¹ Cho banu boshe balikungulwile amolika ngwe munu umo mu chela chakulishanda mulutwe lya chikolo chaku mema. Cho behwithithithe Ezila muka kuthona anene mukanda wa lithiko lya Mosesa, uje Yehoba wakambeyeye baka Isalela. ² Alitangwa lya kulibanga mungonde yamuchitanu nabibali, Ezila kapilisitu wanenele lithiko kumesho achikungulukilo, amolika na banalume na banakathzi, na boshe baje bathziba na kutanekeya. ³ Cho wakengethele ku chela cha kulishanda mulutwe lwa chikolo cha kumema, cho watandeleo kutunda mutondotondo ndoo mutanya, ku mesho abanalume na banakathzi, na woshe uje atanekeya na boshe banu bathzibithithile bwino ku mukanda wa lithiko. ⁴ Cho Ezila mukakuthona wemanene a kathandya kabiti kaje kabapangele banu kakwambulwila. Cho kumukulo wendi kwemanene Malithiya, Shema, Anaiya, Uliya, Hilikiya, na Maseiya, ku chilyo chendi, na Pendaiya, Mishale, Malikija, Hashimbandana, Zakaliya, na Meshulamu bakele banemana kuchimoshwe chendi. ⁵ Ezila washokolwele mukanda mu mesho a banu boshe, omo wemanene elu lya banu, cho omo waushokolwele banuboshe bakatukile. ⁶ Cho Ezila wakwithwile Yehoba, Njambi wakulyana, na banu boshe bajundwile maboko abo na kukumbulula ngwabo, "Ameni! Ameni!" Cho bakulamene athi na kushangathzeka Yehoba na bihanga byabo athi. ⁷ Cho lalo Jeshwa, Mbani, Shelembiya, Akikubi, Shambethai, Hondiya, Meseiya, Kelita, Azeliya, Jazambandi, Hanani, Pelaiya— waku ba Lebite—wakwathele banu kutanekeya lithiko, athimbu bathalele mu byela byabo. ⁸ Cho batandele mumukanda. Cho lithiko lya Njambi lya pangiliwe mwamubwa mukulilumbununa na kulyana ku banu mulyalumbunukila mangana batanekeye kutanda. ⁹ Nehemiya ngubelunu, na Ezila kapilisitu muka kuthona, na Levite uje wakala nakulumbununa kuli banu na kwendeka kuli banu ngwendi, "Litangwa eli linapu lya kuthzila kuli Yehoba Njambi yobe, Kethi mulile nameme kulila mithothzi embwe." Omo banu boshe balilile mithothzi omo bathzibile majwi alithiko. ¹⁰ Cho Nehemiya wendekele kuli bakebo ngwendi, "Yeni na ngila yeni, lyeni bya mathzi na kukala nakunwa bya kupwelela, na kutumako bimo kuli uje nabijeneka, mwafwa eli litangwa linapu lya kuthzila lya Shukulu yetu. Kethi muli thethete mwafwa kujolela kwa Yehoba kunapu binthzili." byeni." ¹¹ Cho Lebite wolwethele banu kupwa kulu, na kwendeka ngwendi, "Shi! mwafwa eli litangwa linapu lya kuthzila. Kethi mulithethete embwe. ¹² "Cho banu boshe baile ngila yabo mukulya na kunwa nakulipangela bya kulya nakubwaelela na kujolela kwakama manene mwafwa banatanekeya majwi aje ababa thzibukithile. ¹³ Alitangwa lya muchibali batwamena ba bithemi baba kakulwila kutunda ku banu boshe, ba tupilisitu na baka Lebite, bethzile amolika kuli Ezila mukakuthona mukutambula kulilongetha kutunda ku majwi alithiko. ¹⁴ Cho bawanene banathoneka mulithiko omo Yehoba wakambeyeye kwitila muli Mosesa ngwendi banu bamu Isalela banapande kuyoyela mu bipundo athimbu yachilika cha mungonde ya muchitanu na bibali. ¹⁵ Cho bambulwile mu binganda byoshe, na mu Yelusalema, na kwendeka ngwabo, "Yeni mu lifuti lya malundu, na kwilwitha minango ya maputa a olyu na miti ya olyu ya mushwata, na mailito, mungongo, na miti ya mimbembe, ya kupangako bipundo ngwe mubachithono." ¹⁶ Cho banu baile na kunena maputa nakuli pangela babenya bipundo, ou elu lya tsimba yendi, mubithzango bya milongo byabo, na kubithzango bya ku binganda bya njubo ya Njambi, mu chela chakulishanda kulutwe lya chikolo chaku mema, na mulishekela lya chikolo cha Efalaimu. ¹⁷ Cho chikungulukilo choshe chabaje batengulukile kutunda mu bundungo bapangele bipundo na kuyoyelamo. Oloni kutunda mumatangwa a Yoshwa mwana wa munalume wa Nuni kweta a litangwa lije, na banu bamu Isalela kubabwahelele chilika echi, cho kujolela kwapwile kwakama manene. ¹⁸ Cholalo litangwa alitangwa, kutunda a litangwa lya kulibanga kweta lya kumanwithila, Ezila watandele mumukanda wa lithiko lya Njambi. Cho banyungile chilika ha matangwa atanu na abali cho alitangwa lya chitanu na atatu lyapwile chikugulukilo cha kuthzila, mukwononokela kulijwi.