¹ Ruu ɓe N binke shɔɔni, Tiyofulus, N gãle mɔ viɓe Yeso gaa peleni ɓɔɔ viɓe mante ɓe walikãng, ² a waa diki ɓe shɔng too wu a waare wu Lapa, a tũmpu ɓe kɔɔse wu jaa rɔɔni yãa ye ni Suru tɔ̃ɔving. ³ Alaɓe kpãareye, tase wu yuu nung bii nunpa ɓĩng ayi bii ni vizeni vɛ̃ɛni. A titi diki laa ziti tasewu yuu ayi bii a shãngyãa aru Laa koo rooni kpanti. ⁴ Alaɓe kɔseni yini ɓe, a kɔse yii yãa ni yina ya Urushalima ɓa, yi gaa vii ɓe Daa vaase yi, aru viɓe shãngɓe, "Nɔ tãa ye a yãa ⁵ ni Yɔhana pele Batizima nungoko ni mɛɛ, nɔ bibi shɔng pele nɔ ni Suru tɔ̃ɔving a diki pota ɓe, yase a tĩng ɓe." ⁶ Alaɓe yii muse yuu ye ɓe yi yɛ̃ɛwu ni, "Daayere, ɓemi ɓi laɓe shɔng sɔɔre shɔng Israila yi roonikpanti ya?" ⁷ A shãngshe yii ni, "Ɓemi ɓa nɔ ɓe ɓa, nɔ ze la ni diki ɓe Daa shĩng a gn N pele ni wu na ani. ⁸ Nɔng te kaaka a laɓe Suru tɔ̃ɔving lɔɔ ye a nɔ yuu, nɔng sɔɔ wɔ̃ng N shɔng nung shini a vusu Urushelima ni tipi Yahuda walikãng ɓɔɔ Samariya, a waa mɔng ɓe koodanga mike yãa ɓe." ⁹ Alaɓe Daayere Yeso gãale yi vii ɓemi ye, laɓe yi de mile lapa ni, shɔng too wu a lapa, yãasi sɔɔ kuwu a yi nung. ¹⁰ Alaɓe yi shĩng nung ye ziriri a lapa laɓe ing waa ɓe, ɓa ni jang ɓaseni ɓa, shɔngzeng ziti yi shii ni puru fara a bii. ¹¹ Yi shãng ni "Nɔ shɔng Galili, nɔ shĩng nung nɔng mile vii a lapa viya? Yeso ɓe shɔng too wu a nɔ bii a ware wu lapa, ing sɔɔ tɔti ana ɓe nɔ ze wu ing waa lapa." ¹² Alaɓini yii zuse Urushalima alaɓe yii eye a kɔpɔ ɓe shong ɓaani Zaitun ɓe, ni Urushalima ni maani, kĩnni ɓe diki wɔ̃keniyi. ¹³ Alaɓe yii toomɔng ye, yii wa jaka lapa, mɔng ɓe yii wɔ̃ng aniɓe. Yii ɓaseni Bituru, Yɔhana, Yakubu, Andirawu, Filibusi, Tomasi, Bartalamawu, Matiyu, Yakubu Alifa Jaa, Samenu Zilo, ɓɔɔ Yahuda Yakubu jaa. ¹⁴ Yii walikãng yii ayi yuu ye a vii goro ɓe wuko Laa gɔ̃ɔreni, yii ɓaseni sooye yini, Mɛrɛyamu Yeso yingɓi ɓɔɔ zungɓi yii. ¹⁵ A diki wayi Bituru yupa a shi a zungɓi yii titi, rĩng ɓi yi wa 120 (La maangoro), a shãng ni ¹⁶ "Mazung yii, lii kɔtɔ labini wu wɔ̃ngke, ɓe Suru tɔ̃ɔving shãng tɛ̃tɛ̃ a Dawuda yãa ɓe aru Yahuda, ɓe wuko tase shɔngɓe yii yi Yeso ɓe dɔrɔng. ¹⁷ Wu sii goro awo titi, ɓe te dɔɔ yoni jo a mɔng vishoni mi." ¹⁸ (Hami Shɔngmi woo mɔngye ni wu saka ɓe te a dɔɔrɔng nangka, a mɔng ɓiko wote ni yuni, yato sɔɔ wɔngkeyi, wu buruyato sɔɔ ãtee a gaa. ¹⁹ Shɔngɓe yii wɔng a tipi Urushalima yii tãa rumi walikãng, yii sɔɔ ɓa mɔngɓini yii yãako "Akelidama" wuko, "Mɔng Kpaa".) ²⁰ "Anaɓe shɔng binke a Labini Zaabura ni, 'Wu tipi shɔng yaa ananko, shɔngɓɔɔ kɔ goro na wɔ̃ng ɓa a vuzu ɓa'; 'Shɔngɓɔɔ wu tewu ladong bɔrɔ.' ²¹ Lii kɔtɔ, arugoko, shɔngzeng goro a titi shɔngɓe shingwo dɔɔ walikãng alaɓe Daayere Yeso raa vusu ni gaani awo titi, ²² gaa alaɓe Yɔhana pele batizima a e laɓe shɔng too Yeso a warewu lapa ɓe, wɔ̃ng shɔng shĩni nung a wu paa yuni a yusaa." ²³ Yii kese shɔngzeng ziti, Yusuu ɓe shɔng ɓawu ni Barasaba, ɓe shɔng ɓawu tɔti ni Yustu, ɓɔɔ Matiyesi. ²⁴ Yii gɔ̃ɔre a shãng ni, "Mɔko, Daayere mɔko ze shɔngzengyi sĩngsĩng ye walikãng, tasewo shɔngzeng goro ta atiti ɓe mɔ rɔɔwu ɓe ²⁵ ɓe daa te Yahuda wu ladong ɓe yaa a mɔng shoni ɓemi ɓɔɔ wu vipeleni shɔng rɔɔkeni ɓemi ɓe Yahuda yaake a waa wu waani." ²⁶ Yii loke tãngvɔ̃ a yii nung, tãngvɔ̃ ɓi sɔɔ lɔɔ a Matiyesi yuu, shɔng sɔɔ gãawu ni jaa rɔɔkeni kop atu goro yini.