¹ Anukeni, ba Yawe, ifyakichikwa kuli fwebo; moneni ne kumwenesha insoni shenu. ² Ubuswani bwesu babwalula bwa beeni; amananda esu kubena fyalo. ³ Twaba baana banshiwa, abakubula wisi, kabili nabainesu baba kochi fitushi. ⁴ Tulyelelwe ukulipila siliva pa menshi ao tunmwa, kabili tulyelelwe ukulipila siliva pakupoka inkuni shesu. ⁵ Abo abaleisa panuma yesu bali apepi munuma yesu; twakatala kabili techi tumone ukutusha. ⁶ Twalipela fwebene kubena Ijipiti na ku bena Asilya pakwebachi tumone ifya kulya ifingi. ⁷ Bawishifwe balibifishe, kabili tabalipo, kabili twatwikwa ububi bwabo. ⁸ Abasha bakotuteka fwebo, kabili tapali uwakutupokolola fwebo mu maboko abo. ⁹ Tulapinta umukate kana twapishaubumi bwesu mumakatasho, pantu wa kiswi ikili mumpanga. ¹⁰ Inkanda shesu shakulilako ukukaba kochi kitofu pantu wa kibe kya nsala. ¹¹ Bainefwe babapachikisha ukubapanga amilandu mu Ziyoni ne fisungu mu mishi iikulu iya mu Yuda. ¹² Abana bamfumu abalalume balibakobekele kwiulu ku maboko abo, kabili tapali umukinshi uyo balukulangisha ku bakulu. ¹³ Abalalume balebakakachisha ukupela inseke ne kyakupelelako, kabili ne banike abalalume ukubatwika inkuni ishilemene. ¹⁴ Abakulu basha imulyango wa mushi kabili ne abalalume basha ukwimba kwabo. ¹⁵ Ukusangalala kwa michima yesu kwapwa kabili ne kukinda kwesu kwaaluka mu misowa. ¹⁶ Ikingalangala kyapona ukufuma ku mitwi yesu; ishamo kuli fwebo, pakuchi fwebo twabifya! ¹⁷ Pali kino umuchima wesu walwala, pali fino ifintu amenso esu paba akafisha ¹⁸ pantu ulupili lwa Ziyoni lwaonaika, na ba mumbwe bakonyantaulapo. ¹⁹ Pano mwesbo, ba Yawe, mulikete nimfumu umuyayaya, kabili mukekala petebe lya bufumu ukufuma kukikota ukufika kukikota. ²⁰ Nindo mwatulubilako fwebo umuyayaya? Nindo mwatulekelela fwebo mukufula kwa nshiku shenu? ²¹ Tubwesheni kuli mwebene, ba Yawe, kabili nafwebo tukabweshiwa. Sanguleni inshiku shesu kwachi nifyo shali akale _ ²² Kanifye mwebo mwatulekelelafye fwebo kabili mwatufichilwa fwebo ukukilapo.