¹ Ili lishiwi lyaba Yawe kyo lyaishile kuli Osiya umwana wakwe Beyeli munshiku shakwe Usaya, na Jotami, na Eyasi, kabili na Esikaya, imfumu shaba Yuda, kabili munshiku shakwe Jeloboami umwana wakwe Joasi, imfumu yaku Ishileli. ² Ili balabile ba Yawe pakutachika ukupichila muli Osiya, bo kabalabila achi kuli ye, ''koya, ulipinchile webo wemwine umwanakashi uyo uli umuchenchemeshi. Akaba nebana bakwe abakufuma mubuchenchemeshi. pakuchi ikyalo kilukukita ubuchenchemeshi abukulu ukuba nekufuma kuli ba Yawe.'' ³ Kabili na Osiya alile kabili nekupa Gomeli umwana umwanakashi uwakwe Dibilayimi, kabili naye kaimita kabili nekumufyalila umwana umwalalume. ⁴ Ba Yawe kabalabila kuli Osiya, ''mwinike ishina lyakwe achi ni Jesileyeli. pakuchi pampindi inini lukoso ukalapisha iñanda yakwe Jiyu pakuchi pamulopa waichikele ku Jesileyeli, kabili ne nkapwisha ubufumu bwamuñanda yakwe Ishileli. ⁵ Fikaboneka pakasuba ako ne nkatoba ubuta bwakwe Ishileli mumukolo waku Jesileyeli'' ⁶ Gomeli alimichile ilya bufibili kabili nekufyala umwana umwanakashi. Kabili ba Yawe kabalabila achi kuli Osiya, ''Mwinike ishina lyakwe achi ni Lolukama, pakuchi ne techi nkabapo nenkumbu pañanda yakwe Ishileli, pakweba achi ne mbafitulukile bo takulipo. ⁷ Lomba ne nkaba nenkumbu pañanda yakwe Juda, kabili ne nkabapulusha nemo nemwine, Yawe Lesa wabo. Ne nshakabapulushe kubuta kumpoko, kubulemo, bakafwalo, neli kuli abapali bakafwalo.'' ⁸ Sombi pamuma ili bamusumwine Lolukama kuli Gomeli, alimichile kabili nekufyala umbi umwana umwalalume. ⁹ Ba Yawe kabalabila achi, ''mwinike ishina lyakwe achi ni Lolami, pakuchi mwebo tamulipo bantu bangi, kabili ne nshilipo Lesa wenu. ¹⁰ Lomba nangaba nififyo ubwingi bwampendwa bwabintu aba Ishileli bakaba kochi musenga wakukishiba uyo techi mwingapima neli kupenda. Fikaba kochi nipapo apo fyalabilwe kuli bo, 'Tamulipo bantu bangi,' fikalabilwa kuli bo, achi 'muli bantu babaLesa ba mweo.' ¹¹ Kabili abantu baku Juda kabili nebantu baku Ishileli bakabungana pamo. Bakasala imfumu imo pakuchi pali bo, kabili bakaninsa ukufuma mukyalo, pakuchi kakabakasuba akakulu akakwe ye Jesileyeli.