lɔɔ jɔɔ a wo yuu a gaani. ¹⁶ N ye nugn ni Daayere ruu, aɓe shãng ni, 'Nungoko Yɔhana pele shɔng batizima ni mɛɛ; nɔ bibi shɔng pele nɔ batizima ni Suru Laa.' ¹⁷ Laa na ayi vii ani ye jɔɔ anaaɓe awo alaɓe wo azɔng a Daayere Yeso Kirisi, miko wee, ɓe N daa leere yãa ni Laa ni weya?" ¹⁸ Alaɓe yii tãa viɓemiyi ye, yide rise yãa ɓɔɔ tɔɓa, yii sɔɔ a Laa bongni a shãngni, "Laa a kɔseni sĩngsĩng shɔngɓe yide zewu ɓa surubi ye jɔ." ¹⁹ Hãmi shɔngɓe sii yii sate aru kpãareni ɓe yupake aru Istifanu ɓe yii danke koo Finikiya, Kibrusi ni Antakiya, yii shãng yãa Laa ni shɔng Yahuda ko shee. ²⁰ Shɔngɓɔɔyi, veeye yii ɓe yii e a Kibrusi ni Kurane, yii e Antakiya asɔɔ shãng yãa ni yãa Giriki, yii waaseyi polo ruu aru Daayere Yeso. ²¹ Daayere naa ayi yuu; shɔngzeng vɛ̃ɛni yii azɔng a sɔɔ Daayere bii. ²² Yii ruubi ɓo shɔng dũngniyi shoo a koo Urushalima, yii sɔɔ shong Baranaba wu waa Antakiya. ²³ Alaɓe eye a ze Laa pãnti a yii bii, tãa tɔ̃ving vɛ̃ɛni a sɔɔ maaseyi gn a gãleyi ni yii wɔ̃ng ta ananko ni sĩngsĩng goro a Daayere bii. ²⁴ Aru wuɓi shɔngzeng tɔ̃ving ɓɔɔ yini ni Suru Laa ɓɔɔ shingnign, ɓɔɔ shɔngzeng vɛ̃ɛni yii shang amɔng dũngni Daayere. ²⁵ Baranaba sɔɔ waa koo Tarisu wu waa bee Shawulu lemlem. ²⁶ Alaɓe kpaawu ye ɓe, too wu ke a ese wu koo Antakiya. A tumpu ɓi, a saa ɓi walikang yii mɔɔ mɔng goro ni shɔng dũngni Laa a mante shɔngzengyi vɛ̃ɛni. Shɔng gaa ɓaani jaadɔɔyi a Antakiya ko ni Kirisa. ²⁷ Hãmi a diki wayi shɔng zenisuru yii ke a koo Urushalima a waa koo Antakiya. ²⁸ Goro ɓɔɔ a yii titi, wu rĩng ni Agabusi, yupa ke a shãng yãa a vusu Suru Laa ni wɔ̃ko ng doo a koodanga walikãng. Vimi waatĩng ananko a Kalaudiya dikiyi. ²⁹ Ananko jaadɔɔyi, anaaɓe yii kaaka ani, yii shong viɓe yii tole ɓe daa yise shɔng zungyi naa a koo Yahuda. ³⁰ Yii pele vimi; yii shongshe shɔngbɔrɔ yii saka a Baranaba ɓɔɔ Shawulu yii naa.