¹ Nchingilileni mwe ba Lesa pakuti ndaba nekufisama muli mwebo. ² Ndalabila kuli ba Yawe, "Mwebo nimwe ba Shikulu bandi, ukuwama kwandi kuli kwalukoso ukwakubula mwebo. ³ Koti nikubantu abaswetele abo abali pa calo, bali bantu abacindeme; ukutemwa mwandi konse kuli muli bo. ⁴ Amapensho abo akacililako, abo abafwaya tu lesa tumbi. Nshiketululapo ukufumya icakunwa camulambu wa mutupo kuli tu lesa twabo neli kusuntula peulu amashina abo nemilomo yandi. ⁵ Ba Yawe, nimwe cipimo cakusala kwandi kabili inkomeki yandi. Mulekata nakufyandi. ⁶ Icipimo ca mundandwe cilya nshikilwe pali nebo mumipunda iingwamine, icine ubupyani ubwakusangatasha bwandi. ⁷ Nkabashukisha ba Yawe, abo aba nsambisha, nangu nipa bishiku akalango kandi katandanjeba. ⁸ Ndababika ba Yawe kuntanshi yandi pamindi shonse,ifyo ati tekuti intenane ukufuma kukuboko kwabo ukwa kulwine! ⁹ Panwe fyo umutima wandi watemwa ukwandama kwandi kwasekelela, icine nkekaka mukucingililwa. ¹⁰ Pakuti tamukaulekeleshapo umweo wandi ku sheoli, Tamukamalekapo umucekelwe wenu ukubone icilindi. ¹¹ Mulansambilisha insila ya mweo, ukusangalala ukwingi kulekala menso enu, ukutemwa kulekala mukuboko kwenu ukwakulwine umuyayaya.