¹ Mwana wa maana akathzibilila kulongetha cha ishe, oloni muka kushendumuna kathzibilila kumubyanetha. ² Kutunda kubushuka bwa kanwa kendi munu alithzibitha bwino byuma bya bibwa, oloni chashu chamuka kwilika likulahelo awana bukenya. ³ Ou akanyungu kanwa kendi akanyungu mwonyo wendi, oloni ou ashokolola milungu yendi manene alonyongetha ibenya. ⁴ Chashu cha munu wabulwa akathsila oloni nebi awana byahi, oloni chaashu cha munu wakulayana akawanenamo mukushula. ⁵ Munu wabuthunga athzinda majwi akukwitha, oloni munu wa bibi alithambetha ibenya, nakupanga byuma bya shwamwa. ⁶ Buthunga bukanyungu baje nubethi na kuluwitha mubingila byabo, oloni bibi bikanyongetha baje bakalingi bubi. ⁷ Kuli umo munu ou akalipititha ibenya, oloni kethi nambe nachimo, cho kuli umo munu ou akana kubakwabo byuma byoshe, oloni ali nabufuko bwakutuma. ⁸ Fweto ya mwonyo wa mukakufuka yapwa bufuko bwendi, oloni munu wakuyanda kethi kuthziba bya kumuthzibitha lyoba. ⁹ Chheke cha banu babuthunga kubwahelela, olni ndeya ya banu ba bibi bakaithzima. ¹⁰ Kulithziba chikanene lika kulibyanangana, oloni kuli baje bakathzibilila ku bukwathi bwabubwa bakawana maana. ¹¹ Bufuko bukanyongo ngwe kukwethi buthunga, oloni ou atonda bimbongo kwitila mukupanga na maboko endi anenetha bimbongo byendi kukola. ¹² Omwo kutalelela bachinungulula, chikatabula mbunge, oloni kushungwiya chakushulithiwa chapwa chiti cha mwonyo. ¹³ Ou woshe alimbulula bilongetha alinenela ibenya ñababa, oloni ou athingimika mashiko bakamufweta. ¹⁴ Kulongetha cha munu wa maana chapwa kabwelubwelu ka mwonyo, kukutengulula kutunda kumakambwila a buthsi. ¹⁵ Kunangula kwakubwa kukawana kutetela, oloni bingila bya wakwilika buthunga byapwa kunyonga. ¹⁶ Banu bakufwila bakapanga nakuthzibuka mubithinganyeka byoshe, oloni wathinama akalitumbikila bulema. ¹⁷ Kanganda wabibi akawila mubukalu, oloni banu ba likulahelo bakanene kulikangula. ¹⁸ Ou aliula bilongetha akakala na kuyanda na shwamwa, oloni bulemu bwija kuli ou alilongethela kukumwolola. ¹⁹ Kuwana chashu chakushungwiya chatobala, oloni kutenguluka kutunda ku bubi chapwa kushaula kuli bilema. ²⁰ Enda na banu bamana cho upwa na maana, oloni buthamba bwa bulema buwana kunyonga. ²¹ Bukalu bukashatuka na bubi, oloni banu babuthunga babafweta na bubwa. ²² Munu wa mubwa akathethze buthwana bwa batekulu bendi, oloni bufuko bwa muka bubi bakabutulikila munu wa buthunga. ²³ Lihya lya mukakuyanda lyakujeneka kulima lyatha kutuhula kulya chachingi, oloni balyambata na kubatula chachibi. ²⁴ Ou woshe elika kupangetha chibathzi chendi athzinda munendi, oloni ou athzema munendi akako maana nakumulongetha. ²⁵ Munu wabuthunga akali kweta nomu anenetha chashu chendi, oloni lifu lya munu wa bibi litwalelela kupwa na njala.