¹ Yehoba wathanene Mosesa nakwendeka nendi mutende yakuliwanena, ngwendi, ² "Endeka kuli banu ba Isalela nakubaleka ngwobe, 'Omwo munu woshe wakutunda mukati keni anena bana kuli Yehoba, akanene chimuna kupwa bwana, wakutunda ku bingombe nambe ku bimaanga. ³ Oshe bwana bwendi bupwa bwa kulumba kutunda mu bingombe, napande kulambula nkomba wakwilika katenga. Akamulambwila kubukobelelo bwa tende ya kuliwanena, mangana ukathe kupwa wakutabela ku mesho a Yehoba. ⁴ Akathaleka liboko lyendi hamutwe wa mulambu wendi wakulumba, cho bakautabela mukumwimanenako chikapwe cha kulijeletha ibenya. ⁵ Cho napande kuthsiya uje ngombe ku mesho a Yehoba. Bana ba Aloni, baje tupilisitu, bakatwala aje maninga na kuwashamwina ha mutula uje ukapwa kuje kubukobelelo bwa tende ya kuliwanena. ⁶ Cho napande kujuba uje mulambu wa kulumba nakuubatuthzola mu bipuka. ⁷ Cho bana ba kapilisitu Aloni bakabweka tuhya ha mutula nakwaka bitale ha liko. ⁸ Baje bana ba Aloni, baje tupilisitu, bakaka bije bipuka, kumolika namutwe hamo na mathzi, ha bitale bije bili ha liko lili ha mutula. ⁹ Oloni napande kukusha bya mwimo na mendi na mema. Cho uje kapilisitu akalumba byoshe ha mutula kupwa mulambu wa kulumba. Ukatubula bweko bwakutobala kuli yange; ukapwa mulambu banapanga kuli yange kwitila mu tuhya. ¹¹ Oshe ngwe mulambu wendi wakulumba ukatunda ku butanga bwa bimaanga, maanga umo nameme membe umo napande kulambula nkomba wakwilika katenga. ¹⁰ Napande kumuthsiyila kumutambela wa kunto ya mutula ku mesho a Yehoba. Bana ba Aloni , baje tupilisitu, bakashamwina maninga awo mu mitambela yoshe ya mutula, ¹² Bakaitetanga mu bipuka na mutwe na mathzi ayo, cho uje kapilisitu napande kwaka bije bipuka ha bitale bije bili ha liko lije lili ha mutula, ¹³ oloni bya mwimo na mendi napande kubikusha na mema. Cho uje kapilisitu akalambula woshe, nakwenyekela ha mutula. Unapu mulambu wakulumba, cho ukatuhula bweko bwakutobala bwa Yehoba; Ukapwa mulambu banapanga kuli ikeye kwitila mu tuhya. ¹⁴ Oshe mulambu wendi wakulumba ukapwa wa tuthzila kuli Yehoba, cho napande kunena katela nambe muna liyembe kupwa mulambu wendi wakulumba. ¹⁵ Uje kapilisitu napande kunena kumutula, kubatulako mutwe wawo, na kuwenyeka ha mutula. Cho maninga awo napande kuwanthzinthzila kuyehi ma mutula. ¹⁶ Napande kutunditha mbuto yacho na chifwa chayo, na kuyumbila kuyehi na mutula kumutambela waku mbwela, mu mwela wa lito. ¹⁷ Napande kuutabula hakati ka mambaba awo, oloni kapandele kupanga mu bipuka bibali embwe. Cho uje kapilisitu akabwenyeka ha mutula, ha bitale bije bili ha liko. Ukapwa mulambu wa kulumba, cho ukatuhula bweko bwakutobala bwa Yehoba; ukapwa mulambu banapanga kuli likeye kwitila mu tuhya.