¹ Buje bupelofeto amwene kapolofeta Hambakuku. ² "Yehoba, thimbu ya kweta hali injikalilila bukwathi, oloni kumwathele kuthziba? Njili na kulilila kuli yobe, 'Bukenya!' oloni kumupanga embwe. ³ Bika muli na kunjilingitha kumona bya manthzilo na kunjinenetha kutala hali bakakulinga mwamubi? Ng'ababa na bukenya bili ku mesho ange; kuli kujokota, cho kujeneka kulithzibathana chinakukatuka. ⁴ Ngachije lishiko banalithzeyetha, na kuthompa chachibwa kuchethi na kwishwala thimbu ili yoshe. Mwafwa ba bubi banathzenguluka baka buthunga; ngachije kuthompa cha kujeneka buthunga; chikeko chinakusholoka." ⁵ "Kenga ku mafuti na kuwamonetha; pwa wakukithiwa na kulikomokela! Mwafwa chili bene njilingaho chuma chimo mu matangwa obe ocho kuwatha kutabela nga bana chambuluka kuli yobe. ⁶ Mwafwa kenga! Njili hayehi na kwindulabaka cha Chalundiya— lije lifuti likathzibitha lyoba na kapanga bwathi —bana kwenda kwita mwoshe mu bwihi bwa lifuti nakunyeka membo aje ku wapwile abo. ⁷ Bapwa ba kukathumwitha na kuthzibitha lyoba; kubatula chabo na bubwa bikatundu muli bakebo. ⁸ Tubalu twabo lalo bakashatuka bwathi kutubakana ba ingwe, bwathi kutubakana libwakuti wa mangwethzi. Cho tubalu twabo bakanene miyhindo, cho banu batubalu bakatundu halyala manene— bakambululuka ngwe ngonga ashatukila kulya. ⁹ Boshe bakaija na bukenya; mayongomena a banu babo akai ngwe lihuthzi lya mu ñulundu cho baka kungulula bithzinda ngwe mushekesheke. ¹⁰ Cho ba kashendumuna bi myene, cho bakakuyula banapulika ngwe kubashendumuna. Bakajola oku kubatakamena kwoshe, mwafwa bakalundika mabu na kuwambata. ¹¹ Cho lihunthzi lishatukilaho; lyenda na kwita— banu ba milonga, baje thzili yabo inapu ka njambi kabo." ¹² "Nkuma kuwatundile ku thimbu ya laja, Yehoba Njambi yange, obe wange wakathzila? Kutukathsi embwe, Yehoba nabangwila mangana bakaba batwile milonga, cho nobe, libwe, njinabukako mangana babolole. ¹³ Mesho obe anajele manene athe kumona bubi, cho kumwatha kukenga ha bilinga bya kuluwa na kutetela embwe. Mwafwa bika oni munakengela na kutetela hali baje bakende bungungu? Mwafwa bika oni munolekela hathimbu banu ba bibi bana kuliwitha baje bakuthungama bakebo. ¹⁴ Mukapwitha banu ngwe bithi mu kalunga ndonga, ngwe byuma bikakalaba bya kwilika muka kubayula. ¹⁵ Akabanene boshe helu na kalobo; akakokela banu kweka mu bwanda bwendi; akabakungulwila hamo mu bwanda bwendi bwa likokela, cho akakininina na kubwahelela. ¹⁶ Ngachije akalyana ku bwanda bwendi na kwenyeka isense ku likokela lyendi, mwafwa kwitila mu bwanda bwendi mukemo mwakuyoyela bwino, cho byakulya byendi binapu muyati wa byabibwa manene. ¹⁷ Cho ngachije akatwalelela kutundithamo mu bwanda bwendi, cho akatwalelela kuthsiya mafuti chakujeneka kubathzibila ñeke ndi?"