¹ Lubinda lwange tawe! Njipwoni ngwe kuje kunonothzola kwa bushuka bwa thimbu ya ndombo, cholalo ngwe bujoni bushuka bwa binyu buje bana teje laja; chojo ku kwethi lishakashaka lya kulya, kukwethi bushuka bwa muti wa mukuyu buje mwonyo wange uthetela manene. ² Ololo banu boshe ba buthunga bana nongo njwa mu lifuti; chojo na umo lalo munu wa kulongwa yana thalaho wai mu muyati woshe wa bunu. Boshoni bali na ku bandamena lika kwitila maninga; umo na umo wabo ali na ku yomba ndolome yendi na nganjo. ³ Chojo maboko abo a kala na butongwe manene ku ku kulinga bije bya bibi: ntwama a lomba bimbongo uje mukaku yongola milonga na li bwahethela laja ku tambula mathzika kanwa, uje wa nthzili a ba shika bakwabo bije bya tonda ikeye babenya. Ngechi boshoni bana liwana mu uutumba kulinga bya bibi hamo. ⁴ Chojo uje wabo wa mubwa wanene napwoni ngwe shaaku ya ngocho, cho na ujoni wa kulongwa manene a kati kabo napwoni wa mubi manene na ku tubakana na libamba lya mingonga. Cho ebi linapu lithathe lije ba sholwele chimweja ba ka kunyunga bobe, ije lithathe lya kashitiko kobe. Ei ikeyo thimbu ya chitanga chabo. ⁵ Ngechi kethioni u kulahele mukweni woshe uje wa lyaata nendi; cho kethi u kulahele muli kabuthamba kobe woshe embwe. Nyunga chikolo cha kanwa kobe nambe bene kuli munakathzi uje na lala mu maboko obe. ⁶ Mwafwa mwana wa munalume aka shaula ishe, cho mwana wa munakathzi a kemanena baina, na mumbanda a kemanena ba inamweno yendi. Na bitothzi ba munu banapu banu bene baje ba mu njubo yendi babenya. ⁷ Olojo ngwe kuli yangeni, anga bene nji chika talelela kuli Yehoba. Cho njika bandamena Njambi, wa mwonyo wange; Njambi yange chili bene a kanjithziba. ⁸ Chojo kethi uli thambe ali yange na kalaja, yobe chitothzi change. Mwafwa na anima ya kuwa kwange, cholalo njinduka. Omu Yehoba babenya ikeye bene apwoni linongo lyange. ⁹ A kulingoni nja bulumwine ku mesho a Yehoba, cho njinapande bene kutaba na ku tambula bukalu bwendi kweta na a thimbu ije a kanji mbitwila ng'anda yange na ku nji yula. Cho a kanji nena lalo mu liethzi, chojo nange nji ka mononi kulongwa kwendi. ¹⁰ Ngechi na chitothzi change a ka chimona echi, chojo na shwamwa ika fwika ali ujoni yendekele kuli yange na kakembe ngwendi, "Indi ali kulijo owo Yehoba Njambi yobe? Mesho ange aka mu tala uje munakathzi, chojo baka mu lyatangela athi ngwe aje mandoba a mu bitapalo ¹¹ Chojo lithathe lya kutunga lalo mabamba obe lili na kwija; chojo ali lije bene lithathe binginga byobe baka bijanjumuna na ku byetetha ku lyala manene. ¹² Ngechoni a lithathe lije banu bobe ba kaija kuli yobe, kutunda ku Asiliya na binganda bya mu Ingitu, kutunda ku Ingitu kweta ku Ndonga, kutunda ku kalunga ndonga kweta ku kalunga ndonga, na kutunda ku lilundu na kweta ku lilundu likwabo. ¹³ Olojo lije lifuti bali nyongetha a mulonga wa baje banu ba tunga muje, a mulonga wa bilinga byabo bya bibi. ¹⁴ Kumani pwoni kanyungi ka banu bobe yobe babenya na chibanthzi chobe, butanga buje bu wangwile laja kupwa buthwana bwobe. Bali na ku yoyela mwa likalyabo mu mambo, a kati ka mulambu wa ubwa. Ba tabethe ba lithile mu Mbeshani na mu Ngilinde ngwe muje bene mu chakele ku mathathe a kulaja. ¹⁵ Chojo ngwe muje bene chapwile mu matangwa aje mwa tundile muje mu chifuti cha Ingitu, cho na ano bene njichiba monetha bya ku komoketha. ¹⁶ Ngechi na mafuti a mona cho na ku thziba shwama a mulonga wa kujena binthzili kwabo. Bali komokela na ku kwata maboko abo a tunwa twabo; na matwitwi abo a thzika. ¹⁷ Chojo baka lyaka likungu ngwe muje a ka lingi linyoka, ngwe baje tuthitu ba ka likoko athi. Cho baka tuuka ku bimpaka byabo na lyooba lya kama, ba ka ijoni kuli yobe, Yehoba Njambi yetu, ngechi ba ka tewa manene a mulonga wobe. ¹⁸ Cho iyajo Njambi lalo wa ku lifwa nobe— uje muka ku fumithao bubi, uje mu ka ku jombwetha buje bubi bwa uje na lituluho wa a buthwana bwendi? Ikeye kethi ku tulika kulubala kwendi ngechi kupwe kwa myaka yoshe mwafwa a ka bwahelela lika mu ku sholola chithzemo chendi cha kwilika ku tenguluka. ¹⁹ Cho chilibene uka kala lalo na mema kumbunge ali yetu, chojo uka lyatangela bubi bwetu mwithi ya mendi obe. Ukombila bibi byetu byoshe mu kuloba kwa kalunga ndonga. ²⁰ Chojo ukanoni buthunga kuli Yakobo na chithzemo cha mwilile kuli Abilahama, ngwe bene muje bene wa lingithile kuli bakakulwila betu ku mathathe a ku thang'ulu.