¹ Ifintu fyonse filitongwelwe mpindi, kabili ne mpindi iya fintu fyonse pano panshi pa kyalo. ² Kuli impindi iyakufyalwa kabili ne mpindi iyakufwa, impindi iyakulimbilamo kabili ne mpindi iyakutupwilamo ifyalimbilwe, ³ impindi iya kwipaya kabili ne mpindi iyakubukwa, impindi iyakukundula ne mpindi iya ku sompa. ⁴ Kuli mpindi iyakulila kabili ne mpindi iyakuseka, impindi iyakulililamo amabingo ne mpindi iya kukinda, ⁵ impindi iyakuposa amabwe kabili ne mpindi iya kubuñanya amabwe, impindi iya kusekasha bwino abantu, ne mpindi iyakubula ukusekasha bwino. ⁶ Kuli mpindi iyakufwailamo ifintu kabili ne mpindi iyakubula ukufwailamo, impindi iyakusungilamo ifintu ne mpindi iyakufiposelamo, ⁷ impindi iya kutabwilamo ifyakufwala ne mpindi iyakufisonenamo, impindi iyakwikala kelele ne mpindi iyakulabila. ⁸ Kuli impindi iyakutemwe ne mpindi iyakupata, impindi iya nkondo ne mpindi iya mutende. ⁹ Nisa fintu umubomfi amwenamo mu nkito yakwe? ¹⁰ Namona inkito iyo ba Lesa bapana ku bantu ati bapwilikishe. ¹¹ Ba Lesa balipangile ifintu fyonse ukuba bwino pampindi yafiko iilingile. Kabili balibikilemo ne kyakwikalilila iyanshiku shonse mukachi kamichima yafiko.Lomba umuntu tekuti akyumfwishe bwino pa nkito iyo ba Lesa bakita ukufuma kukutendeka kwabo ukufika na kumpelo yabo. ¹² Njishi ukweba ati takulipo ikintu nangu kimo ikiweme ku muntu ukukilaila pa kusekela nokukita ifiweme ili ali no mweo - ¹³ Kabili umuntu onse alingile ukulya no kunwa, kabili nokwishiba ifyo engasanga ukusekelamo bwino mu nkito yakwe. Iki kyabupe ku muntu ukufuma kuli ba Lesa. ¹⁴ Njishi ukweba ati fyonse ifikita ba Lesa filekalilila Inshiku shonse. Takulipo nangu kimo ikingalundwapo nangu kufumishiwako, pantu ni baLesa ebafikita pakweba ati abantu babapele ubuleme. ¹⁵ Ikiliko kyaliko nakale; ikikabako kyaliko nakale. Ba Lesa balabalenga abantu ukufwailisha ifintu ififiseme. ¹⁶ Namona ububi pano panshi, apalingile ubupingushi ubuweme, kabili napalingile ukuba ubololoke, nali mwenepo ububi. ¹⁷ Nalilabile mumuchima wangi nati, ''ba Lesa bakabapingula abololokele kabili nababi pampindi iilingile ku mulandu onse kabili ne milimo shonse.'' ¹⁸ Nalilabile mumuchima wangi nati, ''ba Lesa balabesha abantu pakweba ati beshibe ati balilukoso pamo ne nama.'' ¹⁹ Ifibamonekela abana babantu efimonekela na kunama pamo. Fyenka ifi fwa umo efifwa naumbi pamo. Bonse pamo bali no mweo. Umuntu takilile inama. Fyonse lukoso fyalukoso . ²⁰ Fyonse fileya lukoso ku mpunsha imo. Fyonse fyalifumine kulukungu, kabili na fyonse filabwelela ku lukungu. ²¹ Ninani uwishibile kani umupashi wa muntu alaya kwiulu kabili no mupashi wa nama alaya panshi mumushili? ²² Kanshi nalikimwene nati takulipo ikintu ikiweme ku muntu ukukilaila mu kesekela mu nakito yakwe, pantu ekyo engakita lukoso. Ninani uwingamushamo libili ukwisa mukumona ifikakichika pantashi yakwe?