¹ Uje woshe ajanga kumwolola nathzange mangana, oloni uje athzinda kumwolola napu wakujeneka mangana. ² Yehoba akana ñeke kuli munu wamubwa, oloni akajola munu apanga mangan a abubi. ³ Munu katha kuyoya mukila bubi embwe, oloni wakwoloka kubatha kumutukula. ⁴ Munakathzi wamubwa napu chilongo cha munalume wendi; oloni uje anena shwama napu ngwe mushongo wakubola wa mu bitsiya byendi. ⁵ Bithinganyeka bya muka kwoloka byapwa bya bibwa, oloni kunangula kwa muka bubi kwapwa kwa makuli. ⁶ Majwi abanu baka bubi anapu aku bandelela nakutungumuna mangana abandamena kwitila maninga, oloni majwi abuthunga banyunga kupwa ba kwoloka. ⁷ Banu babubi baka ba tundithaho na kuya bakaya, oloni njubo ya wakwoloka ikemana. ⁸ Munu baka mushangala kundakwithzi ya tunwa twendi, oloni mbunge ya bulema bakaikenga na kuishaula. ⁹ Cha chibwa munu wa mwela waundondo uje ali na ngamba kutubakana uje ali lemetha babenya oloni kethi na bya kulya. ¹⁰ Munu wakwoloka aka babalela biba tonda bimuna byendi, oloni bithinganyeka bya muka bubi byapwa bya bukenya. ¹¹ Uje apanga mulihya lyendi akakala na byakulya bya bingi, oloni uje woshe ashaka chipangi chakuhona nganyo kethi na mangana. ¹² Munu waku bulumuna akali shungwiya bije byana pukula muka bubi mukwabo, oloni wa kwoloka mithzi yendi yapwa ya kola. ¹³ Muka kubulumuna akalitela nganjo mundakwithzi ya kanwa kendi babenya, oloni munu wa kwoloka akalitundithamu bukalu. ¹⁴ Kutunda kubushukwa bwa majwi awa munu akashulu na byuma bya bibwa, ngwe muje bipangi bikapanga maboko endi aka mufwete. ¹⁵ Ngila ya chilema ya ibwa mu mesho endi babenya, oloni munu wa mana atolilila kuli baka kumunangula. ¹⁶ Chilema aka mwetha kutenuka chendi lumo lika, oloni uje aka lumbilitha matuka wapwa wa mangana, ¹⁷ Uje endeka bya buthunga endeka bije bya bibwa, oloni mukaleo wa makuli aka bulumuna. ¹⁸ Majwi auje endeka mwa kukaluka anapu ngwe kubambuka kwa moko ya mukwale, oloni ndakwithzi ya uje ali na mana ikanena chihindu. ¹⁹ Ndakwithzi ya buthunga ika thimbula myaka yoshe, oloni ndakwithzi ya makuli ya kathimbu ka kandondo. ²⁰ Muli kubulumuna mu bimbunge ya baje bali na kuthinganyeka kulinga bubi, oloni kubwaelela kukaija uje akanangula kwoloka. ²¹ Kukwethi mushongo ukeja ali muka kwoloka, oloni baka bubi bana shulitha natu yando. ²² Ndakwithzi ya makuli yapwa kubulumuna kuli Yehoba, olonu baje bayoya mukukulaela bakebo banu bendi bashaka. ²³ Munu wa mangana amabwa aka shweke mana endi, oloni mbunge ya chilema ika tambana bya kasautu. ²⁴ Liboko lya ku panga manene lika yulu, oloni banu ba bulwa baka bathindiya kupanga. ²⁵ Chishoti cha mumbunge ya munu chika mwilwitha athi, oloni lijwi lya libwa lika munenela kubwaelela. ²⁶ Munu wa kwoloka aka nyungu kabuthamba kendi, oloni ngila ya muka bubi ika batwala kukuthzimbala. ²⁷ Banu ba bulwa ku bakawana biba shakethzeka embwe, oloni munu wa mangana akatambula bufuko bwa ku bethzika. ²⁸ Baje benda mungila ya buthunga baka wana monyo cho mungila yayo kumwethi kuthsa embwe.