¹ Ishamo kuli babo abali pa kutusha mu Zayoni, kabili na kulibabo abakosele mukyalo kya mapili ku Samaliya, abalalume abeshibikwe tubalemene aba kufyalo, kuliye inauda yaku Ishileli isa mukuyafwa! ² Intangishi yenu yalabila, ''Kabiyeni ku Kaline ne kumpna; ukufuma kulya muye ku Amati, umushi ukulu; penka mukunkuluke munshi ku Gati kwaba Filishitiya. Kanibo bali nobune ukukila ubufumu bwenu bubili? Kani umupaka wabo mukulu ukukila umupaka wnu?'' ³ Ishamo kuli babo abatesha akasuba ka malwa ne kulenga umupando wabungwa ukupalama apepi. ⁴ Bala tandabala panshi pa mipunda ya meno ansafu kabili nekulala pafitanda fyabo. Balalyo twana twa mikoko mwitanga netwa ñombe umu baisungila. ⁵ Balemba inyimbo isha kutumpa ku kilimba kya Lute; bala lilengela ifya kulishako kwachi ni Davidi akichile. ⁶ Balanwa infaina kuma beseni ne kulisuba abene ne mafuta awamishe, lomba tabamfwapwe nkumbu pakonaulwa kwa Yosefu. ⁷ Fyenkefyo bakaya pano mubukaili nabakaili abakutanga, kabili ne kusekelela kwa babo abatandabala kukapita. ⁸ ''Nemo, Shikulu Yawe, nalapa nemwine - ifi efyalabila ba Yawe, ba Lesa bamabumba, napata ubwitote bwakwe Yakabi; napata iñanda iya kufisamamo. Penka nkampela bambi umushi nafyonse ifilimo.'' ⁹ Kikesa pali kilya achi nga abalalume ikumi bashalo muñanda imo, bakafwa bonse. ¹⁰ Ili umulongo wakwe nangu niuyo uwakumokya kapinta amafupa ukufumya muñanda - nga alabila ku muntu uli mukachi mu ñanda, ''Kani palipo uli nawebo?'' uyo muntu akalabila achi, ''Koku.'' penka akalabila, ''Ikala kelele, pakuchi tekuchi tushimbule ishina lyaba Yawe.'' ¹¹ Pakuchi, moneni, ba Yawe bakapela ifunde, kabili ne ñande ikulu ikatobaulwa tunini tunini, kabili nekañanda kanini kukasansaula. ¹² Bushe bakabalwe balabutuka pa peulu yamabwe akulu? bushe umuntu kuchi alimapo ne ñombe? mino mwa - alula ubupingushi ubung'eme ukuba nindulwe kabili nefisabo fyabulung'ami ukuba ifilulile - ¹³ Mwebo mweba sangalala pa Lo Debar, mwe balabila achi, ''Kanshi tatusendele Karinaim kumakosa esu fwebene?'' ¹⁴ Lomba moneni, nkemya ikyalo ikikamimakanina mwebo, iñanda yaku Ishileli - ifi efyalabila ba Yawe, ba Lesa ba mabumba. Ba kamikyusha mwebo ukufuma ku Lebo Hamati ukufika kukanika kaku Alaba.''