¹ Cho Yehoba wendekele kuli Mosesa, nwendi, ² "Endeka kuli Aloni na kuli bana bendi ba banalume, baleke ngechi ba shondoloke ku byuma bije bya kuthzila bya banu ba Isalela, bije bibangwile kwana kuli yange. Chojo kubapandele kushaula lithzina lyange lya kuthzila embwe. Yange Yehoba. ³ Cho endeka kuli bakebo ngwobe, "Umona ngwe umo wa kuchithemwa cheni mu bikota byeni byoshe a shwena ku byuma bya kuthzila bije banu ba Isalela bangula kwana kuli Yehoba, oku ikeye najwala, cho uje munu wa ngachije bana pande ku mu fumitha ku mesho ange: Yange Yehoba. ⁴ Cho naumo wahi wa kuchithemwa cha Aloni uje ali na mushongo wa kwatha ku litambwithawo a chikoba chendi, indi mushongo uje ali naku njululuka a mubila wendi, ou yanatha kulya kuli umo wa milambu ije ba nana kuli Yehoba kubanga tai na jwele njwaa. Cho uje woshe ya kwata a chuma choshe chije cha ku jwala kwitila mu ku kwata a munu wa kuthsa, indi mu ku liumangana na munalume uje mbuto yendi ili na ku njululuka, ⁵ indi uje woshe yakwata athitu woshe uje wa kwenda kulibandeka uje ya mu pwitha wa ku jwala, indi nambe munu woshe uje yali jwaletha ikeye babenya, muyati wa kujwala woshe owo u natha kupwa— ⁶ cho na kapilisitu uje ya kwata chuma choshe chije cha ku jwala cho nendi a kala wa kujwala kweta na ku mangwethzi. Chojo kapandele kulya chili choshe kuli bije bya kuthzila, kubangoni ngwe na jwaletha mubila wendi mu mema. ⁷ Omwoni ngwe litangwa lina lauka, cho kathinoni a kala lalo wa kujela. Cho na anima ya ku lauka kwa lithathe cho nathoni kuya ku byuma bije bya kuthzila, mwafwa bije bikebyo bulyo bwendi. ⁸ Olojo kapandele kulya chije choshe chi na lithsila indi chije chibana thsii kuli tuthitu ba mu shwata, mwafwa cho ali jwaletha ikeye babenya. Yange Yehoba. ⁹ Cho tupilisitu banapande ku kabangeya bilongetha byange, kethi ngocho cho ba ba wana na mulonga wa kulinga bubi chobene ba natha kuthsa a mulonga waku nji shaula yange. Yange Yehoha uje mu ka kuba pwitha kuthzila. ¹⁰ Chojo na umo wai uje kethi waku naanga ya tupilisitu, kwakelaho na bangethzi, ba kapilisitu nambe baje bangamba bendi bana lanya, ya natha kulya kuli choshe chije cha kuthzila. ¹¹ Olojo umona ngwe kapilisitu a landa ndungo woshe na bimbongo byendi, cho uje ndungo natha kulya ku byuma bije biba na kundika kuli Yehoba. Chojo na baka njubo ya kapilisitu na bandungo baje bana themukila mu njubo yendi, na bakebo banatha kulya amo nendi kuli bije byuma. ¹² Cho umononi ngwe muna kapilisitu wa munakathzi a shomboka ku munalume uje kethi kapilisitu, cho katha kulya nambe chimo kuli ije milambu ya kuthzila ije iba kungulula. ¹³ Olojo umona ngwe ije muna kapilisitu wa munakathzi napu fwile, indi nambe uje banalukulula, cholalo umona ngwe kethi na mwana, cholalo umona ngwe eluka na ku kayoya mu njubo ya ishe ngwe muje mwa kele mu bumbanda bwendi, cho natha kulya kuli bulyo bwa ishe. Oloni na umo wai uje kethi wa mu njubo ya kapilisitu ya natha kulya kuli buje bulyo bwa kapilisitu. ¹⁴ Cho ngwoni munu alya bya kulya bya kuthzila a kujeneka ku thzubuka echi, cho napande kufweta kuli uje kapilisitu a mulonga wendi; cholalo napande ku thothaho na chitika cha butanu kathinoni a ka ilwithe kuli kapilisitu. ¹⁵ Ngechi banu ba Isalela kuba pandele ku shaula bije byuma bya kuthzila bibana jundwila mwilu na kubyana kuli Yehoba, ¹⁶ na kuli neneloni bakebo babenya kwambata shili ije iba nenela kubawana na mulonga wa kulya bulyo bwa kuthzila, mwafwa yange Yehoba uje a ka ba pwitha ba kuthzila." ¹⁷ Cho Yehoba wendekele kuli Mosesa, ngwendi, ¹⁸ "Endeka kuli Aloni na banu bendi ba banalume, na kuli banu boshe ba Isalela. Endeka kuli bakebo ngwobe, 'Ka Isalela woshe, nambe uje muka kwija uje ali na ku yoyela mu Isalela, umona ngwe banena mulambu—nambe wa ku shulithilila kulithinga, indi nambe uje mulambu wa kulyana ikeye babenya, indi banena mulambu wa kulumba kuli Yehoba. ¹⁹ Umona ngwe ngwabo ba u tambule, cho banapande kwana chimuna uje wa nkomba wa ku jeneka lalo kapenga kutunda ku bingombe, tununu, indi bimembe. ²⁰ Olojo ku mwa pandele kwana bwana uje chimuna yali na kapenga. Mwafwa cho yange ku njimu tambula na ku mimanenako yeni. ²¹ Chojoni woshe ya ana mulambu wa ku litombola kutunda ku butanga kuli Yehoba bwa ku shulithilila kuli thinga, indi nambe ngwe bwana bwa kulyana ikeye babenya, cho uje chimuna kapandele ku kala na kapenga kathina ba u tambula. Kukwa pandele ku kala kapenga nameme kamo muli uje chimuna embwe. ²² Ngechi bene ku mwa pandele kwana mulambu bimuna baje ba kuthsa mesho, nambe ba kutenguka, nambe ba ku pokoka, indi nambe baje bali na majaja, nambe baje bu bali na bimbandu bya mathina, indi nambe baje bali na linjandi. Kumwa pandele kwana aba boshe kuli Yehoba ngwe mulambu wa kulumba na tuya a mutula. ²³ Cho munatha kunena nkomba ya ngombe kupwa mulambu wa kulyana yobe babenya indi nambe maanga uje na themuka na bulema bwendi, indi wa mundondo, olojo bwana bwa chifwa chije kubatha ku butambula kupwa bwana bwa kulithinga. ²⁴ Chojo kethi mu ketheke kwana bwana kuli Yehoba bwa chimuna uje ming'andi yendi ya bunkomba ya ku tunyuka, indi ya ku thsena, indi ya ku tabuka, indi nambe ya kumbitula embwe. Kethi mu ketheke ku linga echi mu lifuti lyeni embwe. ²⁵ Cho kethi muketheke kwambata likende lije lili ku liboko lya muka kwija na ku nenela Yehoba kupwa bulyo bwendi embwe. Baje bimuna boshe baje bali laja na bulema na tutengu muli bakebo, chojo kubakaba tambula na ku mimanenako bwino yeni.''' ²⁶ Cho Yehoba wendekele kuli Moses ngwendi, ²⁷ "Umononi ngwe muna ngombe indi muna membe na themuka, cho napande kubandama matangwa atanu na abali na ina. Cho kutunda a litangwa lya mu chitanu na atatu na kuya ku lutwe, cho banatha ku mu tambula kupwa mulambu wa bwana bwa kulumba kuli Yehoba. ²⁸ Kethi mwetheke ku thsiya ngombe wa lwabo indi nambe kanunu wa lwabo amolika na munendi wa mundondo, boshe babali a lithathe limo lika embwe. ²⁹ Mwafwa umona ngwe mwana mulambu wa ku kandelela kuli Yehoba, cho muna pande kwana uje mulambu mu ngila ije ija ya ibwa ibanatha ku itambwilamo. ³⁰ Cholalo uje mulambu bana pande ku ulya na ku umanetha a litangwa bene lije liba wana. Kumwa pandele ku thethzako nambe kamo kao ka kweta na ku mutondo u kwabo embwe. Yange Yehoba. ³¹ Chojo yeni munapande kutulika mashiko ange na kuwa kabangeya mu bilinga byeni. Yange Yehoba. ³² Kethi mwetheke ku shaula lithzina lyange. Banu ba Isalela banapande kutaba ngwabo yange chilibene njapwa wakuthzila. Yange Yehoba ou a ka mipwitha ngechi mu kale ba kuthzila yeni, ³³ ou ya mi tundithile mu lifuti lya Ingitu ngechi a kale Njambi yeni: Yange Yehoba."