¹ Bulusi, Yeso Kirisi ɓaa wu yãa aru wu wɔ̃ng Jaarɔɔkeni ni Laa kaseni, ɓɔɔ wo zũng Sostenesi, ² Shɔng waare shɔngdũngni Laa ɓe yii a Koronti, shɔngɓe shɔng sɔɔkeyiye a vusu Kirisi Yeso ɓɔɔ shɔngɓe shɔng ɓaa yii yãa yii wɔ̃ng shɔng ɓolongɓo, a yãawe ni shɔngɓe yii a mɔngɓeweya ɓe yii ɓaa wo Daayere Yeso Kirisi rĩng, ɓee wu ko yii Daayere ɓɔɔ wo ɓe. ³ Laa wu pãnti ɓɔɔ wɔ̃ngni ɓatata ɓee ke a wo Daayere Yeso Kirisi wu wɔ̃ng nɔ ɓe . ⁴ N dɔɔre Laa alaweya aru nɔ ni aru Laa pãnti ɓe Kirisi Yeso aa nɔ ɓe. ⁵ Wu ko riise nɔ shɔng vinaa a dɔ̃rɔng totok, a yãashãngni, ɓɔɔ zeni walikãng. ⁶ Anaɓe yãashãngni tɔ̃ɔving aru kirisi yuu tase nungoko a nɔ titi. ⁷ Arugoko nɔ viani suru ani anaɓe nɔng gaa keseni ɓee wo Daayere Yeso Kirisi. ⁸ Wu ko N aa nɔ kaakagn wu waa la sɔ̃ɔreni yãa, aruɓe nɔ wɔ̃ng ɓaani ruvĩniɓa a wo Daayere Yeso Kirisi diki. ⁹ Laa ɓe wuko shɔng nungoko, ɓe ɓaa nɔ yãa aru museniyu ɓee wu Jaa, Yeso Kirisi wo Daayere. ¹¹ Hãmi N gɔ̃ɔre nɔ, mazũngyi, ni Daayere Yeso Kirisi rĩng, ni nɔ walikãng nɔ yãa wu wɔ̃ng goro, ɓɔɔ tɔti shɔng naa kpaa vaaseni yuu ɓa a nɔ titi. N gɔ̃ɔre ke aru nɔ ɓaase yuu mɔng goro ni lereni goro ɓɔɔ yãagoro. ¹⁰ Aruviya mazũngyi, N tãa ruuye a nɔ yuu, ni Kuluwi shɔngyee yii yãa ni vaaseni ani a nɔ titi. ¹² Viɓeng kase shangni wu koː Nɔ shɔngɓɔɔyi tɔɔni, "N ni Bulusi," kɔ "N ni Apolosi," kɔ "N ni Kefasi," kɔ "N ni Kirisi." ¹³ Kirisi vaase kɔtɔ ya? shɔng ɓaa Bulusi naa a la aru nɔ ni ya? shɔng pele nɔ Baptizima ni Bulusi rĩng ya? ¹⁴ N dɔɔre Laa ye ni N de pele nɔ shɔngɓɔɔ ɓa goro Baptizima ɓa, naɓa Kiripusi ɓɔɔ Gayusi ko shee ɓa. ¹⁵ Ɓemi watĩngke aruɓe shɔngɓɔɔ na tɔɔɓa ni shɔng pele wu Baptizima ang vusu rĩng ɓa. ¹⁶ (N sɔɔ pele Isitifanusi wu shɔngyeeyi Baptizima. Naɓa ɓemi ɓa, N de ze ɓa kɔ N pele shɔngɓɔɔyi baptizima kɔtɔ ɓa.) ¹⁷ Aruviya Kirisi de shong ɓa N pele shɔng Baptizima ɓa naɓa waaniyãa poloruu tɔ̃ɔving ɓa- ɓa ni waani yãa tɔ̃ɔving ɓa, aruɓe Kirisi wu kaaka jisheni daa wɔ̃ng ɓa kɔvɛ̃ ɓa. ¹⁸ Aruviya ruushangni ɓee jisheni ɓi viwureni a shɔng leseniyi bii. Vizeniwuko a titi shɔngɓe shɔng kpengseyiye, ɓi kaaka ɓee Laa. ¹⁹ Aruviya shɔng binke ni, "N lese kpɛ̃ɛni ɓee shɔngkpɛ̃ɛni. N shĩng ni kaati zeni ɓee shɔngzeni." ²⁰ Shɔngkpɛ̃ɛni wu weya? Shɔngvizeni wu weya? Shɔng kɔngseniyãa ɓee koodanga wu weya? Ɓa Laa ko riise kpɛ̃ɛni ɓee koodanga vi wureni ɓaya? ²¹ Ɓe taseye tɛ̃ɛtɛ̃ɛ ni koodanga a wu vusu kpɛ̃ɛni de zee Laa ɓa. Laa tãa tɔ̃ɔving wu kpengse shɔngɓe yii azɔngye ni kaa wureni ɓee waaniyãa. ²² Aruviya shɔng Yahudayi yii bɛɛ vibizaniyi ɓɔɔ shɔng Girikiyi yii bɛɛ kpɛ̃ɛni. ²³ Vizeniwuko wo waa ɓe Kirisi wu naa ɓani a la, ɓi vi dɔɔ kɔseni a shɔng Yahudayi bii ɓɔɔ viwureni a shɔngɓe siyi dũng Laa ɓa bii. ²⁴ Vizeniwuko a shɔngɓe Laa ɓaa yii yãa bii, ɓaseni shɔng Yahudayi ɓɔɔ shɔng Girikiyi, wo waa Kirisi ana kaakanaa ɓɔɔ kpɛ̃ɛni ɓee Laa. ²⁵ Aruviya Laa wu wureni jãa shɔngzengyi ɓee kɔtɔ, ɓɔɔ Laa wu jilenibi jãa shɔngzengyi kɔtɔ ni kaaka. ²⁶ Nɔ mile nɔ ɓaaniyãa ta, mazũngyi, Nɔ ɓa walikãng shɔngkpɛ̃ɛni ni dɔ̃rɔng sɛ̃ɛbi ɓa. Nɔ ɓa walikãng shɔng kaakanaa ɓa. Shɔng de yee nɔ ɓa walikãng a yee tɔ̃ɔving ɓa. ²⁷ Vizeniwuko Laa ko rɔɔ nankaviyi ɓee koodanga aru wu aa shɔngkpɛ̃ɛni yusɛ̃ɛ. Laa rɔɔ viɓe kaakaa ɓaniɓa a koodanga aru wu a vikaaka yusɛ̃ɛ. ²⁸ Laa rɔɔ viɓe tɔkɔlɔng ɓɔɔ viɓe ɓa tɔ̃ɔving ɓa a vusu koodanga. Wu sɔɔ rɔɔ viɓe shɔng zee ni ɓa tɔ̃ɔving ɓa, aruɓe daa riise ɓa tɔ̃ɔving ɓa viyi ɓe shɔng too ni yii tɔ̃ɔving. ²⁹ Pele viɓemi aruɓe shɔngɓɔɔ ɓa goro ɓe daa kpaa vigɔɔreni a wu watĩng ɓa. ³⁰ Aru viɓe Laa pele ɓe, nɔ hãmi a vusu Kirisi Yeso, shɔngɓe rii vikpɛ̃ɛni aru wo ni a Laa bii. Wu ko rii wɔ̃ngni yato ɓolongɓo, wɔ̃ngni tɔ̃ɔving ɓɔɔ wo raani yuu. ³¹ Aɓe tase, anaɓe shɔng binke, "Shɔngɓe na kase gɔɔreni, wu gɔɔre a vusu Daayere"