¹ Bulusi, Kirisi Yeso jaarɔɔni ni Laa kaseni aru vaaseni surubi ɓe a vusu Kiris Yeso, ² a Timoti, jaa kaseniː Pãnti, nugnkɔngni, ɓɔɔ ɓatata ɓe a Laa Daa ɓɔɔ Kirisi Yeso wo Daayere. ³ N dɔɔre Laa, ɓe N dũng a maadaa yii bii, ni sĩngsĩng ɓolongɓo, anaa ɓe N yee nugn ni mɔni ang gɔ̃ɔreni zii ni laa ni ⁴ Anaaɓe N yee nugn ni mɔ mɛɛnung ni, N bemɔ zeni, aruɓe N daa pele puru yato ɓe. ⁵ N yee nugn ni mɔ zɔng ani ɓe nungoko ni, ɓe wɔ̃ng shɔɔni ni yinbongwa Loyisi ɓɔɔ ina Afiniki, N a zɔng ye wu hãmi ni mɔni. ⁶ Ɓemi ɓi viɓe shĩngke N yeere mɔ nugn mɔ yuse ani Laa ɓe amɔ bii paa ang shĩngni naa. ⁷ Aruɓe Suru ɓe Laa awo ɓa ɓee vɔɔ zaani ɓa, ɓi ɓee kaaka ɓɔɔ kaseni ɓɔɔ ɓee yini yuu. ⁸ Aru ɓemi mɔna tãa yuusɛ̃ɛ ani yãa ɓa aru wo Daayere, kɔ aru mini, Bulusi, ɓe shɔng maawu a gãyã. Vipeleni wuko, te kpãareni aru ruu tɔ̃ving kaaka ɓee Laa, ⁹ ɓe kpengse wo a sɔɔ ɓawo yãa ɓee ɓolongɓo ɓaani. Pele viɓemi, ɓa aru wo vipeleni ɓa, aru wu vipeleni ɓɔɔ pãnti, ɓe awo vusu Kirisi Yeso aɓe laa de gaa ɓa. ¹⁰ Tɔ hãmi Laa kpengseni shɔng deeye a gaa gbang aɓe tase Kirisi Yeso wo Shɔng Kpengseni ɓe saate nɔ a ese kpeni a zãare vɔɔ aru ruu tɔ̃ving. ¹¹ Aru viɓemi, shɔng rɔɔng shɔng eseni ruu, jaarɔɔni ɓɔɔ shɔng manteni. ¹² Aru ruu ɓemi ko N kpãare viɓemi yii. Aruviya N tãa yuusɛ̃ɛ ɓa, aruviya N ze shɔngɓe N azɔng a wuni ye. N zeye daa kɔng kɔtɔ ni viɓe N yaa a wu naa wu e diki waa. ¹³ Mɔ mante ni viɓe mɔ tãa ang bii ni tenign ɓɔɔ kaseni ɓe yii a vusu Kirisi Yeso. ¹⁴ Vii tɔ̃ving ɓe Laa amɔ a naa dũng ta ni a dɔ̃rɔng Suru Laa, ɓe wɔ̃ng awo bii. ¹⁵ Mɔ ze viɓemi ye, ni shɔngɓe yii wɔ̃ng a Asiya walikãng yii riseng kuku ye. Ayi titi ɓi Fijalasi ɓɔɔ tɔti Hamaja. ¹⁶ Daayere wu tãa Onisifaran yee nungn kɔng aru viya rooreng zãngzãng a sĩnsĩng, de tãa yuusɛ̃ɛ N mani ɓa. ¹⁷ Vipeleni wuko, a laɓe wu sii a Roma, beng kɔtɔ tɔ̃ɔna, asɔɔ kpang ke. ¹⁸ Daayere wu tãawu nugnkɔng a diki waa. Aɓe yiseng naka zĩngzĩni a Afisa, mɔ zeye gbang.