¹ Bulusi, Yeso Kirisi jaashoni ni Laa kaseni, ɓɔɔ Timotawu wo zung, ɓee Jaka Laa ɓee Koronti, ɓɔɔ Laa jaayi ɓeyi tɔ̃ɔving a koo Asiya. ² A Pãnti wu wɔng ni lemɓa a Laa bii wo Daa ɓɔɔ wo Daayere Yeso Kirisi. ³ Laa ɓɔɔ Daa ɓee wo Daayere Yeso Kirisi Dɔɔni mɔ ɓeko. Wuko Daa ɓee gnkɔni yii ɓɔɔ Laa walikãng ɓee maaseni sĩngsĩng. ⁴ Laa maase wo sĩngsĩng a wo kpãareni walikãng, aruɓe wodaa sɔɔ maase shɔng gãasi yii sĩngsĩng ɓe yii a kɔ zɔng kpãareni ɓe weya. Wo maase shɔng gãasi yii sĩngsĩng ni zɔng sĩngsĩng ɓe Laa maase wo ɓe. ⁵ Anaaɓe kpãareni ɓee Kirisi shang vɛ̃ɛni aruu woni, ananko maani sĩngsĩng shang vɛ̃ɛni aruu Kirisi. ⁶ Aruviya Wona ɓoo kpãareni ye, aruu wo maaseni sĩngsĩng ɓɔɔ kpɛngseni; wona kpaa maaseni sĩngsĩng yee, aruu nɔ maaseni ko jɔ. Nɔ maaseni sĩngsĩng wɔ̃ng ni kaaka ni nɔ maani yato ɓee zɔng kpãareni ɓe wo kpãare ɓe. ⁷ Wo gn shiini anɔ yuu ng ziteɓa, aruviya wo zeye anaaɓe nɔng ɓoo akpáreni, nɔng sɔɔ kpa maani sĩngsĩng jɔ anangko. ⁸ mazungyi, wode kase ɓa nɔ wɔng shɔng nung gbãti aru ɓooni kpãareni ɓe wo ɓoo a koo Asiya. Wo ɓoo kpãareni ɓe jãwo kaaka kɔtɔ, ɓe wo bɛ̃ɛwo yuu ni wo suru. ⁹ Nung goko, yoori vɔɔ awo yuu. Aruviya vimi shing wo ke wona shing gn ɓa a wo yuu ɓa. Aruɓe wo shing a Laa bii, wuko yuse vɔɔ pa. ¹⁰ Wuko raawo a vĩnivĩvi kpãareni vɔɔni, wuko N sɔɔ kpengsewo. Wo shini gn awu bii aruɓe wuko daa kpengsewoke. ¹¹ Wuko daa pele vimi aruɓe nɔda sɔɔ yise wonaa ni nɔ gɔ̃ɔreni. A mɔngɓi ko shɔng gãasi ying dɔ̃ɔre Laa aru woni aru pãnti ɓe awo ɓe a shɔng gãasi yii gɔ̃ɔreni . ¹² Wo gɔɔreni ɓi wukoː wo sĩngsĩng taseye wo yise wo yuu ɓatata a koodanga ni ani bɔrɔ ɓɔɔ Laa dũni ɓee nungoko, ɓani ani yuu ɓee kpɛ̃ɛni ɓee koodanga ɓa aruviya ni Laa pãnti. ¹³ Wo de biirenɔ ɓa viɓe nɔ daa ɓaale ɓa kɔ nɔ daa zenung ɓa, N shing gn ye nɔ daa zenung kɔtɔ ɓɔkɔkɔ. ¹⁴ anaaɓe nɔ zewo ye kaago, nɔng gɔɔre kɔtɔ aruu woni a diki ɓee wo Daayere Yeso, anaaɓe wɔ̃ng gɔɔre jɔ aruu nɔni. ¹⁵ Aruviya N azɔnye aruu viɓemi, N sii kase N e nɔ bii shɔɔni, aruuɓe nɔ daa kpa pãnti ɓee ziti. ¹⁶ N sii ɓeeke ng ese nɔ zanti a N dɔ̃ɔrɔng waani Makadoki. A mɔngɓi N kase N ese nɔ zanti tɔti alaɓe N keye a Makadoki, aruuɓe nɔ daa shong ang dɔɔrong waani Yahuda. ¹⁷ Alaɓe N leere anaa ɓemi, ng bɛ̃ɛ kɔtɔ ya? N pele vimi avusu bii, aruuɓe N daa tɔɔni "Ananko, ananko" ɓɔɔ "Ɓa, ɓa" a mɔng goro ya? ¹⁸ Anaɓe Laa ɓolongɓo, wo shangni yãa a nɔbi ɓa "Ananko" ɓɔɔ "Ɓa." ¹⁹ Aruu Jaa Laa, Yeso Kirisi, shɔngɓe Silivano, Timotawu ɓɔɔ N bibi shãng anɔ titi,ɓa a "Ananko ɓa" ɓɔɔ " ɓa." aruviya, wu dikidi "Ananko." ²⁰ Aru Laa vaseniyãa walikãng yii, "Ananko" awu bii. Jɔ ananko ni wu kaa bii wo tɔɔni "Ananko" aruu Laa bongseni. ²¹ Hami ɓi Laa tase wo ni nɔni a Kirisi, asɔɔ awo kaaka, ²² wuko rengsewo vi a watĩng asɔɔ a wo Suru a wo sĩngsĩng anaa ani zɔng viɓe daa e ɓe. ²³ N ɓaa Laa yãa wu wɔng shɔngɓe daa ze N suru aru viɓe shingke N de e Koronti ɓa ɓi sii aruuɓe N daa raanɔ ɓe. ²⁴ Ɓemi ɓa wɔni ɓe wo kase ke wo wɔng shɔng kpanti a nɔ anizong ɓa. Aruuviya, wo walikãng wo shɔng Laa dũni ni nɔni aruu nɔ puru yato, ɓe nɔ shiike anɔ vusu anizong.