¹ Aya emashiwi akwa Nehemiya umwana umwalalume wakwa Akaliya:Pano kyalimonekekle mu mwenshi wa kisilebi, mu mwaka wabu makumi abili, koti efinali mu Susa umushi wafumu, ² umo wabalongo bangi abalalume, Anani, kabili nabambi abalalume ukufuma ku Yunda balishile, kabili nalibepwishe palwabena Yundeya, aba pusukile, balya aba pusukile mubusha, kabili napalwa Yelusalemu. ³ Balilabile kulinemo, "Balya abashelepo mukibunji abapusukile mu busha bali mulukatasho ulukulu kabili ne nsoni pakuti ikibumba kya Yelusaleme kyapasaulwa, kabili ne fibi fya milyango fyaokewa na mulilo." ⁴ Penkapo ilinaufwile ifi fyebo, nalikele panshi ne kulilakabili panshiku nalitwalilikile ukulosha ne kushikilwa ne nsala kabili ne kulomba kutashi yaba Lesa bakwiulu. ⁵ Penka nalilabile, "Napapata, ndukumilomba mwebo, ba Yawe, ba lesa bakwiulu, ba Lesa abakulu ne bakulenga ne mwenso, abasunga ululayano lwakwe ne kutemwa kwakwe ukwape kuli balya bonse abamutemenwe ne kusunga imikambisho yakwe. ⁶ Amenso enu ngaesulwe ne matwi enu nga ofwikishe pakuti mumfwe ku kutembela kwa kalume wenu uko nakutembela kutashi yenu akasuba ne bushiku ukwa pa bena Isuleli abakalume benu. Kofisulula ububifi bwabena Isuleli, ubotwabifya kuli mwebo. Fyense pamo nemo bamunganda yabatata twabifya. ⁷ Twakita ifyakubipa makosa kuli mwebo, kabili tatusungile imikambisho, ifipope, ne mafunde ayo mwakambishe kalume wenu Mose. ⁸ Namipapateni anukeni ikyebo kyenu mwakambishe kalume wenu Mose, 'Kani mukakite ifyakubula bukishinka, kamisalanganya mwebo mubantu, ⁹ lomba kani mwabwela kuli nemo kabili nekukonka imikambisho yangi kabili nekukita, nangu kyakwebati abantu benu balisalanganishiwe ukutali makosa mushiya ya meulu, nkabakolonganika kwekakulya ne kubabwesha kupunsha iinasalile ukulengamo ishina lyangi ukwikalila. ¹⁰ Panobaba bakalume benu ne bantu benu, abomwapuswshe ne bukulu bwa makosa enu kabili ne kuboko kwenu ukukosele. ¹¹ Napapata, ndukumilomba mwebo, bakapa, lekeni ukutwi kwenu kube nenkufwikisha ku mitembelo ya kalume wenu kabili na kumitembelo ya bakalume benu abasekela mukulemya ishina lyenu. Pano peleni ukushuka kalume wenu lelo, kabili ne mupela uluse mu menso auyu muntu." Nkabomba bukaseya kumfumu.