¹ Alaɓe N ɛ nɔ bii, mazũngyi, N de ɛ ɓa ni shãngniyãa tɔ̃ɔving kɔ ɓee kpɛ̃ɛni alaɓe N waake Laa ruu nungoko. ² Aruviya N rɔɔke ni nang ze viɓɔɔ ɓa alaɓe ng a nɔ titi naɓa aru Yeso Kirisi ɓa, ɓɔɔ wu ɓaani naa a la ɓa. ³ Ɓɔɔ N sii ni nɔ a vusu jileni bii ɓɔɔ vɔɔzaaani ɓɔɔ a vusu yãngseni bii. ⁴ N yãashãngni ɓɔɔ N waaseniyãa sii yii ɓaani ɓɔɔleni ruu kpɛ̃ɛni ɓa, vizeniwuko ng ɛ ni taseni ɓee Suru ɓɔɔ ɓee Kaaka, ⁵ aruɓe nɔ gnshĩngni daa wɔ̃ng ɓa kpɛ̃ɛni ɓee shɔngzengyi ɓa, vizeniwuko ɛni kaaka ɓee Laa. ⁶ Hãmi wo shãngyãa kpɛ̃ɛni a titi shɔngɓe yii shoo looye, vizeniwuko ɓa kpɛ̃ɛni ɓee koodanga ɓemi ɓa, kɔ ɓee shɔng ladongyi ɓee lami, ɓe ying tuuke kɔtɔ ɓe. ⁷ Viɓe wo pele wuko, wo shãngyãa kpɛ̃ɛni a vusu vɔ̃se nungoko, vɔseni kpɛ̃ɛni ɓe Laa shĩng tɛ̃ɛtɛ̃ɛ alaɓe saayi ɓee wo bongni tee ɓa ⁸ Shɔng ɓa goro a titi shɔng ladongyi ɓee koodanga ɓemi ɓe yii zee ɓa. Na yii zee kɔtɔ yii na de ɓa Daayere shɔng bongni naa ɓa a la. ⁹ Vizeniwuko anaɓe shɔng binke, "Nungɓɔɔ de zee ɓa, shoo ɓɔɔ de tãa ɓa, shɔngzeng sĩngsĩng de lere ɓa aru viɓe Laa gongte aru shɔngɓe yii kase wu ɓe"- ¹⁰ Aruviya Laa tase wo viɓemiyi ni kaa Suru. Aruviya Suru bɛɛ viyi a gaa walikãng, ɓaaseni vii yeeniyi ɓe Laa. ¹¹ Aruviya ɓi we zee shɔngɓɔɔ lereni weya naɓa shɔngɓi suru ɓa? Jɔ anangko, shɔngɓɔɔ ɓa goro ɓe daa zee vii yeeniyi ɓee Laa ɓa naɓa Laa Suru ɓa. ¹² Vizeniwuko wo de tee ɓa suru ɓee koodanga ɓa, wo tee Suru ɓe ke a Laa bii, aruɓe wo daa zee viɓe Laa aa wo yii kɔvɛ̃. ¹³ Wo shãngyãa aru viɓemiyi nii ruuyi ɓani kpɛ̃ɛni shɔngzeng ɓa, vizeniwuko wo shãng ni Suru, wo riise vii suruyi a shɔng suruyi bii. ¹⁴ Shɔngɓe yii suru ɓaniɓa yii tee vii ɓee Suru Laa yii ɓa, aruviya ɓi viwureni a wu bii. Ng zenung yii tooni ɓa aruviya ɓi vii zeni suru. ¹⁵ Shɔng suru ɓoore yoori vii walikãng, vizeniwuko shɔng gãasi yii daa zenung wu ɓooreni yoori ɓa. ¹⁶ "Aruviya ɓi we daa zee Daayere lereni weya, aru wu mangte wu weya?" Vizeniwuko wo lereni ɓi ɓee Kirisi.