¹ Ishina iliweme ukukila ifinukile fya kumusesho, nobushiku bwakufwa buweme ukukila ubwa kufyalwa. ² Kiweme ukuya kuñanda yamalilo ukukila kuñanda yamalila, pakuchi ukulila kulesa kubonse abantu kupelo yabumi, ukwebati abantu balame mumichima. ³ Ukufitwa kuweme ukukila ukusekela, panuma yabulanda ipumi ilamoneka nesangalashi mumuchima. ⁴ Umuchima wamano niñanda yamalilo, lomba umuchima wabula mano niñanda yamalila. ⁵ Kiweme ukukutika kukukana kwa wamano ukukila ukufwa kunyimbo shabakuntupa. ⁶ Koti nimukusomenwa kwamyunga kokya mushi yamwipika, efili ukuseka kwa wabula mano efyo kilumbulwile. ⁷ Ukuli mwenesha kwa muntu wamano kulalenga bubula mano, kabili amafisa kanwa yalatupika umuchima ⁸ Kiweme ukupwisha umulandu ukukila ukutendeka; kabili ukutekanya kwa bantu mumupashi kwa kila ukuli ntonta mumupashi. ⁹ Wefitwa bwanga kumupanshi, lomba ubukali bwa mbula mano bulekala mumuchima. ¹⁰ Welabila, ''Mba nindo ishiku shakale ukukila shino?'' Tali mulandu wamano waipusha. ¹¹ Amano, koti kifyalilwa, kili bwino kilofwa abamano kasuba. ¹² Amano yalalenga ukukingililwa fyenka indalama shikingililwa, lomba ikiweme kumilangwe amano yalapela ubumi ku ukwente. ¹³ Esakanyeni imikinto yaba Lesa; nani wengatanika ikili kyonse apanga kukokomana? ¹⁴ Ili mpindi yawama, ikala nesangalashi pailya mpindi, lomba impindi ngayabipa, esakanya ifi: ba Lesa basuminisha fyonse ukwikala kumbali shonse. Pali fifif takulipo nangu umo ukusanga ifili fyonse ifilikwisa panuma. ¹⁵ Mubwikashi bwangi ubwa lukoso, namona fyonse fintu. Kuli abantu abololokele abalukonaika nokoloka kwabo, kuli nababi abekala isnshiku mububi bwamikinto yabo. ¹⁶ Welimwenesha ukuntuba, amano kumenso abe. Mba nindo kulyonaula we mwine? ¹⁷ Wentupa nangu ukuba mufibipile. Mba nindo ukufwa ili mpindi yobe tainga finka? ¹⁸ Kiweme ukwikatisha amano, kabili wefumako kukolonka pantu umuntu utina ba Lesa akasanga amakatasho onse. ¹⁹ Amano yalinamakosa kuli namano ukukila ukukila intangishi ikumi mumushi. ²⁰ Takulipo uolokele pakyalo ukintu ifiweme nokubulo kubifya. ²¹ Wekutika kumashiwi yonse ayalabilwe, mulandu koti waufwa ifingo lya mubofi obe. ²² Impindi ishingi umuchima, obe aleshiba, nangu wafinga bambi. ²³ Fyonse nafisanga namano, nalabile,'' kaba namano,'' Lomba kyali kililepo ukuba. ²⁴ Amano yatali nokushika. Nani wenga asanga? ²⁵ Nalyalulwile umuchima wangi ukufunda nokwesha nokusanga amano nokulondolola ukwesakanya, nokwishiba ububi kutupa kabili ukulitota bashila. ²⁶ Nalisangile ukukila ukulula lufu mwanakashi uli nomuchima wiswile utwando na makonde, kabili namaboko minyololo. Onse usekesha ba Lesa akafumako kuli ye, lomba imbifi ikekatwa kuli ye. ²⁷ Esakanya ifinasanga,'' ifyalabila umusambishi.'' Nalukubikapo ikinasanga ukwebati sange ukulondolola kwa mulinganya. ²⁸ Ifi efyo ndukukebelesha, lomba shisangilepo umo ukoloka pa bapamwanda, lomba aba banakashi bonse shasangilepo. ²⁹ Nasanga ukwebati: Ba Lesa kabalenga umuntu ukoloka lomba aya ukutali ukufwaya amakantasho ayengi.