¹ Eli likelyo lijwi lya Yehoba lije lyethzile kuli Zefaniya muna Kyushi muna Ngendaliya muna Amaliya muna Hezekiya, mumatangwa a Yosiya muna Amoni, mwene wa Yunda. ² "Njikanyongetha byoshe bene kutunda ha kamwa ya kaye— echi chinapu kuhwitha cha Yehoba. ³ Njikanyongetha banu na tuthitu; Njikanyongetha tuthzila ba mwilu na bithi bamu kalunga ndonga, bakulilula hamo nabaka bibi. Mwafwa njikabatulako munu kutunda hakamwa lya kaye— echi chinapu kuhwitha cha Yehoba. ⁴ Njikatandubwila liboko lyange hali Yunda na batungithi boshe ba Yelusalema. Njikabatulako bathaleleho boshe ba Mbale kutunda ku mwela ou na mathzina a banu batumonya hakati ka tupilisitu, ⁵ banu bakemana hakamwa ya binjubo nakulemetha mibila ya mwilu, na banu aba bakalemetha na kulithinga kuli Yehoba oloni lalo bakalithingila hali mwene wabo. ⁶ Njikabatulako lalo baje banatenguluka kutunda kukukabangeya Yehoba, baje kubethi kuthetela Yehoba nambe kulomba kutwamenena chendi." ⁷ Lyolwetheni ku mesho a Shukulu Yehoba! Mwafwa litangwa lya Yehoba lili hayehi; Yehoba nabwahetha mulambu na kushakula bangethzi bendi. ⁸ "Chikasholoka ha litangwa lije lya mulambu wa Yehoba, olyo njikashitika banu ba mwene na banu ba mwene ba banalume, na banu boshe bakathzala mu buthzalo bwa bungethzi. ⁹ Hali lije litangwa njishitika boshe baje bakendela ha bipamba baje bakashulitha njubo ya Shukulu yabo na bukenya na makuli. ¹⁰ Cho chikapwa ngechi hali lije litangwa— echi chinapu kuhwitha cha Yehoba— omwo ku Kuchikolo cha Ithi kukatunda kulila cha buthiwa, kulilila ku mbongi ya muchibali, na kwohya chakama cha kubujuka kutunda ku minkinda. ¹¹ Lileni, eni batungithi ba mbongi ya kulandethela, mwafwa banu boshe ba kanana ba kababihitha; boshe baje bakapethzeletha siliva bakababatulako. ¹² Chikaija na kusholoka hali ije thimbu omwo njikambata ndeya na kushakethzeka mu Yelusalema na kushitika banu baje banatumbama mu kupenda chabo na kwendeka mu bimbunge byabo ngwabo, 'Yehoba kapanga nambe chimo, chipwe cha chibwa nameme cha chibi.' ¹³ Bufuko bwabo bukapwa bwa kupukula, na binjubo byabo bikapwa bingundu bya kuthethza! Bakatunga binjubo oloni kubakayoyelamo, na kukuna mahya amishuka oloni kubakanu binyu byacho. ¹⁴ Litangwa lyakama lya Yehoba linashwene muyehi, muyehi cho linakushatuka bwathi! Kwohya cha litangwa lya Yehoba likapwa ngwe kulila chakama cha muka kulwa! ¹⁵ Lije litangwa likapwa litangwa lya kulubala chakama, litangwa lya buthiwa na kunyengetela, litangwa lya kubihitha na kunyongetha, litangwa lya lithuthulungu na kuthzibala, litangwa lya mashelwa na lithuthulungu lyakama manene. ¹⁶ Likapwa litangwa lya bimbinga bya nkomba ya maanga na lupembo ku binganda bya mubimpaka na kulwa cha helu. ¹⁷ Mwafwa buthiwa hali munu, mangana bakendangane tupuputwa hakupwa banabulumuna kuli Yehoba. Baketila kuli maninga abo ngwe likungu na bilyo bya mukati ngwe bwilo. ¹⁸ Siliva nambe ngolinde yabo kuikatha kubathzitula embwe halitangwa lya kulubala cha Yehoba. Kaye koshe bakakanyongetha na tuhya twa chipululu chendi, mwafwa akanena kumanuthula, mamanethelo akama abatungithi boshe baha kaye."