¹ Lubindalkwa kama kuli nganda ya banu baje baka kubyana kukabangeya mu a nai mashiko! Chojo chili bene ina nyongo ei nganda ya bukenya. ² Kuyatolilile ku lijwi lya Njambi, ina byana ku inangula kuli Yehoba. Kuyethi na lukulahelo muli Yehoba cho ngechi kuyatha kushwenya kuli Njambi yayo. ³ Bana ba bimyene muli ikeyo banapu ngwe bindumba baje bali na kukumbula mukati kayo. Baka kuyongola milonga ba muli ikeyo banapwoni ngwe baje tungunga baka yombo mangwethzi na kulya byoshe a thimbu bene imo na kamo ka kulyaula mutondo. ⁴ Chojo na tupolofita bayo bakala na likamba na kubyana kwononokela baje baka kubaandama. Tupilisitu bayo bana shaula bije bya kuthzila na kwalumuna mashiko mu ngila ije kethi ikeyo. ⁵ Nameme ngocho Yehoba wakala mungulu mukati kayo. Ikeye katha kulingako nambe chimo cha chibi embwe. Mutondo na mutondo a ka lingi bije bya ku sholwetha bumpau bwendi! Chojo na bumpau wendi ku bukaka banda muje mu lyethzi, olojo uje mungulu kethi kuthziba shwamwa ku bilinga byendi bya bibi. ⁶ "Njanyongetha mafuti; bimpaka byao bina nyongo. Nji nalumuna bitapalo byao kupwoni bingundu, ngechi naumoni wai lalo ya atha kwitamo muje. Binganda byao bina nyongo njwa ngechi na umo lalo wai ya atha kutumbamamo muje. ⁷ Chojo njendekele ngwange, 'Chili bene mu nji thingimikoni. Tabeni ku minangula mangana bije binjina thinganyeka kulinga kuli yeni kethi bi mi fumithe mu binjubo byenu! Olojo bakebo mutondo na mutondo bakele na kulinga bya bibi byabingi kutubakana bije balingile kunima. ⁸ Chojo nji bandameneni— mukemwoni mwa nendeka Yehoba— kweta na a litangwa lije linji ka katuka na kukwata wa kulya. Mwafwa njina yongola ku kungulula hamo mafuti, kunena amolika binganda bya bumwene, mangana njitile ali bakebo kunyengwa change—matoto ange oshe; ngechi bene lifuti lyoshe lyenye tupunu na tuya twa bukalu bwange. ⁹ Olojo nameme ngocho nji ka toketha na kuthzilika tunwa twa banu bange, mangana boshe ba kathe ku thanoni lithzina lya Yehoba na ku mu pangela hamolika umo na mukwabo. ¹⁰ Kutunda bene mu thambwa lya ndonga Kushi baje baka kunji lemetha —banu bange baje ba shandokele—ba kanji nenela milambu ije inanji pande yange. ¹¹ Chojo litangwa lije kuba ka mithzithoni shwamwa lalo a mulonga wa bilinga byeni byoshe bije bya bibi bimwa lingile kuli yange embwe, mwafwa a thimbu ije nji ka fumitha a kati keni baje bakele na ku lyaletha mukuli shangala kwobe, cho lalo mwafwa nobe nawa ku uka lingioni byuma mwaya mbunge yobe aje a lilundu lyange lya kuthzila. ¹² Olojo nji ka thethza akati keni baje ba kuli keetha na tuutu, chojo ba ka wana ku yoboka mu lithzina lya Yehoba. ¹³ Olojo ajoni mathalela a Isalela kuba ka lingi lalo bya bibi indi nambe kwendeka makuli embwe, chojo na ndaka ya kukwitha ku ba ka wana mutunwa twabo embwe; ngechi bene ba kakya na ku tumbama athi, cho na umo wai ya ku ba tewetha." ¹⁴ Imba, yobe mwana wa munakathzi wa mu Ziyoni! Tambekela, Isalela. Bwahelela na ku lithamba na mbunge yobe yoshe, yobe mwana wa munakathzi wa mu Yelusalema. ¹⁵ Mwafwa Yehoba na fumithao kashiko kobe; na shekela kulyala bitothzi bobe! Yehobe ikeye mwene wa Isalela ali akati keni. Chojo na litangwa lalo lyai limuna pande ku tewa bubi nambe bumo! ¹⁶ Ngechi mu litangwa lije bakendeka kuli Yelusalema ngwabo, "Kethi uthzibe lyoba, Ziyoni. Kethi wechele maboko obe ngechi a thzeye embwe. ¹⁷ Yehoba Njambi yeni ali akati keni, ou wa nthzili ngechi a ku yoyethe. Alithamba na kubwahelela ali yeni; amyoletha na chithzamo chendi. Chojo a ka imba na kujolela a liyeni. ¹⁸ Ngechi njika kungulula amo baje bali na buthiwa, baje ku batha kuya ku bilika bije bakako laja, mangana kethi muka thzibe lalo shwamwa a mulonga wa kwonwa kweni. ¹⁹ Kachikengeni, ololo bene ngachije nji nyanyametha baje boshe baka ku mi yandetha. Athimbu bene ije chonji nji yobola bilema na ku kungulula amo baje ba shekela ku lyala. Chojo nji ka bangula ku kaloni na mathzina a bumpau, na kutengulula mathzina abo a shwamwa ku kaloni a kathingimiko mu lifuti lyoshe. ²⁰ A thimbu ije nji ka kungulula amo lika. Cho njika myana bukama na kathingimiko a kati ka banu boshe ba mu kaye a thimbu ije inji ka milwitha kutunda mu bunomo oku na mesho eni ali na kumona bene echi," ku kekwoni kwendeka kwa Yehoba. + 8