¹ Malombelo a Hambakeke uje kapolofita: ² Yehoba, Njinathzibi muthzimbu wobe, cho njili na lyoba. Yehoba, indula chipangi chobe mukati kabino bithimbu; mukati ka ino myaka echela baithzibuke; anuka kupwa na chikeketima ku matoto obe. ³ Njambi wethzile kutunda ku Temani, cho nou wakuthzila kutunda kumalundu a Palani. Sela Bu mpau wendib bwafwikile melu, cho kaye kashulile na kumulemetha. ⁴ Nakumunika ngwe chije cha linongo, kubyathzima cha kutiba lubali kutunda mu liboko lyendi; mukeko ashwekele nthzili yendi. ⁵ Mushongo wakama waile kuli likeye, cho na mushongo watuhukile ku mendi endi ⁶ Wemanene na kupethzeletha ka; wakengele na kunikitha mafuti. Nambe malundu a mukati abujukile. Cho ije minkinda ya myaka yoshe athiwile hathi. Ngila yendi ya haya myaka. ⁷ Cho njamwene aje ma tende yaku Shani mu bukalu, cho binanga bya ma tende a mulifuti lya Mindiyani ali na kujaja. ⁸ Nkuma Yehoba walubalele kuje ku bindonga ndi? Nkuma matoto obe akele ku bindonga, nameme kuthzibitha lyoba chakele ku kalunga ndonga, omwo wendelelele ha kabalu na likalu lyobe lyaku hyana? ⁹ Unatuhula buta bwa manana chakujeneka chifwiko; aka mikili yobe ku buta bwobe bwa manana! Wandunwine kaye na bindonga. ¹⁰ Malundu akumene na kulifutungula mu mishongo. Bishali bya meema byetile hali yobe; kalunga ndonga wakuloba watubwile kutambekela. Wajundwile maboko acho. ¹¹ Lithatha na ngonde byemanene hamo muje mu myela yabyo ya helu omwo cheke cha mikili hathimbu imbululuka, muku byakula cha kubyathzima cha likunga. ¹² Munendela hathi na kulubala. Mu matoto munajungula lifuti. ¹³ Mwatulikile ha mulonga wa bwoboke bwa banu beni, hamulonga wa baje mwabwabetha. Munawitha mutwe wa njubo yaba babibi hathale hamupolongwa kutunda kwithi na kweta ku thingo. ¹⁴ Munasha mutwe wa bakakulwa bendi na makunga abo babenya hakupwa bthzile ngwe lihunthzi lyakam na kutwandununa; kupwithamo chabo chakele ngwe umo ou alya chihutu mu mwela wa kubanda. ¹⁵ Unendela ha kalunga ndonga na tubalu twobe, na kukungulula aje meema a mangi. ¹⁶ Njathzibile, cho mutambela wange wamukati wajajele! Tunwa twange twaningangele ha kwohya. Kuthsita ku kaija mu bithsiya byange, cho mwithi yange babenya nja jajele hathimbu nji bandamena litangwa lya chikela likaije hali banu baje batukobelela. ¹⁷ Nambe muti wa mukuyu kuwemine cho kukwethi kwima cha kutunda ku miti; cho nambe kwima cha muti wamu olibe unonowa cho mahya kuwatuhwile kulya; cho nambe butanga babubatula kutunda ku limba cho kukwethi bingombe muma chakana, ebi bikebyo nji kalinga. ¹⁸ Chipwe ngocho, Njikakinina muli Yehoba. Njika jolela ha mulonga wa Njambi wa bwoboke bwange. ¹⁹ Mwene Yehoba napu kutubakana change cho akapanga mendi ange kupwa ngwe shonge. Akanjilingitha kuya kulutwe ha myela yange ya helu—Kuli mukakutwamenena kwimba, ha bithanthzi byange bya tulyalya.