¹ Cho alitangwa lya mumakumi abali na matangwa awana amungonde eyi bene banu bamu Isalela baba kungulwile cho batokethele kulomba njala, cho bathzalele buthzalo bwa kulililamo na kulyaka likungu ka mitwe yabo. ² Cho bakakulwila baba Isalela balyangunwine bakebo babenya kutunda kuli metandinda boshe. Cho bemanene na kulyana ku bubi bwabo na bilinga bya bubi byaba kakulwila babo. ³ Cho bakatukile mu byela byabo, cho batandele bithimbu biwana alitangwa mu mukanda wa lithiko wa Yehoba Njambi yabo. Cho bithimbu biwana bikwabo wa alitangwa bakele nakulyana naku fukama hathi ku mesho a Njambi yabo. ⁴ Baka Lebiti, baka Jeshwa, baka Kandimyele, baka Shembaniya, baka Mbuni, baka Shelembiya, baka Mbani na baka Kenani, bemanene elu nakuthana na lijwi lya kulambekela kuli Yehoba Njambi yabo. ⁵ Choni baka Lebiti, Jeshwa, na baka Kendimyele, Nbani, Hambuneya, Shelembiya na baka Pethahiya, bendekele ngwabo, "Katukeni na kwana kushangathzeka kuli Yehoba Njambi yeni myaka yoshe." "Bakwithwule lithzina lyeni lya kuhyana cho lipwe lya kutsimana helu lya kukwithwila kwoshe na kushangathzeka. ⁶ Yobe Yehoba. Yobe lika likalyobe. Yobe wapangele lilu, mwilu mwamulaja, na byoshe bya kalamo, na athi byoshe byakalao, na tulunga ndonga na byoshe bije bya kalamo. Wukana monyo kuli boshe, na baje ba mwilu baku shangathzeka. ⁷ Yobe Yehoba, Njambi uje wangwile Abilamu, na kumutunditha mu Uli waba Kalindeya, naku mwana lithzina lya Abilahama. ⁸ Cho wawanene mbunge yendi kupwa ya lukulaelo ku mesho obe, cho wapangele nendi chikumiiyo chakwana kuli bakakulwila bendi ku Palizita, ba Jebusite na baka Ngiligashite. Cho wanyungu chikumiyo chobe mwafwa wapwa wabuthunga. ⁹ Wamwene tuyando twaba kakulwila betu mu Ingito cho wathzibile kuli kwabo mu kalunga ndonga wa kubenga. ¹⁰ Cho wanene bimwetho bya kukomwetha Falao, na bingamba bendi boshe, na banu boshe ba mu lifuti lyendi, omo wathzubukile ngwobe baka Ingito baba thinamethele. Oloni wapange lithzina lyobe babenya lije linemanetha alitangwa eli. ¹¹ Cho wangunwine kalunga ndonga ku mesho abo, cho mangana baite mukati ka ndonga kalunga halibu lya kuma; na baje baba kabangeyeye babombilile mwakuloba, ngwe limanya mu mema akuloba. ¹² Cho watwamenene na nguthzi yali shelwa athimbu ya mutanya, na nguthzi ya tuhya athimbu ya matski na nakutetekela mungila ibayamo. ¹³ Alilundu lya Sinai washulukile cho wendekele nabo kutunda mwilu cho wanene majwi akujela kuli bakebo na mathiko abuthunga, bing'anda bya bibwa na mathiko. ¹⁴ Wapange litangwa lyobe lya kuthzila lya Sabata kuli thzubuka kuli bakebo, cho wabanene mathiko na bing'anda na lithiko kwitila muli ngamba yobe Mosesa. ¹⁵ Cho wabanene likende lya kutunda mwilu kunjala yabo, cho wendekele kuli bakebo ngwobe baye nakutambula lifuti walishikile kubana achithingo. ¹⁶ Oloni bakebo naba kakulwila betu babatengulukilile, na kukoletha bitsingo byabo cho bonowele kuthzibilila mathiko obe. ¹⁷ Cho babyanene kuthzibilila, cho kubathinganyekele ali bikomowetho bije wa lingile ali bakebo, oloni bakolethele bitsingo byabo, cho mutuyando twabo bangwile twamena wakubelwitha mu bundungo bwabo. Oloni yobe Njambi washula nalukonekelo, bimpau na chikeketima, ukathimbula mukutenuka, nakukala na bithzango bya kama manene. Cho kubawechelele embwe. ¹⁸ Nambe bamungile muna ngombe wakuthothonona kutunda ku butale na kwendeka ngwabo, 'Ou ikeye Njambi yeni uje wamitundithile mu Ingito,' na kumilinga likamba lyakama manene, ¹⁹ yobe mungithzi yobe, kuwabechelele mu mambo embwe. Na nguthzi ya lishewa lya kubatwamenena mungila kulya tundileko embwe athimbu ya mutanya, nameme nguthzi ya tuhya twa butsiki twa kubamwetha mungila yabo kutwa tundileko embwe. ²⁰ Munthzinthzime wobe waubwa wabanene wakuba nangula, na mana obe kuwawanene kutunda mutunwa twsbo embwe, cho wabanene mema a lihwila lyabo. ²¹ Akati ka makumi awana amyaka wakele nakubana mu mambo cho kubonowele chimo chai. Buthzalo bwabo kubwa tabukile embwe na myaja kuyathzimbile embwe. ²² Wabanene binganda, na kubapangethzela bimbango byoshe bya lifuti. Cho bambatele bufuko bwa lifuti lya Sihoni mwene wa Heshimboni na lifuti lya Ongi mwene Mbashani. ²³ Cho wapangele bana babo kubalanetha ngwe bingongonothi bya mwilu, cho wabanele mulifuti lije walekethele ba kakulwila kuyamo na kufuka. ²⁴ Cho banu baile na kufuka lifuti nakulyana ku mesho abo kupwa lyabo bayoyela mu lifuti, baka Kanana. Wabanene mu maboko abo, amolika na mwene wabo na banu balifuti, mangana Isalela a linge nabo bya bibwa bibashaka. ²⁵ Baba tambwile binganda byakele nabithzango na lifiti lya bwilo na kwambata bufuko bwa manjubo byakushula na byuma bya bibwa, mathima abendile chimweja, mahya abinyu na mahya a olibe na miti ya bishuka bya bingi. Cho balile na kukuta na kwana mukukola cha balibwahethele babenya mububwa bwobe bwa kama manene. ²⁶ Cho kuba lyononwethele embwe cho ba kutengulukilile. Cho bombilile lithiko lyobe kubinima byabo. Cho batsihile tupolofita bobe baje babanangwile kwiluka kuli yobe, cho balingile likamba lya kama manene. ²⁷ Cho wabanene mumaboko abitothzi byabo, baje babayandethele. Muthimbu yaku yanda chabo, balililile kuli yobe, cho wabathzibile kutunda mwilu, cho mwafwa mung'eke yobe ya kulyana manene wa batuminine bakaku bayobola baje baba yobwele kubatunditha ku maboko abitothzi babo. ²⁸ Oloni anima yakuhwima, balingile lalo bubi ku mesho obe, cho babechelele ku maboko abitothzi babo, cho bitothzi babo baba yulile. Oloni omo batengulukile nakulilila kuli yobe, wabathzibile kutunda mwilu, cho bithimbu bya bingi mwafwa wa chikeketima chobe waba yobwele. ²⁹ Wabanyanyamethele mangana batengulukile lalo kuli thiko lyobe. Oloni bakele nalikamba cho bonowele kuthzibilila ku mathiko obe. Cho balingile bubi ku majwi obe aje ana monyo kuli woshe uje ononokela. Bajundwile bitsili byabo na kukoletha bithingo byabo na kwonowa kuthzibilila. ³⁰ Myaka yaingi wabononokele na kubanyanyametha na munthzinthzime wobe kwitila muli tupolofita bobe. Oloni kubathzibililile embwe. Cho wabanene mu maboko abanu ba mu lifuti. ³¹ Oloni mu ng'eke yobe yakama manene kuwaba bihithile embwe nameme kubechelela, omo yobe wakala na bithzana na Njambi wa ng'eke. ³² Cho oni, Njambi yetu— uwakama manene, wakuhyana cho Njambi wabinthzili uje akanyungu chikumiiyo na kukala na ngothzi ya bithzango— kethi wechele obu bukalu bwasholoka kupwa bwabundondo buje unaija ali yetu, ali myene yetu, ali batwamena betu, na ali batupilisitu betu, na ali batupolofita betu, na ali bakakulwila betu na ali banu bobe boshe kutunda amatangwa abi myene ba Asillya nalelo lino. ³³ Yobe uli mu byoshe bije binaija ali yetu, mwafwa unabilingi muku kulaela, oloni twalingile bya bibi. ³⁴ Bimyene betu, batwamena betu, batupilisitu betu, na ba kakulwila betu kuba nyungile lithiko lyobe embwe, nameme kwaka maana ku mathiko obe nameme ku chikumiiyo cha majwi obe embwe chije chi waba nyanyamethele. ³⁵ Nameme munganda yobe babenya, athimbu babwahelelele bukama bwa bubwa bwobe mu lifuti lya kama lya bwilo lije wabangulwile, cho kubabupangelele nameme kutenguluka kutunda kubilinga bya bubi embwe. ³⁶ Ololoni tunapu tubindungo mu lifuti liwabanene bakakulwila betu na kulya bushuka bwalyo na bwana bwalyo bwa bubwa, cho kengenionu, tunapwoni tubindungo muli eli lifuti. ³⁷ Bufuko bwa kutuuka mu lifuti lyetu bukai kuli myene baje bakanangula ali yetu mwafwa wa bubi bwetu. Cho bayulile akati kamibila yetu na akati kabimuna byetu ngwe mubalombele. Cho tuli mutuyando twa kama manene. ³⁸ Mwafwa wa byos hebi, tupange chikumiyo chakukola mubithoneka. Ali tutanekeyetho twakufwika ali mathzina abatwamena betu, Lebiti, na tupilisitu.